¹ ۱۔ جد سبا دی رانی نے سلیمان دی مشہوری سُنی تے خُداوند دے ناں تے خُدا وند دے ناں دے نال اوہدے تعلق بارے سُنیا تے اوہ اوکھیاں بُجھا رتاں پاکے اوہناں آزمان آئی۔ ² ۲۔ اوہ اِک وڈّے ٹولے سَنے یروشلیم اَپڑی۔ اوہدے اُونٹھ مسالیاں، واواہ چوکھےسونے تے مہنگے مہنگے نگاں نال لدے ہوئے سَن۔ اوہ سلیمان کول اپڑی تے اوہناں ساریاں گلاں بارے جیہڑیاں اوہدے دِل وِچّ سَن، اوہدے نال گل بات کِیتی۔ ³ ۳۔ سلیمان نے اوہدیاں ساریاں بُجھارتاں بُجھ لیاں کیوں جو بادشاہ لئی اوہناں نوں بُجھنا اُکا مُشکل نئیں سی۔ ⁴ ۴۔ تے جد سبا دی رانی نے سلیمان دی ساری حکمت تے اوہدے محل نُوں جیہڑا اوہنے بنایا سی، ⁵ ۵۔ تے اوہدے میز تے خُوراک نوں ، اوہدے نوکراں دے بہن اُٹھن ٹھنگ ، سیوا وِچّ حاضر رہن والیاں دِیاں وردیاں ، اوہدے ساقیاں نُوں تے اوہناں سوختنیاں قُربانیاں نُوں جیہڑیاں اوہنے خُداوند دی ہیکل وِچّ چڑہایاں ،ویکھیا تے اوہ ہکّی بکّی رہ گئی۔ ⁶ ۶۔ تد اوہنے بادشاہ نُوں آکھیا پئی تے وڈّے کماں تے تیری حِکمت بارے جیہڑی دَس مینوں اپنے دیس وِچّ پئی سی اوہ سچی نکلی اے۔ ⁷ ۷۔ پَر مینوں ایناں گلاں تے اوہدے تک پَک نہ ہویا جد تک میں آکے آپ سب کُجھ اپنیاں اَکھاں نال ویکھ نہ لیا۔ تے سچ مُچ مینوں تے ایناں گلاں دا اَدھ وی دَسیا نیئں سی گیا۔ کیوں جو تیرے حِکمت تے تیرے مال و اسباب دی فر اوانی اوس خُبر توں جیہڑی میرے کَنی پئی اوہدے توں کِدھرے ودّھ کے اے۔ ⁸ ۸۔ تیرے لوک کِڈھے کرماں والے نیں! تے تیرے اہلکار کِڈھے بختاں والے نیں۔ جہڑے سدا تیرے اَگے کھلوتے رہوندے نیں تے تیری کولوںسیانیاں گلاں سُن دے!۔ ⁹ ۹۔ خُداوند تیر ربّ دی حمد تے وڈیائی ہووے جنہیں تیتھوں خُوش ہوکے تینوں اِسرائیل دے تخت تے باہیا اے۔ تے اسِرائیل نال اپنے اَزلاں دے پیار دے سببوں اوہنے نیاں قائم رکھن لئی تینوں بادشاہ بنایا اے۔ ¹⁰ ۱۰۔ تے اوہنے بادشاہ نُوں اِک سو ویہ قنطاراں سونا ، چوکھے مَسالےتے مہنگے مہنگے نَگ دِتّے۔ اینے چوکھے مسالے فیر کدی نہ آئے جنہیں سبا دی رانی نے سلیمان بادشاہ نُوں دِتے۔ ¹¹ ۱۱۔ حِیرام دے سمندری جہاز اوفیروں سونے لیائے تے اوتھوں اوہ صندل دی لکڑی تے مہنگے منگے نَگ وی لیائے۔ ¹² ۱۲۔ تے بادشاہ نے صندل دی اوس لکڑی نوں خُدادی گھر لئی تے اپنے محل دے تھماں تے موسیقاراں لئی سِتار اں تے بربطاں بنان لئی ورتیا۔ تے اوس دیہاڑے پِچھوں صندل دی اینی لکڑی فیر کدی نہ لائی گئی تے نہ ویکھالی دِتی۔ ¹³ ۱۳۔ تے سلیمان بادشاہ نے سبا دی رانی اوہ سب کُجھ دِتا جیہڑا اوہنے چاہیا تے منگیا تے ایہہ اوہدے علاوہ سی جیہڑا اوہنے اپنی شاہانہ فیاضی نال اوہنوں دِتا سی۔ فیر اوہ اپنے نوکراں چاکراں دے نال اپنے دیس پَرت گئی۔ ¹⁴ ۱۴۔ جیہڑا سونا سلیمان نُوں ہر ورّے مِلدا سی اوہدا بھار چھ سو چھیاٹھ قِنطاراں سی۔ ¹⁵ ۱۵۔ پَر اوہدے چہ اوہ سونا نئیں سی جیہڑا اوہ سوداگراں تے بیو پاریاں کولوں چُنگی دے طور تے تے عرب دے کُل بادشاہواں تے دیس دے صوبے داراں کولوں مالیے دے طور تے وصول ہوندا سی۔ ¹⁶ ۱۶۔ تے سلیمان بادشاہ نے سونا گھڑ دو سَو وڈیاں ڈھالاں بنایاں تے ہر ڈھال وِچّ چھ سو مِثقالاں سونا لَگّا۔ ¹⁷ ۱۷۔ تے اوہنے گھڑے ہوے سونے دیاں تِن سو نِکیاں ڈھالاں وی بنایاں تے ہر ڈھال وِچّ ڈیڑھ سیر سونا لَگّا۔ تے بادشاہ نے اوہناں نوں لُبنان دے جنگل والے محل وِچّ دھریا۔ ¹⁸ ۱۸۔ فیر بادشاہ نے ہاتھی دَند دا اِک وڈا تخت بنایا جِدے وِچّ پاسے دے سونے نال پچکاری کیِتا ہویا سی۔ ¹⁹ ۱۹۔ تے اوس تخت دیاں چھ پوڑیاں سَن تے اوہدے پچھلا حصّہ اُتوں گول سی تے بہن والی تھاں دے دوہنواں پاسے ہتھیاں دِیّاں ٹیکاں سَن۔ تے ہر ٹیک دے کول اِک شیر کھلوتا سی۔ ²⁰ ۲۰۔ تے پوڑیاں دے آسے پاسے باراں شیر سَن یعنی چھ اِک پاسے تے چھ دُجّے پاسے۔ کسے ہور بادشاہی وِچّ ایہدے وانگ کُجھ وی نیئں بنایا گیا سی۔ تے سلیمان بادشاہ دے سارے پیالے تے جام سونے دے سَن ۔۔۔ چاندی دا کُجھ وی نیئں سی کیوں جو سلیمان دے دیہاڑیاں وِچّ اوہدی کوئی قدر نیئں سی۔ ^{21 22} ۲۲۔ تے بادشاہ دے کول سمندر وِچّ حِیرام دے جہازاں دے علاوہ بیوپاری جہازاں اِک بحری بیڑا وی سی، جیہڑا ہر ترّجے ورّے سونا ، چاندی ، ہاتھی دند، بندر تے مور لے کے واپس آوندا سی۔ ²³ ۲۳۔ سلیمان بادشاہ نوں دولت تے حکمت دے لحاظ دُنیا دے کُل بادشاہاں تے فوقیت ملی ہوئی سی۔ ²⁴ ۲۴۔ تے کُل دُنیا اوہدے حضُور وِچّ آ کھلون دی تمنا رکھد ی سی تاں جو اوس حِکمت نوں جیہڑی خُدا نے اوہدے دِل چہ پائی سی، سُنے۔ ²⁵ ۲۵۔ لوک ورّے دے ورّے آوندے رہندے سَن تے جیہڑا آوندا کوئی نہ کوئی نذر یعنی چاندی تے سونے دیاں شیواں، لباس، ہتھیار، مسالے، گھوڑے تے خچر نال لے کے آوندا۔ ²⁶ ۲۶۔ سلیمان نے رتھ تے گھوڑے اَکٹھے کیِتے۔ اوہدے کول اِک ہزار چار سو رتھ تے بارہ ہزار گھوڑے سَن جیہڑے اوہنے رتھاں دے شہراں تے یروشلیم وِچّ اپنے کول رکھے۔ ²⁷ ۲۷۔ تے بادشاہ نے چاندی نوں یروشلیم وِچّ اینا عام کر دِتا جِویں پتھر تے کند نوں ایس وادھے نال جِویں پہاڑ دے گھیر وِچّ گُولر دے درخت۔ ²⁸ ۲۸۔ سلیمان دے گھوڑے مصروں تے قوعوں منگائے جاندے سَن ۔شاہی سوداگر اوہناں نوں قوعیوں خریددے سَن ۔ ²⁹ ۲۹۔ اوہ مِصروں اِک رتھ چھ سو مِثقالاں تے اِک گھوڑا اِک سو پنجاہ مِثقالاں چاندی وِچّ خرید کے لے آوندے سَن۔ اوہ اوہناں نوں حِتّیاں تے آرامیاں دے کُل بادشاہاں نوں وی گھل دے ہوندے سَن۔