¹ ۱۔آن او گھݨے ݙناں خاں پَچھے کفر نحوم میں بݪے آیو۔ آن خݨݨ میں آیو کہ او گھَر میں ہے۔ ² ۲۔آن اُتھے اِترا مِنکھ بھیݪا ہو گیا کہ در تک بھی جگہ کونی ہَتی ، آن او اُواں ناں پویتر شاستر خݨاتو پیو۔ ³ ۳۔آن مِنکھاں ہیکے ادھ رنگ آݪے مِنکھ ناں چاراں مِنکھاں خاں کھݨوا اُوے کَڈھی لایا۔ ⁴ ۴۔آن جݙے او ٹوݪے رے کارݨ اُوے نا اُوے رے خامو کونی لا خَگیا،تو اُواں جِتھے او ہَتو اُتھے چھت نا کھولی آن اُوے ادھ رنگ آݪے رے ماچے ناں ہیٹھو اوتاریو۔ ⁵ ۵۔یسوع اُواں رو ایمان جو رو اُوے ادھ رنگ آݪے منکھ ناں کہیو۔ ݙکر تاجا گناہ معاف وا۔ ⁶ ۶۔ پݨ اُتھے کئینک دھَرم ناں جاݨݨ آݪا ٻیٹھا ہتا آن او آپ رےمَن خوچݨ لاگا کہ ⁷ ۷۔ایہ کیِاں اِیاں کہَوئی پیِو؟ ایہ آپ ناں ایشور خمَجئی پیو۔ گُناہ کُݨ معاف کر خَگئی خِوائے اِیشور رے؟ ⁸ ۸۔آن اُوے بݪا یسوع ناں پوَیتر آتما خاں ٹھاہ لاگی کہ او آپ رے دِلاں میں اہڑ ے باتاں خوچئی وا؟اُوے اُواں ناں کہیو کہ تھیں کِیاں آپ رے دِلاں میں اہڑے باتاں خوچئی وا؟ ⁹ ۹۔خاہنجو کی ہے ادَھرَنگ آݪے خاں کہوݨو کہ تاجا پاپ معاف ہوُوا یا ایہ کہݨ کہ اُٹھی اُبھیج آپ رو ماچو کھَݨ بہہ رو؟ ¹⁰ ۱۰۔اِئیے رے خاروں کہ تھیں اوݪکھو کہ ابنِ اِنساں ناں دھَرتی ماتھے پاپ معاف کرݨ رو اِختیار ہے۔ اُوے اُوےاَدھرنگ آݪے ناں کہیو۔ ¹¹ ۱۱۔ہُوں تیخاں کہیں اُٹھی آپ رو ماچو کھَݨ آپ رے گھَرے جارو۔ ¹² ۱۲۔ائیے خاروں او خارا حیران تھی گیِا۔آن اِشوَر ری بݙائی کرتا کہݨ لاگا کہ مہاں اِئیاں کِݙے کونی ݙٹھو۔ ¹³ ۱۳۔آن پَچھے او ٻاہر جھِیل رے کندھے تے گِیو آن خارے مِنکھاں رو ٹوݪو اُوے رے کَڈھیں آیو۔ آن او اُواں ناں تعلیم ݙیوݨ لاگو۔ ¹⁴ ۱۴۔آن جݙے او جاوتو پِیو تو حلفئ رے ݙیکرے لاوی یعنی متی ناں ݙِٹھو جَکو ٻیٹھوڑو چنُگی لیوتو وو ۔ آن اُوے ناں کَہیو، مانجےلارے آ آن او اُٹھی رو اُوے رے لارے بوہو۔ ¹⁵ ۱۵ ۔آن ایِاں تھیو کہ جݙے او خارا اُوے رے گھَر میں باٹی کھاوتا پِیاتو ݙِگھ خارا چنگی لیوݨ آݪا ے آن ٻِجا پاپی یسوع آن اُوے رے چیلاں بھیݪا اُوے رے دعوت میں ٻاٹی کھاوتا پِیا۔ ¹⁶ ۱۶۔آن جݙے فَریسیاں آن دھَرمی گُروئاں اُوے ناں چنگی لیوݨ آݪا بھیݪو کھاوتو جویو ۔ تو اُوے رے چیلاں ناں کَہیو کہ تھارو گَرو چنگی لیوݨ آݪا آن پاپِیاں بھیݪو کِیاں کھاوی پِیئی پیِو۔ ¹⁷ ۱۷۔ یسوع اے خُݨ رو اُواں ناں کَہیو۔ خاجاں ناں ݙاکدار ری لو ڑکونی جݙے کہ بیماراں ناں ، کِیاں کہ ہوں خاجاں ناں کونی پݨ پاپِیاں ناں بَچاوݨ آیو ہاں۔ ¹⁸ ۱۸۔آن یوحنا را چیلا آن فَریسی وَرت خاں ہَتا۔ اُواں اُوے خاں کہیو کہ اِیئے رو کی کارݨ ہے کہ یوحنا را چیلا آن فَریسیاں را چیلا تو وَرت راکھئی پَر تاجا چیلا وَرت کونی راکھتا۔ ¹⁹ ۱۹۔یسوع اُواں ناں بݪتی ݙِنی ۔جانی جِتری تک بینݙ راجہ اُواں بھیݪوہے وَرت کونی راکھ خَگتا۔ ²⁰ ۲۰۔پَر او ݙینھں آخے جِݙے بینݙ راجہ اُواں خاں دھار کِیوجاخے اُوے گھَڑی او وَرت راکھخے۔ ²¹ ۲۱۔کوئی وی کورے گابھے ری کاری پُرانے جوڑے تےکونی لگاوتو ۔ نی تو نَوئ کاری اُوے پُراݨی کاری میخاں کئینک چھِک لیخے ری۔ ²² ۲۲۔ آن نَویں مَے ناں پُراݨی ݙیڑیاں میں کوئی کونی بھَرتا۔ نیں توݙیڑی میخاں ٹڑک جاخے ری آن ٻینھیں ݙیڑے برباد تھی جاخے رے پَݨ نَوی مے ناں نوی ݙیڑی بھَری جاوی۔ ²³ ۲۳۔آن ایِاں تھِیو کہ او پویتر ݙینھیں آپ رے چیلاں بھیݪا جاوتو پیِومارگ میں کݨَک بایوڑی ہوتی اُوے را چیلا خِٹا پَٹݨ لاگا۔ ²⁴ ۲۴۔تو فَریسیاں اُوے ناں کہیو۔ جو پویتر ݙن رو اے کیاں اہیڑو کام کَرئی جَکو کَرݨ روا کونی۔ ²⁵ ۲۵۔اُوے اُواں ناں کہیو ۔کی تھاں اے کونی پڑھیو کہ داؤد کی کِریوݙے جݙے اُوے ناں لوڑ پئی تی۔او آن اُوے را خَنگتی بُکھیا ہتا؟ ²⁶ ۲۶۔او کیاں کر خردار کاہن اعظم ابی یاتار رے ݙناں میں ایشور رے گھَر میں گیو آن چھڑھاوے رے ٻاٹے کھادھے ۔ جَکےرو کھاوݨ کاہنا خاں خِوا ٻجے کہیں ناں بھی کھاوݨ روا کونی ہوُتو۔ آن آپ رے خَنگتیاں ناں بھی ݙُنھے۔ ²⁷ ۲۷۔ آن اُوے اُواں نا کہیو۔ کہ پویتر ݙِن اِنخاناں رے خاروں بݨایو گیو ہے۔ ²⁸ ۲۸۔پَ ݨ ابنِ مِنکھ خَبَت رو بھی مالک ہے۔