¹ ۱۔ تے رحُبعام سکِم ول ٹُر گیا کیوں جو کُل اسرائیلی اوہنوں بادشاہ بنان لئی اوتھے اَپڑے ہوئے سَن ۔ ² ۲۔ جد نِباط تے پُتر یُربعام نے ایہہ سُنیا(اوہ اجہیے تیک مصر وِچّ سی جتھے اوہ سلیمان توں پناہ لین لئی نس گیا سی) تے اوہ مصروں واپس آیا۔ ³ ۳۔ سواوہناں نے یربُعام نوں سدیا تے اوہ اَسرائیل دی ساری جماعت دے نال رحُبعام کول گئے تے اوہنوں آکھیا پئی ⁴ ۴۔ تیرے پئو نے ساڈے تے بھارا جُولا دھر دِتا سی۔ پر ہُن تُوں اوس ڈاڈی سیوا دے بھار تے بھارا جُولا جیہڑا اوہنے ساڈے اُتے دھریا ہویا سی ، ہولا کردے تے اسیں تیری سیوا کراں گے۔ ⁵ ۵۔ رحُبعام نے آکھیا پئی تُسی ٹُر جاو تے ترے دیہاڑیاں بعد تُسی فیر میرے کول آیا جے۔ سو لوکی ٹُر گئے۔ ⁶ ۶۔ فیر رحُبعام بادشاہ نے اوہناں وڈیریاں نال جیہڑے اوہدے پئو سلیمان دی حیاتی وِچ اوہدی سیوا وِچ کھلوتے رہندے سَن ، صلاح کیتی تے اوہناں نُوں پُوچھیا پئی اوہناں لوکاں نوں جواب دین لئی تُسیں مینوں کی صلاح دیندے اوہ ؟ ⁷ ۷۔ اوہناں نے آکھیا پئی جے اَج دے دیہاڑے توں قوم دے سیواک وانگ اوہناں نال سبھہا کریں گا تے اوہناں نوں نرمی نال جواب دیویں گاتو اوہ سدا لئی تیرے گولے بن جان گے۔ ⁸ ۸۔ پر رحُبعام نے اوہناں وڈیریاں دے مشورے نوں نہ مَنیا تے اوہناں جوان مرداں نال صلاح کیتی جیہڑے اوہدے نال جمے پلے سَن تے ہُن اوہدے کامے سَن ۔ ⁹ ۹۔ اوہنے اوہناں نوں پوچھیا پئی تہاڈی کی صلاح اے؟ اسیں ایناں لوکا ں نوں کی جواب دئیے جیہڑا ایہہ آکھدے نیں اوہ جُولا جیہڑا تیرے پئو نے ساڈے تے دھریا، ہولا کردے۔ ¹⁰ ۱۰۔ اوہناں جواناں نے جیہڑے اوہدے نال جمے پلے سَن اوہنوں آکھیا پئی ایناں لوکاں نوں جِنہاں تینوں آکھیا اے پئی تیرے پئو نے ساڈے تے بھارا جُولا (پنجالی ) تھریا پر تُوں ساڈا جُولا (پنجالی) ہولا کر دے، ایہہ دَس پئی میری چیچی میرے پئو دے لک توں وی موٹی اے۔ ¹¹ ۱۱۔ میرے پئو نے تے تہاڈے اُتے بھارا جُولا تھریا پَر میں اوہنوں ہور بھارا کر دیاں گا۔ میرے پئو نے تے تہانوں کوڑیاں دی سزا دِتی پَر میں تہانوں بُچھو لڑان دی سزا دیاں گا۔ ¹² ۱۲۔ تے تِن دِ ن بعد یربُعام تے باقی سارے لوک مُڑ کے رحُبعال کول آئے جویں بادشاہ نے فرمایا سی پئی تِن دیہاڑیاں وِچّ میرے کول واپس آیا جے۔ ¹³ ۱۳۔ تے بادشاہ نے لوکاں نوں ڈاڈا جواب دِتاتے جیہڑی صلاح وڈیریاں دِتی سی اوہ نہ منی۔ ¹⁴ ۱۴۔ اوہنے جواناں دی صلاح من لئی تے آکھیا پئی میرے پئو نے تہاڈا جوا بھارا کیتا ، میں اوہنوں ہور بھارا کراں گا۔ میرے پئو تہانوں کوڑیاں دی سزا دِتی ، میں تہانوں بِچھو لڑا کے سزا دیاں ۔ ¹⁵ ۱۵۔ اینج بادشاہ نے لوکاں دی گل نہ سُنی کیوں جے اے سب کُجھ خُدا ولوں ہو ریا سی تاں جو اوہ اپنی گل جیہڑی اوہنے اخیاہ سَلونی دے راہیں نِباط دے پُتر یربُعام نوں آکھی سی ، پوری کرے۔ ¹⁶ ۱۶۔ تے جد کُل اسرائیل نے ویکھیا پئی بادشاہ نے اوہناں دی نہ سُنی تے اوہناں بادشاہ نوں آکھیا پئی: داود وِچّ ساڈا کی حصہ اے تے یسّی دے پُتر وِچّ کی حصہ اے؟ اے اِسرائیل ! اپنیاں جُھگیاں نوں ٹُر جاو! تے اے داود تُوں اپنا گھر سانبھ! سو اِسرائیلی گھرو گھری ٹُر گئے۔ ¹⁷ ۱۷۔ پر یہوداہ دے قصبیاں وِچّ رہن والے اِسرا ئیلیاں تے رحُبعام فیر وی راج کردا رہیا۔ ¹⁸ ۱۸۔ فیر رحُبعام بادشاہ نے ادورام نوں گھلیا جیہڑا وگاریاں دا آگو سی پر کُل اِسرائیل نے اوہنوں سنگسار کرکے جانوں مار دِتا تے رحُبعام بادشاہ چھیتی چھیتی اپنے رتھ تے چڑھ گیا تے بچ بچا کے یروشلیم ول نس گیا۔ ¹⁹ ۱۹۔ سو اِسرائیل ، داود دے ٹبر توں باغی ہو گیا تے اَج تک اے۔ ²⁰ ۲۰۔ جد اسرائیل نے سُنیا پئی یربعام مُڑ آیا اےتے اوہنوں اَکٹھ وِچّ سدیا تے کُل اسرائیل دا بادشاہ بنایا۔ بس یہوداہ دا قبیلہ ہی داود دے ٹبر دا وفادار رہیا۔ ²¹ ۲۱۔ جدوں رحبُعام یروشلیم اَپڑیا تے اوہنے یہوداہ دے کُل ٹبر تے بِن یمین دے قبیلے دے اِک لکھ اَسی ہزار جنگی مرد اکٹھے کیتے تاں جو اسرائیل دے ٹبر نال جنگ کرکے سلیمان دے پُتر رحُبعام لئی بادشاہی فیر لے لئی جا وے۔ ²² ۲۲۔ پَر خُدا دے بندے سمعیاہ کول ایہہ سنیہا آیا ²³ ۲۳۔ پئی یہوداہ دے بادشاہ سلیمان دے پُتر رحُبعام نوں تے یہوداہ تے نِنیمین دے کُل ٹبر نوں تے دُجے لوکاں نوں یہہ آکھ پئی ²⁴ ۲۴۔ خُداوند اینج فرماندا اے پئی اپنے اسرائیلی بھراواں نال لڑن لئی لشکر نہ بناو سوگھوں تہاڈے وِچّوں ہر کوئی گھروگری ٹُر جاوئے کیوں جو ایہہ میرا بندوبست اے۔ جِویں خُدا نے حُکم دِتا سی اوہناں خُدا دا حُکم من لیاتے گھروگھری ٹُر گئے ۔ ²⁵ ۲۵۔ فیر یربُعام نے افرائیم دے پہاڑی علاقے وِچّ سِکم نوں قلعہ بند کیتا تے اوتھے رہن لگا تے اوتھوں باہر جاکے اوہنے فنوایل نوں اوساریا۔ ²⁶ ۲۶۔ تے یربُعام نے اپنے دِل وِچّ آکھیا پئی اینج لگدا اے بادشاہی فیر داود دے ٹبر کول ٹُر جائے گی۔ ²⁷ ۲۷۔ جے اے لوکی یروشلیم وِچ خُدا دے گھر وِچّ قربانی چڑھان جان کرن گے تے اوہناں دے دِل فیر اپنے مالک رحُبعام وَل ، یہوداہ دے بادشاہ دا حُکم من لئی تیا ر ہو جان گے۔ اوہ مینوں قتل کردین گے تے رحُبعام بادشاہ وَل ٹُر جان گے۔ ²⁸ ۲۸۔ ایس لئی بادشاہ نے صلاح لین دے بعد سونے دے وچھے بنائے تے لوکاں نوں آکھیا پئی تہاڈے لئی یروشلیم جانا اوکھا اے۔ اے اسرائیل ، تیرے دیوتے جیہڑے تینوں مصروں کڈھ لے آئے اے ہو ہی نیں ۔ ²⁹ ۲۹۔ تے اِک نوں اوہنوں بَیت ایل وِچّ گَڈیا تے دُجے نوں دان وِچّ ۔ ³⁰ ۳۰۔ تے ایہہ گل گناہ دا سبب بن گئی کیوں جو ایس وچھے نوں پُوجن لئی دان جیہی دُور دُراڈی تھاں تے وی جان لگ پئےجِتھے اوہ بُت گڈیا گیا سی ۔ ³¹ ۳۱۔ تے یربُعام نے اُچے تھاواں تے مندر اُسارے تے جیہڑے لوک لاوی دے نسل وِچوں نیئں سَن اوہناں وِچوں کاہن بھرتی کیتی۔ ³² ۳۲۔ تے اوہنے اَٹھویں مہینے دی پندرہ تاریخ نوں اِک عید شروع کر دِتی جنج دی عید یہوداہ وِچّ منائی جاندی سی تے مذبحے تے جیہڑاں اوہنے بیت ایل وِچ اُساریا سی، دونواں بچھڑیاں لئی جیہڑے اوہنے بنائے سَن، قُربانیاں چڑھایاں۔ تے بیت ایلؔ وِچ اُچیاں تھاواں لئی جیہڑیاں اوہنے بنایاں سَن کاہن بَھرتی کیتے۔ ³³ ۳۳۔ تے اَٹھویں مہیںے دے پندرھیوں دیہاڑے جیہڑا مہینہ اوہنے آپ معیّن کِتیاسی اوہ بیت ایلؔ دے مذبحے اُتے جیہڑا اوہنے بنایا سی چڑھیا۔ تےاوہنے اسرائیلیاں لئی عید مَتھ دِتی تے بخور پخان لئی مذبح دے کول چلا گیا۔