¹ ۱۔حیاتی دے کلام بارے جیہڑا شُروع توں سی جِنھوں اَساں سُنیا اَتے جِنھوں اَساں اپنِیاں اَکھاں نال ویکھیا تے اپنے ہتھاں نال ٹویا۔ ² ۲۔(کیوں جو حیاتی وَکھالی دِتّی اَتے اَساں اوہنوں ویکھیا اَتے اَسیں گواہی دینے آں اَتے تُہاڈے تِیک اوس سَدا دی حیاتی دی خبَر اَپڑانے آں جیہڑی باپ کول سی اَتے ساڈے اُتے ظاہِر ہوئی)۔ ³ ۳۔ جو کُجھ اَساں ویکھیا اَتے سُنیا اے تُہاڈے تِیک وی اوہدی خَبَر اَپڑانے آں تاں جو تُسی وی اَساڈے نال سَنگت رَکھو اَتے اَساڈی سَنگَت باپ اَتے اوہدے پُتر یِسُوع مسِیحؔ دے نال اے۔ ⁴ ۴۔ اَتے اَسیں ایہ گَلاں ایس ماریاں لکھنےآں تاں جو اَساڈی خُوشی توڑ اَپڑ جاوے۔ ⁵ ۵۔جیہڑا سُنہیا اَساں اوہدے توں سُنیا اَتے فیر تُہاڈے تِیک اَپڑانے آں اوہ ایہو ای ایہ پئی رَب چانن اے اَتے اوہدے وِچ اُکا ہنیرےنئیں۔ ⁶ ۶۔ جے اَسیں آکھیِئیے پئی اَسیں اوہدے نال سَنگت رَکھنے آں پر ہنیرے وِچ ٹُریئے تے جُھوٹھے آں اَتے حَق اُتے عَمَل نئیں کر دے۔ ⁷ ۷۔ پر جے اَسیں چانن وِچ ٹُرئیےجِیویں اوہ چانن وِچ اے تے اَسیں آپو وِچ سَنگَت رَکھنے آں اَتے اوہدے پُتر یِسوعؔ دی رَت اَساہنوں ہر پاپ توں پَوِتّر کر دی اے۔ ⁸ ۸۔ جے اَسیں آکھیِئیے پئی اَسیں پاپی نئیں تے اپنے آپ نُوں دھوکا دینے آں اَتے اَساڈے وِچ سچیائی نئیں۔ ⁹ ۹۔ جے اَسیں اپنے پاپاں نُوں مَن لَئے تے اوہ اَساڈے پاپ بخشن اَتے اَساہنوں ساری ناراستی توں پاک کرن اُتے قادِر اے۔ ¹⁰ ۱۰۔ جے اَسیں آکھیِئیے پئی اَساں پاپ نئیں گَھٹیاتے اوہنوں جُھوٹھا کرنے آں اَتے اوہدا کلام اَساڈے وِچ نئیں۔