¹ ۱۔ جد صُور دے بادشاہ حِیرام نے سُنیاپئی اپنے پئو داود دے تھاں بادشاہ مسح کر دِتّا گیا اے تے اوہنے سلیمان دے کول اپنے ایلچی گھلے کیوں جو داود نال اوہدا تعلق سدا بیلیاں جیہا رہیاسی۔ ² ۲۔ سلیمان نے حِیرام کول ایہہ سَنیہہ واپس گھلیا: ³ ۳۔ تُوں جاننا ایں پئی میرا پئو اوہنا ں جنگی مہمِاں دے بھاروں جیہڑیاں آسے پاسے دے دیسا ں نے اوہدے خلاف چھیڑیاں ہویّاں سَن، خُداوند اپنے ربّ دے ناں لئی اِک ہیکل نہ بنا سکیا جد تیک کے رَبّ خُداوند نے اوہدے کُل ویریاں نُوں اوہدے پیراں ہیٹھ نہ کر دِتّا۔ ⁴ ۴۔ تے ہُن رَبّ میرے خُداوند نے میرے چَوّاں پاسے بڑا اَمن بخشیا اے۔ نہ کوئی ویری اے تے نہ وبہ۔ ⁵ ۵۔ سو جیویں رَبّ نے میرے پئو دادے نوں دسَیّا سی پئی تیرا پُتر جنہوں میں تیرے تخت تے بہاواں گا، میرے ناں دے لئی ہیکل بناوے گا۔ میرا ِرادہ اے پئی میں رَبّ اپنے خُداوند لئی اِک ہیکل بناواں ۔ ⁶ ۶۔ ایس لئے حُکم کر پئی لُبنان وِچّوں میرے لئی دیودار دے رُکھ وڈّھے جان۔ میرے بندے تیرے بندیاں نال رَل مِل کم کرن گے تے جنّی مزدُوری تُوں مِتھیں گا میں تیرے بندیاں نوں دیّاں گا۔ تُوں تے جاننا ہی ایں پئی ساڈھے وِچّ اجیہا کوئی نہیں جیہڑا لکڑی وڈّن دا صَیدانیاں جیہا کاریگر ہووے۔ ⁷ ۷۔ جد حیرام نے سلیمان د ا سنہہ سُنیا تے اوہ بڑا خُوش ہویا تے اوہنے آکھیا پئی اَج رَبّ دی وڈھائی ہووے پئی اوہنوں ایس وڈّی قوم تے راج کرن لئی اِک دانا پُتر بخشیا اے۔ ⁸ ۸۔ سو حِیرام نے سلیمان نوں اَکھوا گھلیا پئی جیہڑا سُنہہ تُوں مینوں گھلیا سی، مینوں مِل گیا اے تے دیودار تے صنوبر دی لکڑی دین لئی جو تُوں چاہنا ایں سو میں کراں گا۔ ⁹ ۹۔ میرے بندے اوہناں چھہتیراں نُوں سمندر تک لیجان گے تے فیر اوہناں دے گٹھے سمندر وِچّ تار کے تیری مِتّھی ہوئی تھاں تے اَپڑا دین گے۔ اوتھے گٹھے کُھلوا کے چھہتیراں نُوں وکھو وکھ کِیتا جاوے گا۔ فیر تُوں اوہناں نُوں کَھڑ سکیں گا تے میں بس اینا کُو چاہنا پئی تُوں میرے ٹبّر لئی سامان اَپڑاندا رہویں ۔ ¹⁰ ۱۰۔ اینج حَیرام وَلوں سلیمان نُوں دیودار تے صنوبر دے چھہتیر اَپڑائے جاندے رہے ۔ ¹¹ ۱۱۔ تے سلیمان نے حِیرام نُوں ویہ ہزار کورے کنّک تے ویہ ہزار بَت زیتون دا تیل سامان وِچّ دِتّا۔ سلیمان وَلوں حَیرام نُوں ایہہ سامان ورّے دے ورّے اَپڑ دا رہیا۔ ¹² ۱۲۔ تے خُدا وند نے اپنے وعدے دے مُطابق سلیمان نُوں دانائی بخشی تے حِیرام تے سلیمان دے وِچّ بیلیاں جیہا رشتہ بنّیا رہیا کیوں جو اوہناں دونواں نے صُلح دا سانجھا معاہدہ کِیتا ہویا سی۔ ¹³ ۱۳۔ فیر سلیمان نے کُل اسرائیل وِچّوں تَری ہزار کامّے وانگارے تے بھرتی کیتے۔ ¹⁴ ۱۴۔ اوہناں وِچّوں ہر مہینے دَس ہزار دا اِک جتھا لُبنان گھلیا جاندا سی۔ اینج جتھے دے دکُل بندے اِک مہینہ لُبنان تے دو مہینے گھر رہندے سَن تے ادُونِیرام اوہناں مزدُوراں دا راکھا سی۔ ¹⁵ ۱۵۔ تے سلیمان دے کول پہاڑاں وِچّ بھار چُکن والے ستّر ہزار تے اَسی ہزار پتھر کٹن والے سَن ۔ ¹⁶ ۱۶۔ اوہناں دے علاوہ تیتی سو عہدیدار وی سَن جیہڑے کَمّ دا دھیان رکھدے سَن تے کامیّاں نُوں کم دیندے سَن ۔ ¹⁷ ۱۷۔ بادشاہ دے حُکم دے مُطابق اوہناں ہیکل دی نیہ لئی مہنگے پتھر کاناں وچّوں کٹھ کے لے آئے ۔ ¹⁸ ۱۸۔ تے سلیمان تے حَیرام دے کاریگراں، راج گیراں تے پہاڑی لوکاں نیں لکڑی تے پتھر نوں وڈھ ٹُک کے ہیکل بنان لئی تیار کر دِتّا۔