¹ ۱۔ایہ اِیشوَر رے ݙِیکرے یسوع مسیح رے بارے میں خُوشی ری خبر ری شرُوعات ہے۔ ² ۲۔ جیکر یسعیاہ نبی رے شاستر میں اِیشوَر کَہیو ہَتو،ہوُں آپرو خَنݙیخو ݙیوݨ آݪے نا تھارے آگے آگے میلیخ۔او تھارے آوݨ خاں پہل تھارو مارگ تیار کرخے۔ ³ ۳۔  بیابان میں پرچار کرݨ آݪو کَہی وو’پرمیشوَر رے خارُو مارگ تیار کرو،اَن اُوئے رے خارُو مارگ خِدھو کرو۔ ⁴ ۴۔اِیئے خارُو پبتسمہ ݙیوݨ آݪو یُوحنا آیو اَن بیابان میں پرچار کرݨ لاگو، تھے آپرے پاپاں خاں توٻاں کرو اَن پبتسمہ لو، پَچھے اِیشوَر تھاں را پاپ معاف کرخے۔ ⁵ ۵۔پُورے یہُودیہ رے علاقے خاں تے یروشلم شہر خاں وی لوک اُوئے کَڈھے آوݨ لاگا اَن مِنکھاں رے رُوبرُو آپرا پاپ من را یَردن رے دریا میں اُوئے خاں پبتسمہ لیوݨ لاگا۔ ⁶ ۶۔یُوحنا اُون٘ٹھ رے باݪاں خاں بݨیوڑا گابھا پہرتو اَن کڑیاں تے چامٻڑے رو پَٹو ٻان٘دھتو۔ او تیݙے اَن جن٘گلی ماکھی کھاتو۔ ⁷ ۷۔ او ایہ پرچار کرتو کہ، ”مھیں خاں پَچھے ہیک ایَہڑو مِنکھ آوݨ آݪو ہے جکو مھیں خاں گھݨو قُدرت آݪو ہے، ہُوں تو اِیئے لائق وی کونی کہ جھُک رو اُوئے ری جُتی رو تسمو کھولاں۔ ⁸ ۸۔ہُوں تو تھاں نا پاݨی خاں پبتسمہ ݙئیں پݨ او تھاں نا پویتر آتما خاں پبتسمہ ݙیخے۔ ⁹ ۹۔ اوئاں ݙناں میں جَݙے مِنکھ یُوحنا خاں پبتسمہ لیوتا وا، تو پربھُو یسوع گلیل صُوبے رے ناصرت شہر خاں آیو اَن یَردن رے دریا میں یُوحنا خاں پبتسمہ لِنو۔ ¹⁰ ۱۰۔ جاں جی پربھُو یسوع پبتسمہ لے پاݨی خاں ٻاہر نِخریو، تو اُوئے اَکاش نا کھُلتے اَن پویتر آتما نا کبھُوتر آݪِیکار آپرے ماتھے اُترتے ݙِٹھو۔ ¹¹ ۱۱۔پَچھے اَکاش خاں اَواز آئی، ”تُوں مانجو پیارو ݙِیکرو ہے اَن تیں خاں ہُوں گھݨو راضی ہاں۔ ‏ ¹² ۱۲۔ پَچھے پویتر آتما پربھُو یسوع نا اُوئے گھڑی بیابان میں لے گیو۔ ¹³ ۱۳۔بیابان میں او چاݪیخ ݙن اَن چاݪیخ راتاں تک رہیو اَن شیطان اُوئے نا اَزماوتو رہیو۔ او جن٘گلی جِناوراں بھیݪو رہیو اَن فرشتا اُوئے ری خدمت کرتا رہیا۔ ¹⁴ ۱۴۔ پبتسمہ ݙیوݨ آݪے یُوحنا رے جیل میں ڈھَکیجݨ خاں پَچھے پربھُو یسوع گلیل صُوبے میں گیو اَن مِنکھاں نا اِیشوَر ری خُوشی ری خبر خُݨاوݨ لاگو۔ ¹⁵ ۱۵۔وقت پُورو ہو گیو رو اَن اِیشوَر ری بادشاہی نیڑی آئی ری، اِیئے خارُو آپرے پاپاں خاں توٻاں کرو اَن اِیئے خُوشی ری خبر تے وشواس لے آؤ۔ ¹⁶ ۱۶۔ ہیکے باری جَݙے پربھُو یسوع گلیل ری جھیل رے کندھے خاں جاوتو وو، تو اُوئے شمعُون اَن اُوئے رے بھائی اندریاس نا جھیل میں جاݪ ناکھتے ݙِٹھا۔ او ٻِنہے مُہاݨا ہَتا۔ ¹⁷ ۱۷۔ پربھُو یسوع اُوئاں نا ہیلو کر کَہیو، ”آؤ اَن مناجے لارے بَہو، تو ہُوں تھاں نا خِکھائیخ کہ تھے مَچھے بھیݪے کرݨ ری جگہا مناجے خارُو مِنکھ بھیݪا کرو۔ ¹⁸ ۱۸۔ایہ خُݨتے اِی اُواں آپرا جاݪ ناکھ ݙِنا اَن پربھُو یسوع را چیلا بݨ را اُوئے رے لارے بہوݨ لاگا۔ ¹⁹ ۱۹۔ پَچھے پربھُو یسوع اوتھ خاں تھوڑو آگے گیو، تو اُوئے زبدی ناں رے مِنکھ رے ٻے ݙِیکراں، یعقُوب اَن یُوحنا نا ݙِٹھا جکو ٻیَڑی میں آپرے پھاٹوڑے جاݪاں نا گنڈھتا وا۔ ²⁰ ۲۰۔پربھُو یسوع اُوئے گھڑی اُوئاں نا ہیلو کریو، تو اُوئاں وی آپرے ٻاپ زبدی نا ٻیَڑی میں مزدُوراں بھیݪو چھوڑیو اَن اُوئے رے لارے بہوݨ لاگا۔ ²¹ ۲۱۔پَچھے پربھُو یسوع آپرے چیلاں بھیݪو کَفرنحُوم شہر میں گیو اَن جاں اِی چھنچھر یعنی پویتر ݙن آیو، تو او بھَگتی گھر میں گیو اَن خِکھاوݨ لاگو۔ ²² ۲۲۔خارا اُوئے رے باتاں خُݨ را حیران ہَتا کیان٘کے او فقہیاں آݪِیکار کونی بلکے اختیار خاں خِکھاوتو ہتو۔ ²³ ۲۳۔ اُوئے گھڑی بھَگتی گھر میں ہیک ایَہڑو مِنکھ آیو جکے میں بھُون٘ت ہَتو۔ اُوئے اُون٘چی اَواز خاں کَہیو ²⁴ ۲۴۔”اَے یسوع ناصری، تاجو مھاں خاں کی واسطو؟ کی تُوں مھاں نا برباد کرݨ آیو ہے؟ مھاں نا ٹھاء ہے کہ تُوں کُݨ ہے۔ تُوں اوئے اِیشوَر ری میلیوڑی پویتر ہستی ہے۔ ²⁵ ۲۵۔پربھُو یسوع بھُون٘ت نا دڑکو ݙینوان کَہیو، ”چُپ کر۔ اِیئے مِنکھ خاں نِخر جا۔ ²⁶ ۲۶۔پَچھے بھُون٘ت اُوئے مِنکھ نا مروڑیو اَن زور خاں رَڑ کی اَن اُوئے خاں نِخر گیو۔ ²⁷ ۲۷۔ ایہ جو تے خارا جِݨا تمام گھݨا حیران ہویا اَن آپت میں کَہوݨ لاگا، ”ایہ کی؟ ایہ تو نَویں بات ہے کہ او بھُون٘تاں نا اختیار خاں حُکم ݙئی اَن او اُوئے رو کَہیو منئی۔ ²⁸ ۲۸۔اِیئاں اُوئے گھڑی پربھُو یسوع گلیل رے خارے علاقے میں مشہور ہو گیو۔ ²⁹ ۲۹۔ بھَگتی گھر خاں نِخر رو پربھُو یسوع یعقُوب اَن یُوحنا بھیݪو خِدھو شمعُون اَن اندریاس رے گھرے گیو۔ ³⁰ ۳۰۔ ‏اُوئے گھڑی شمعُون ری خاخُو نا گھݨو تا آ ہَتو، اِیئے خارُو اُوئاں آوتے اِی پربھُو یسوع نا اُوئے رے بارے میں خُݨایو۔ ³¹ ۳۱۔