1
۱۔ایہ خَط پولُس اَن تِیمُتھِیُس ری طرف خاں ہے جکو مسیح یسوع را غُلام ہے۔ ایہ خَط فِلپی شہر رے خارے وشواسیاں، شیواداراں اَن خن٘بھاݪݨ آݪاں رے ناں ہے جکو مسیح یسوع میں ہے۔
2
۲۔اَپݨے ٻاپ اِیشوَر اَن پربھُو یسوع مسیح ری کِرپا تھاں ماتھے ہووے اَن او تھاں نا خُکھا راکھے۔
3
۳۔ہُوں جَݙے وی تھاں نا یاد کرئیں، تو آپرے اِیشوَر رو شُکر کرئیں۔
4
۴۔اَن ہُوں جَݙے وی تھاں خارُو پراتھنا کرئیں، تو ہمیشہ خُوشی خاں تھاں خاراں رے خارُو مِنتھ کرئیں ۔
5
۵۔کیان٘کے تھے شرُوع خاں لے اَن آج تک خُوشی ری خبر رو پرچار کرݨ میں مھاں بھیݪا رہیا ہو۔
6
۶۔مھناں یقین ہے کہ اِیشوَر جکے تھاں میں ایہ بھَلو کام شرُوع کریو ہے، اِیئے نا او یسوع مسیح رے بھَݪے آوݨ تک پُورو کر ݙیخے۔
7
۷۔ایہ بھَلی بات ہے کہ ہُوں تھاں خاراں رے بارے میں اِیئاں خوچاں کیان٘کے تھے مھارے مَن میں رہئی۔ جَݙے ہُوں ڈھَکیجیو جاں جَݙے ہُوں اِیشوَر ری خُوشی ری خبر نا خَچ ثابت کرتو وو اَن مُخالفاں نا جواب ݙیوتو وو، تو تھے وی اِیشوَر ری کِرپا میں مھیں بھیݪا شامل ہَتا۔
8
۸۔اِیشوَر مھارو گواہ ہے کہ جاں مسیح یسوع نا تھاں خاں پریم ہے، اِیئاں ہُوں وی تھاں نا خہٹݨ رے خارُو گھݨو خِکئیں۔
9
۹۔مھاری پراتھنا ہے کہ تھے گیان اَن ہر طرح ری خَمجھ خاں پریم میں گھݨے خاں گھݨا بَدھتا جاؤ۔
10
۱۰۔جکے خاں تھے ضروری باتاں نا خَمجھ خَگو اَن مسیح رے بھَݪے آوݨ رے ݙن تک صاف دل رہو اَن تھاں تے کوئی اِلزام نی آوے۔
11
۱۱۔اِیئاں تھے نیکی رے پھل خاں بھریا رہو جکو مسیح یسوع رے وسیلے خاں لابھئی کہ اِیشوَر ری بَݙائی ظاہر ہووے اَن اُوئے ری تعریف ہووے۔
12
۱۲۔اَے وشواسی بھائیاں، ہُوں چاہوئیں کہ تھاں نا ٹھاء لاگ جاوے کہ جکو مھیں تے گُزری ہے، اُوئے ری وجہ خاں خُوشی ری خبر ٻِجی وی گھݨی بَدھ گی۔
13
۱۳۔اِتری تک کہ بادشاہی پلٹَݨ رے خارے خِپائیاں اَن باقی خارے مِنکھاں میں ایہ مشہور ہو گیو کہ ہُوں مسیح رو پرچار کرݨ ری وجہ خاں قید ہاں۔
14
۱۴۔مھارے ڈھَکیجݨ ری وجہ خاں گھݨے وشواسیاں رو پربھُو تے وشواس پَکو ہویو رو اَن اُوئاں میں ٻِجی گھݨی ہمت آئی ری، اِیئے خارُو او دلیری خاں اِیشوَر رو پرچار کرئی وا۔
15
۱۵۔بھَلائیں اُوئاں مئیں خاں کئیں تو حِدخے اَن مُخالفت ری وجہ خاں مسیح رو پرچار کرئی، پݨ ٻِجاں ری نیت بھَلی ہے۔
16
۱۶۔جکو بھَلی نیت خاں پرچار کرئی، او مھیں خاں پریم راکھئی کیان٘کے اُوئاں نا ٹھاء ہے کہ اِیشوَر مھناں آپری خُوشی ری خبر نا ثابت کرݨ رو کام ݙِنو ہے۔
