¹ ۱۔ سلیمان نے بنی اسرائیل دے مصروں نکلن دے، چار سو اَسی ویں ورّے تے اِسرائیل وِچّ اپنے راجّ دے چَوتھے ورّے زِیو دے مہینے وِچّ جیہڑا سال دا دُجّا مہینہ اے، خُداوند دی ہیکل نُوں بنانا شُروع کیتا۔ ² ۲۔ تے جیہڑا گھر سلیمان بادشاہ نے خُداوند لئی بنایا اوہ سَٹھ ہتھ لما، ویہ ہتھ چوڑا تے تَری ہتھ اُچّا سی۔ ³ ۳۔ تے اوس گھر دے وڈّے کمرے دے اَگے برانڈا بنوایا جس کر کے اوس گھر دی چوڑائی ویہ ہتھ ہور ودھ گئی۔ تے اوہ ہیکل دے اگلے حصّے توں دَس ہتھ باہر نِکلیا ہویا سی۔ ⁴ ۴۔ اوہنے اوس گھر وِچّ جالی والیاں باریّاں وی لوایاں۔ ⁵ ۵۔ تے وڈے کمرے تے اندر لے مَقدِ س دیّاں سامنیاں کندھاں تے عمارت دے آل دوالے ، اِک تِن منزلہ ڈھانچہ وی کھلاریا جہدی کچھے ہُجرے سن۔ ⁶ ۶۔ سَب توں ہیٹھلی منزل پنج ہتھ، وچلی چھ ہتھ تے تیجی سَت ہتھ چوڑی سی۔ اوہنے گھر دی کندھ دے آل دوالے باہر لے پاسےٹیکاں بنایاں تاں جو چھہتیراں لئی گھر دیّا ں کندھاں وِچّ مورھےنہ کڈھنے پین۔ ⁷ ۷۔ ہیکل نُوں بنان لئی بس اوہ ہو ٹُکڑے ورّتے گئے جیہڑے کاناں چُوں کَڈدے ویلے گھڑے گئے تے جد اوہ گھر بنایا جا رہیا سی تے اوتھے ہتھوڑے ، چھینی یا لوہے دے کِسے رَچھ دی آواز نہ سُنیچی۔ ⁸ ۸۔ ساریاں توں ہٹھلی منزل دا بُوہا گھر دے دکھن وَل سی تے اِک پوڑھی وَچلی منزل تک تے اوتھوں تِجی منزل تک جاندی سی۔ ⁹ ۹۔ سو اوہنے ہیکل بنائی تے دیودار دے چھہیتیر تے تختیَا ں دا چھت پا کے پُوریاں کِیتا۔ ¹⁰ ۱۰۔ اوہنے ساری ہیکل دے نال نال حُجر ے بنائے جِنہاں چوں ہر اِک دی اُچایائی پنج پنج ہتھ سی تے اوہ دیودار دے چھہیتیراں دے نال ہیکل نال جُٹر ے ہوے سَن۔ ¹¹ ۱۱۔ تے سلیمان تے خُدا دا کلام اُتریا پئی ¹² ۱۲۔ جیہڑی ہیکل تُوں بنا رہیا ایں اودھے بارے اینج اے پئی جَّے تُوں میرے فرماناں تے عمل کریں تے میرے قائدہ قانون مَنیں تے میں اپنا اوہ وعدہ جیہڑا میں تیرے پئو داود نال کیتا سی پُورا کراں گا۔ ¹³ ۱۳۔ تے میں اِسرایئلیاں دے وِچّ سکونت کراں گا تے اپنی اُمت اِسرائیل نوںنہ چھڈاں گا۔ ¹⁴ ۱۴۔ فیر سلیمان نے ہیکل نوں بنایا تے پُورا کیتا۔ ¹⁵ ۱۵۔ تے اوہنے اوہدیاں وچِلّیاں کندھاں تے دیودار دے تختے لائے تے ہیکل دے بھنویں تو لے کے چھت تیک تختیاں نوں گَولیاں نال سجا دِتّا تے ہیکل دے فرش نُوں صنوبر دے تختیاں نال کَجّ دِتّا۔ ¹⁶ ۱۶۔ تے ہیکل دے وِچلّے حصّے وِچّ اِک مقدِس یعنی بوہت ہی پاک تھاں بنان لئی اوہنے ہیکل دے پچھے ویہ ہتھ حصے نوں بھنویں توں لے کے چھت تک دیودار دے تختے لاکے گھیر لیا۔ ¹⁷ ۱۷۔ اوس کمرے دے سامنے وڈّا کمر ا چالی ہتھ لما سی۔ ¹⁸ ۱۸۔ اوہ ہیکل اندروں دیودار نال سَجی ہوئی سی جَہدے تے لاٹُو تے کِھڑے پُھل کڈھے ہوئے سَن۔ سارا کُجھ دیودار دا ہی بنیا ہویا سی تے ہیکل دے وِچّ کندھاں دا کوئی پتھر وکھالی نیئں سی دیندا۔ ¹⁹ ۱۹۔ اوتھے خُدا دے عہد دے صندُوق نُوں رکھن لئی اوہنے ہیکل دے وِچّ ہی اوہ مَقدِس بنایا جیہڑا ہیکل دا سبھ توں پاک تھاں سی۔ ²⁰ ۲۰۔ ایہہ سبھ توں پاک تھاں ویہ ہتھ لمی ، ویہ ہتھ چَوڑی تے ویہ ہتھ اُچّی سی ۔ سلیمان نے اوہنوں پاسے دے سونے نال مَڑہیا۔ ²¹ ۲۱۔ اوہنے ہیکل نُوں اندر لے پاسیوں پاسے دے سونے نال مَڑہیا تے وِچّلے سبھ توں پاک تھا ں دے سامنے جیہڑا سونےنال مَڑہیا سی، سونے دیّاں سنگلیاں تان دِتّیاں ²² ۲۲۔ سو اوس نے نہ بس ہیکل نُوں اندرلے پاسیوں سونے نوں مَڑہیا سَگھوں اندر لے سبھ توں پاک تھاں دے مذبح نوں وی سونے نال مَڑھ دِتّا۔ ²³ ۲۳۔ تے وِچّلے مقدِس وِچّ اوہنے زیتون دی لکڑ دے دو کروبی بنائے جہیڑے دَس دَس ہتھ اُچّے سَن ۔ ²⁴ ۲۴۔ پہلے کروبی دا اِک کنبھ یعنی بانہہ پنج ہتھ تے دُجاّ وی پنج ہتھ لما سی یعنی اِک بانہہ دے سرے توں دُجی بانہہ دے سرے تیک دَس ہتھ سی ، ²⁵ ۲۵۔ اینج ہی دُجّے کروبی دیّاں بانہواں وی دَس ہتھ لمیاں سَن کیوں جو دونہویں کروبی قد بت دے حساب ناں اِکّو جِڈّے سَن ۔ ²⁶ ۲۶۔ تے ہر کروبی دی اُچایائی دَس ہتھ سی ۔ ²⁷ ۲۷۔ اوہنے دونہاں ہیکل دے اُکّا وِچّلے کمرے وِچّ رکھیا تے اوہنا ں دیّاں بانہواں پھیلیاں ہویّاں سَن، اِک کروبی دی بانہہ اِک کندھ نوں چُھوندی سی جد کے دُوجے کروبی دی بانہہ دُوجی کندھ نوں چُھوندی سی تے اوہناں دے کھمب کمرے دے وِچّکار اِک دُوجے نال مِلے ہووے سن۔ ²⁸ ۲۸۔ تے اوہنے کروبیا ں تے سونا مَڑہیا۔ ²⁹ ۲۹۔ تے ہیکل دے آل دوالے کندھا تے ، وِچّلے تے باہر لے دونہواں کمریاں وِچّ ، اوہنےکروبی کَجھُور دے رُکھ تے کھِیڑے ہووے پُھل کَڈھائے۔ ³⁰ ۳۰۔ تے اوہنے ہیکل دے وِچلے تے باہرلے دونہواں کمریاں دے فرش تے وی سونا مَڑہیا۔ ³¹ ۳۱۔ تے وِچلے مقدِس وِچّ وڑن لئی اوہنے زیتون دی لکڑی دے بُوہے بنواے جنہاں دیّاں ہتھیاں پنج گُوٹھاں والیاں سَن۔ ³² ۳۲۔ تے زیتون دے دو نہواں بُوہیاں اُتے اوہنے کروبی، کجھور دے رُکھ تے کِھڑے ہوئے پُھل کِڈھے تے کروبیاں تے کجھور دے رُکھاں اُتے سونا مَڑہیا۔ ³³ ۳۳۔ اینج اوہنے وڈّے کمرے دے بوہے لئے زیتون دی لکڑی دیّاں چُگاٹھاں بَنا ئیاں۔ ³⁴ ۳۴۔ اوہنے صنوبر دی لکڑی دے دو بوہے وی بنائے جِہناں وِچّوں ہر اِک دے دو تاک سَن جہیڑے اپنے دُھرّیاں تے دوہرے ہو جاندے سَن۔ ³⁵ ۳۵۔ اوہنے اوہدے تے کروبی کجھور دے رُکھ تے کِھڑے ہووے پُھل کَڈھے تے اوہناں تے سونے دے ورق چاڑھ دِتّے ۔ ³⁶ ۳۶۔ اوہنے اندر لے وہڑے دے تِن ردّے کَھڑے ہوے پتھراں دے دھرےتے اِک ردھا رَندا پھری ہوئی دیودار دی لکڑ ی دے چھہتیراں دادھریا۔ ³⁷ ۳۷۔ خُدا دی ہیکل دی نیہ چَوتھے ورّے دے زِیو مہینے وِچّ دھری گئی۔ ³⁸ ۳۸۔ تے گیارہویں ورّے دے بُول مہینے ، جیہڑا اَٹھواںمہنیہ ایں وِچّ اپنے کُل حصّیاں سَنےنقشے دے حِساب نال بَن کے تیار ہو گئی۔ اوہنے بَنان لئی سلیمان سَت ورّے لگے۔