پربھُو یسوع اُوئے کَڈھے جا رو اُوئے نا ہاتھ خاں جھال ٻِخاݨی، تو اُوئے رو تا اُتر گیو اَن او اُوئاں رے خارُو خِیدھو کرݨ لاگ گی۔ ³² ۳۲۔ جَݙے آتھݨ ہوئی، تو مِنکھ بِیماراں نا اَن اُوئاں نا جکاں میں بھُون٘ت ہَتا، پربھُو یسوع کَڈھے لے آیا۔ ³³ ۳۳۔اِتری تک کہ پُورو شہر اُوئے گھر رے دروازے ماتھے بھیݪو ہو گیو۔ ³⁴ ۳۴۔پربھُو یسوع گھݨے بِیماراں نا بھَلاں کریا جکاں میں ٻِجے ٻِجے بِیمارے ہَتے اَن گھݨا خارا بھُون٘ت وی کاڈھیا۔ پݨ بھُون٘تاں نا ٻولݨ نی ݙِنا کیان٘کے او پربھُو یسوع نا اوݪکھتا۔ ³⁵ ۳۵۔ خبیݪے حالی جݙے اَندھارو ہَتو اَن پربھُو یسوع اُٹھی رو ہیک ویران جگہا تے گیو اَن پراتھنا کرݨ لاگو۔ ³⁶ ۳۶۔ پَچھے شمعُون اَن اُوئے را خن٘گتی پربھُو یسوع نا جووݨ رے خارُو گیا۔ ³⁷ ۳۷۔ جَݙے اُوئاں نا پربھُو یسوع لابھو، تو اُوئاں کَہیو، ”خارا جِݨا تناں نا لابھئی وا۔ ³⁸ ۳۸۔ پربھُو یسوع اُوئاں نا کَہیو، ”ہالو، آپاں کیتھ آخے پاخے رے بَستیاں میں ہالاں اَن اوتھ وی پرچار کراں کیان٘کے ہُوں جَگت میں اِیئیَج کام رے خارُو آیو ہاں۔ ³⁹ ۳۹۔ایئاں پربھُو یسوع پُورے گلیل رے علاقے میں یہُودیاں رے بھَگتی گھراں میں جا رو پرچار کرتو رہیو اَن مِنکھاں خاں بھُون٘ت کاڈھتو رہیو۔ ⁴⁰ ۴۰۔ پَچھے ہیک مِنکھ پربھُو یسوع کَڈھے آیو جکے نا کوڑھ ری بِیماری ہَتی۔ اُوئے پربھُو یسوع رے آگے گوݙا کھویا اَن کَہوݨ لاگو، ”جے تاجی مرضی ہووے، تو مھناں اِیئے بِیماری خاں بھَلاں کر وبے داغ کرو۔ ⁴¹ ۴۱۔پربھُو یسوع نا ترس آیو اَن آپرو ہاتھ آگہو کر تے اُوئے مِنکھ نا لگایو اَن کَہیو، ”بیشک مانجی مرضی ہے کہ تُوں بھَلاں ہو جاوے رو۔ ⁴² ۴۲۔ تو اُوئے گھڑی اُوئے مِنکھ ری کوڑھ ری بِیماری ختم ہو گی اَن او بھَلاں ہو گیو۔ ⁴³ ۴۳۔ پربھُو یسوع اُوئے نا خَمجھا تے بئیر کریو۔ ⁴⁴ ۴۴۔ان اُوئے نا کَہیو، ”خبردار، ایہ بات کَئی نا وی نی خُݨائے پݨ اِیشوَر رے گھر میں جا رو آپرو کاہن نا بتا اَن او چڑھاوو چڑھا، جکے رے بارے میں مُوسیٰ رے شاستر میں کَہیوڑو ہے، اِیئے خاں خاراں نا ٹھاء لاگخے کہ تُوں بھَلاں ہویو رو۔ ⁴⁵ ۴۵۔ پݨ او ٻاہر جا رو ہر کَئے نا خُݨاوݨ لاگو اَن اِیئے بات نا اِتری مشہور کر ݙِنی کہ پربھُو یسوع کَئی بھی شہر میں کھُلے عام کونی جا خَگتو ہَتو۔ پربھُو یسوع بیابان میں رہوݨ لاگو پݨ پَچھے وی مِنکھ چارے پاخاں خاں اُوئے کَڈھے آ جاوتا را۔