17
۱۷۔پݨ جکو بھَلی نیت خاں کونی کرتا، او آپری غرض راکھݨ ری وجہ خاں ایہ خوچ رو مسیح رو پرچار کرئی کہ قید میں مھیں خارُو گھݨی مُصیبت ہووے۔
18
۱۸۔مھارے خارُو ایہ کوئی بات کونی پݨ موٹی بات ایہ ہے کہ مسیح ری خُوشی ری خبر رو پرچار ہر طرح خاں ہوئی وو، پَچھے بھَلائیں او بُری نیت خاں کرے جاں بھَلی نیت خاں۔ اِیئے وجہ خاں ہُوں راضی ہاں اَن راضی ہووتو رئیخ
19
۱۹۔کیان٘کے مھناں ٹھاء ہے کہ تھان٘رے پراتھناواں اَن یسوع مسیح ری ݙِنوڑی آتما ری مدد خاں ہُوں اَزاد ہو جائیخ رو۔
20
۲۰۔مھناں یقین اَن پَکی اُمید ہے کہ ہُوں کَئی وی بات میں کھیچرو کونی ہوواں اَن گھݨی دلیری خاں ہمیشہ آݪِیکار ہیݨا وی آپرے ݙِیل رے وسیلے مسیح ری شان ظاہر کرتو رئیخ، بھَلائیں پَچھے ہُوں جیوتو رہواں جاں مَر جاواں۔
21
۲۱۔کیان٘کے مھارے جیوتے رہوݨ رو مقصد مسیح رو پرچار کرݨ ہے پݨ جے ہُوں مَر جاواں، تو وی فائدو ہے۔
22
۲۲۔جے ہُوں جیوتو رہیو، تو پرچار رو کام گھݨو کر خَگیخ۔ اِیئے خارُو ہُوں کونی کَہہ خَگتو کہ کی ٹھیک ہے۔
23
۲۳۔ہُوں ٻِنہے باتاں میں پھاتھوڑو ہاں۔ مھارو مَن تو کرئی کہ اِیئے دُنیا نا چھوڑاں اَن مسیح بھیݪو جا رہواں کیان٘کے ایہ خاراں کرتے ٹھیک ہے۔
24
۲۴۔پݨ تھاں خارُو مھارو جیوتو رہوݨ گھݨو ضروری ہے۔
25
۲۵۔مھناں اِیئے بات رو یقین اَن ٹھاء ہے کہ ہُوں جیوتو رئیخ اَن تھاں خاراں بھیݪو رئیخ کہ تھے وشواس میں بَدھتا جاؤ اَن اِیئے میں راضی رہو۔
26
۲۶۔جَݙے ہُوں بھَݪے تھاں کَڈھے آئیخ، تو جکو ماݨ تھاں نا مسیح یسوع میں مھیں تے ہے، او ٻِجو وی بَدھ جاخے۔
27
۲۷۔ اِیئے بات رو خیال راکھو کہ تھان٘رو اُٹھݨ ٻیخݨ مسیح رے بارے میں خُݨایوڑی خُوشی ری خبر رے لائق ہووے۔ پَچھے بھَلائیں ہُوں تھاں نا جووݨ رے خارُو آ خَگاں جاں نی، تو وی تھان٘رے بارے میں ایہ خُݨاں کہ تھے خارا ہیک آتما میں قائم ہو اَن تھے ہیک مَن ہو را گھݨی محنت کرئی وا کہ مِنکھاں رو خُوشی ری خبر تے وشواس بَدھتو جاوے۔
28
۲۸۔ہُوں ایہ وی خُݨاں کہ تھے آپرے دُشمناں خاں کَئی بات میں کونی ٻِیہوتا۔ اُوئاں رے خارُو ایہ بربادی رو نِشان ہے پݨ تھان٘رے خارُو مُگتی رو، ایہ نِشان اِیشوَر ری طرف خاں ہے۔
29
۲۹۔کیان٘کے مسیح ری وجہ خاں تھاں تے ایہ کِرپا ہوئی ہے کہ تھے نی چھَڑو اُوئے تے وشواس لے آؤ پݨ اُوئے ری وجہ خاں ݙُکھ وی برداشت کرو۔
30
۳۰۔تھے خُوشی ری خبر رو پرچار کرݨ رے خارُو گھݨی محنت کرئی وا جاں مھناں کرتے ݙِٹھو ہَتو اَن ہیݨا وی خُݨئی کہ ہُوں اِیئان٘ج کرئیں وو۔