¹ ۱۔جَݙے پویتر ݙن ٹَپ گیو، تو مریم مگدلینی، یعقُوب ری ماں مریم اَن سلومی گیے اَن پربھُو یسوع ری لاش نا لگاوݨ رے خارُو خُوشبو آݪے چیزاں لے لِنے۔ ² ۲۔او اِتوار رے ݙن، خبیݪے، ݙن نِخرتے وقت قبر ماتھے گیے۔ ³ ۳۔ مارگ میں او آپت میں کَہوتے وے، ”مھارے خارُو قبر رے ماتھے راکھیوڑے پتھر نا کُݨ پاچھو کرخے؟ ⁴ ۴۔ کیان٘کے او پتھر گھݨو موٹو ہَتو۔ پݨ جَݙے اُوئاں جا ݙِٹھو، تو او پتھر پاچھو تھیوڑوہَتو۔ ‏ ⁵ ۵۔جَݙے او غار رے مھناں گیے، تو ہیکے جوان نا اوتھ ݙِٹھو جکے چمکدار گابھا پہریوڑا خاجڑی پاخے ٻیٹھو ہَتو۔ او اُوئے نا جو رے گھݨے حیران ہو وو۔ ⁶ ۶۔ اُوئے اُوئاں نا کَہیو، ”تھاں حیران نی ہووو۔ کی تھے یسوع ناصری نا لابھئی وے، جکے نا خُوݪی تے چڑھایو تو؟ او جیوتو ہوو رو اَن ایتھے کونی۔ جووو، ایہ او جگہا ہے جیتھے اُوئاں اُوئے نا ٻُوریو ہَتو۔ ⁷ ۷۔ہمے تھے جا رے پطرس اَن ٻِجے چیلاں نا خُݨاؤ کہ پربھُو یسوع تھاں خاں پہلے گلیل صُوبے ݙِخا جاخے۔ اوتھےتھے اُوئے نا جوخو، جیکراُوئے آپ تھاں نا خُݨایو ہَتو۔ ⁸ ۸۔ پَچھے او لُگائے غار خاں نِخرتے بھجتے گیے کیان٘کے او ٻِیہی ری وجہ خاں کان٘پتے وے اَن حیران ہَتے۔ اِیئے خارُو مارگ میں اُوئاں کَئیے خاں کوئی بات نی کری۔ ⁹ ۹۔ پربھُو یسوع اِتوار نا جیوتو ہووݨ خاں پَچھے خاراں خاں پہلے مریم مگدلینی نانظر ایو، جکے خاں اُوئے خات بھُون٘ت کاڈھیا ہَتا۔ ¹⁰ ۱۰۔مریم مگدلینی گی اَن پربھُو یسوع رے چیلاں نا خُݨایو جکو ماتم کرتا وا اَن روتا وا۔ ¹¹ ۱۱۔جَݙے اُوئاں خُݨیو کہ پربھُو یسوع جیوتو ہے اَن اُو مریم مگدلینی نظر ایوہے، تو وی اُوئاں اِیئے بات رو یقین نی کریو۔ ¹² ۱۲۔ اُوئے خاں پَچھے پربھُو یسوع ٻِجے رُوپ میں ٻے چیلاں نا نظر ایوجکو دیہات ݙِخا پَگے ٻھراڹڑاجاوتا وا۔ ¹³ ۱۳۔اُوں پاچھا یروشلم شہر جا را ٻِجاں مِنکھاں نا خُݨایو پݨ مِنکھاں اُوئاں ری بات رو یقین نی کریو۔ ¹⁴ ۱۴۔ پَچھے پربھُو یسوع گیارے خاص چیلاں نا اُوئے گھڑی نظر ایو جَݙے او ٻیٹھا ٻاٹی کھاتا وا۔ پربھُو یسوع اُوئاں نا دڑکو ݙِنو کیان٘کے اُوئاں را دل سخت ہوا ترا اَن اُوئاں یقین نی کریو ان اُوئاں رو وی یقین کونی کریو تو، جکاں پربھُو یسوع نا بھَݪے جیوتو ہووݨ خاں پَچھے ݙِٹھو تو۔ ¹⁵ ۱۵۔پَچھے پربھُو یسوع اُوئاں نا کَہیو، ”تھاں خاری دُنیا میں جاؤ اَن خارے مِنکھاں میں مائیں بارے میں خُوشی ری خبر رو پرچار کرو۔ ¹⁶ ۱۶۔جکو یقین لے آ تے پبتسمو لیخے اُوئے نا مُگتی ملخے پݨ جکو یقین کونی لے آوے او قصُوروار ہوخے۔ ¹⁷ ۱۷۔ جکو یقین لے آخے، اُوئاں میں ایہ معجزا ہوخے۔ او مانجے ناں خاں بھُون٘ت کاڈھخے اَن نَوئے نَوئے ٻولے ٻولخے۔ ¹⁸ ۱۸۔جے او ناگ نا اُکھݨخے یا کوئی زہر آݪی چیز پِیخے، تو اُوئاں نا کئیں بھی کونی ہووے۔ او بِیماراں ماتھے ہاتھ راکھخے، تو بِیمار بھَلاں ہو جاخے را۔ ¹⁹ ۱۹۔ جَݙے پربھُو یسوع اُوئاں خاں باتاں کر چکو، تو او اَکاش ماتھے کھݨیج گیو اَن اِیشوَر رے خاجڑی پاخے عزت اَن اختیار خاں ٻٹھو۔ ²⁰ ۲۰۔اِیئے خاں پَچھے چیلا ہر جگہا جا را پرچار کرݨ لاگا۔ پرمیشوَر اُوئاں بھیݪو ہر کام میں اُوئاں ری مدد کرتو رہیو اَن اُوئاں رے ہاتھ خاں معجزا بتا را ثابت کرتو رہیو کہ اُوئے رے کَہیوڑے باتاں خَچے ہے۔