1
۱۔ ایلیاہ تِشبی نے جیہڑا جلعاد دے پناہ گُزیناں وِچوں سی ، اخی اب نوں آکھیا پئی خُداوند اِسرائیل جیوندے ربّ دی سونہہ جہدی میں بندگی کرنا ہاں ، اگلے کُجھ ورّیاں وِچّ نہ تریل پوئے گی ، نہ مینہ پوئے گا، اگلے کُجھ ورّیاں وِچ نہ تریل پوے گی ، نہ مینہ پوئے گا، جد تک میں نہ آکھاں ۔
2
۲۔ تد خُدا دا ایلیاہ تے ایہہ کلام اُتریا پئی
3
۳۔ ایتھوں ٹُر جا تے چڑھدی لامے ول مُنہ کر لے تے یردن دی چڑھدی لامے کریت دے نال کول جا کے لُک جا۔
4
۴۔ تُوں اوسے نالے وِچوں پانی پیویں تے میں کاواں نوں حُکم دِتا اے پئی اوہ اوتھے تینوں روٹی اپڑان ۔
5
۵۔ سو اوہنے اوہ ہو کیتا جو ربّ نے فرمایا سی ۔ اوہ یردن دی چڑھدے لامے کرِیت دے نالے کول گیا تے اوتھے ہی رہن لگ پیا۔
6
۶۔ تے کاں اوہدے لئی شام سویلے روٹی تے گوشت لَے آندے سَن تے اوہ اوس نالے وِچوں پانی پیندا ہوندا سی۔
7
۷۔ کُجھ دیر پِچھوں مینہ نہ پین دےسببوں نالہ سُکھ گیا۔
8
۸۔ تد خُدا دا کلام اوہدے تے اُتریا۔
9
۹۔ پئی فٹافٹ اُٹھ کے صَیدا دے صارپت نوں ٹُر جا تے اوتھے ہی رہ۔ تے میں اوہتھوں دی اِک رنڈی نوں کیتا اےپئی اوہ تینوں روٹی کھواوے کرے ۔
10
۱۰۔ سو اوہ صارپت ٹُر گیا تے جدوں اوہ قصبے دے پھاٹک تے اَپڑیا تے اوتھے اِک رنڈی لکڑاں جُگدی پئی سی ۔ اوہنے اوہنوں سدیا تے آکھیا پئی کیہ تُوں کِسے پانڈے وِچّ تُونبہ کُو پانی لے آینگی تاں جو میں پیاں ؟
11
۱۱۔ تے جد اوہ پانی لین چلی تے اوہنے پُکار کے آکھیا پئی مہربانی کر کے میرے لئی روٹی دی بُرکی وی لیندی آویں ۔
12
۱۲۔ اوس زنانی نے آکھیا خُداوند تیرے رَب دی حیاتی دی سونہہ میرے کول روٹی اُکا کوئی نئیں۔ اِک مٹکے وِچّ مُٹھ کوُ آٹا اے تے اِک کُپی وِچ ماسا کُو تیل اے۔ میں تھوڑیاں جیہاں لکڑاں جگنی ہاں پئی تاں جو اوہناں نوں گھر لے جاواں تے اپنے لئی تے اپنے پُترلئی روٹی پکاواں تاں جو اسیں اونوں کھایئے تے فیر مر جائیے۔
13
۱۳۔ ایلیاہ نے اوہنوں کہیا ، نہ ڈر۔ گھر چلی جا تےجنج تُوں آکھیا اے اینج ہی کر۔ پَر جو کُجھ تیرے کول اے اوہدے وِچوں اِک نکی جیہی گُلی پکا کے میرے لئی لےآ تے فیر اپنے لئی تے اپنے پُتر لئی پکا لئیں۔
14
۱۴۔ کیوں جو خُداوند اِسرائیل دا رَب اینج فرماندا اےپئی جیس دِن تک خُدا دھرتی تے مینہ نہ برساے نہ مٹکے وِچوں آٹا مُکے گا تے نہ ہی کُپی چوں تیل مُکے گا۔
15
۱۵۔ سو اوہ گئی تے اوہنے اوہ ہو کیتا جیہڑا ایلیاہ نے اوہنوں آکھیا سی۔ سو اوتھے ہر روز ایلیاہ لئی تے اوس زنانی تے اوہدے ٹبر لئی خوراک موجود رہندی سی۔
16
۱۶۔ کیوں جو خُداوند دے اوس کلام دے مُطابق جیہڑا اوہنے ایلیاہ دے راہیں فرمایا سی ، نہ تے مٹکے وِچوں آٹا مُکیا تے نہ ہی کُپی وچوں تیل گٹھیا۔
17
۱۷۔ کُجھ عرصے بعد اوس زنانی دا پُتر جیہڑی اوس گھر دی مالکن سی بیمار پے گیا تے اوہدا روگ ودھدا گیا تے آخر نوں اوہدا دم نکل گیا۔
18
۱۸۔ تد اوس زنانی نے ایلیاہ نوں آکھیا پئی ربّ دیاں بندیا میں تری کیہ وگاڑیا اےپئی تُوں مینوں میرے گُناہ یاد کران تے میرا پُتر مارن لئی آگیا ایں؟
19
۱۹۔ ایلیاہ نے اوہنوں آکھیا پئی اپنا پُتر مینوں دے دے تے اوہ اوہنوں اوہدی چھولی چوں لے کے اُتلی کوٹھی وِچّ جِتھے اوہ رہندا سی، لے گیا تے اوہنے اپنے منجے تے لٹا دِتا۔
20
۲۰۔ تد اوہنے خُداوند توں فریاد کیتی پئی یا رباّ میرے ربا، کیہ توں ایس رنڈی تے وی جِدہے وَل میں ٹکیا ہویاں ، اوہدے دِل دا ٹوٹا کھو کے بلا نازل کر دتی آ؟
21
۲۱۔ تے اوہنے اپنے آپ نوں تِن وار اوس مُنڈے تے پسار کے ربّ توں فریاد کیتی ، یا ربا میریاں ربا ، ایس مُنڈے دی جان اوہدےکلبوت وِچّ واپس گھل دے۔
22
۲۲۔ تے ربّ خُداوند نے ایلیاہ دی فریاد سُنی تے اوس مُنڈے دی جان اوہدے وچّ واپس آگئی تے اوہ زندہ ہوگیا۔
23
۲۳۔ فیر ایلیاہ اوس مُنڈے نوں چُک کے اُتلی کوٹھی تلے گھر وِچ لے گیا تے اوہنوں اوہدی ماں دے سپرد کرکے آکھیا ، ویکھ تیرا پُتر جیوندا اے۔
24
۲۴۔ تد اوس زنانی نے ایلیاہ نوں آکھیاپئی ہن جان گئی ہاں پئی تُوں رب دا بندہ ایں تےربّ دا جیہڑا کلام تیرے منہ وِچ اہئے سچا اے۔