¹ او بستی جکو لوکاں خاں بھریوڑی ہَتی ہمے کیکر خالی پئیی ہے۔ او جکو قوماں میں موٹی عزت آݪی ہَتی۔ او رانݙٻیر ہوی ری ۔جو قوماں ری شہزادی ہَتی۔ او اوترکی بݨ گی ری۔ ² او خاری رات رو رو تے آپرا گاݪ آنخواں خاں بھرئی اَن اُوئے رے چاہوݨ آݪاں میں کوئی کونی جکو اُوئے نا تسلی ݙے اَن اُوئے رے خارے خنگتیاں اُوئے خاں بے وفائی کی۔ اَن اُوئے رے دشمن بݨ گیا۔ ³ ظلم اَن سخت محنت خاں یہودہ آپرے مُلک خاں کاڈھیو گیو اَن وہ غیر قوماں میں جا بخیو۔ اُوئے نا سکون نی آیو۔ اُوئے نا ختاوݨ آلاں اُوئے نا پہاڑاں میں جا چھخایو۔ ⁴ صیون را مارگ ماتم کرئی۔ ایئے رے خارو کہ اُوئے عید تے اُوئاں نی کوئی کونی آتو۔ اُوئے را خارا پھاٹک خنیا تھی گیا را۔ ایشور را پوجاری خُݙکا بھرئی۔ اُوئاں رے کنوارے افسوس کرئی اَن او آپ وی چڑچڑا ہویا را۔ ⁵ اُوئاں رے مخالف جت گیا را اَن اُوئاں را دشمن خوشحال ہے۔ کیانکے اُوئاں رے گھݨے پاپاں رے کرے ایشور اُوئاں نا ݙکھ میں گھاتیا ہے۔ اُوئاں را ٻاݪ دشمن را غلام بݨ اَن گیا را۔ ⁶ اَن صیون ری ݙیکری خاں اُوئے ری رجائی بوہی گی۔ اُوئاں را سردار اُوئے ہرݨیاں آݪی کار تھی گیا جکاں نا چارو کونی ملتو او آپرے شکاریاں رے آگے آگے بے بس تھی اَن بوہا گیا۔ ⁷ یروشلیم آپرے مصیبت را ݙن ہر گھڑی یاد راکھئی جݙے اُوئاں را منکھ دشمناں رے ہاتھاں میں پڑ گیا۔ اَن کوئی کونی ہَتو جکو اُوئاں ری مدد کرے۔ جݙے اُوئاں رے دشمن ہخ ہخ تے اُوئے ری حالت نا جووتا ہَتا۔ ⁸ یروشلیم گھݨو موٹو پاپ کریو ہے۔ ایئے خارو او پلیت لُگائی آݪی کار ہوئی ری۔اُوئے ری تمام گھݨی عزت کرݨ آلا اُوئے ری اُگھاڑ نا جو تے اُوئے ری بُرائی کرئی۔ ایئے رے خارو او مھانݙو پھر تے رَڑے کرتی رئی۔ ⁹ اُوئے ری برائی اُوئے رے پلے ٻادھوڑی ہے۔ اُوئے آپرے انجام ری پروا نی کی۔ایئے خارو او عجیب طور تے ہر گی۔اُوئے نا کوئی تسلی ݙیوݨ آݪو کونی رہیو۔ اے پرمیشور مانجے ݙکھ نا جو کیانکے دشمن جتیو جاوئی۔ ¹⁰ اُوئے رے خارے قیمتی چیزاں تے دشمناں آپرا ہاتھ گھاتے ٻیٹھا ہے۔ بلکہ اُوئے ایہ وی جویو کہ غیر قوماں اُوئے رے پویتر بڑ گیا را جکے رے بارے میں اُوئے حکم ݙنو ہَتو کہ او تانجے ٹوݪے میں نی آوے۔ ¹¹ اُوئے رے خارا منکھ خُݙکا بھر بھر اَن ٻاٹی لابھتا پھرئی۔ او آپرے قیمتی چیزاں ٻاٹی رے خارے ݙے ݙئی۔ ایئے رے خارو کہ آپری جان نا خنبھاݪے۔ اے پرمیشور جو کہ ہوں کیکر ذلیل ہووئی وی۔ ¹² اے خارے مارگ باہݨ آݪاں۔ کی تھارے خارو ایہ کئی کونی؟ غور کر اَن جو وو کہ ایہ کے رو ݙکھ ہے۔ اُوئے ݙکھ آݪی کار ہے۔ جکو میں تے آیو۔ اَن جکے خاں اُوئے آپرے ݙکھ آݪے ݙن۔ ایشور مناں ݙکھ میں گھاتیو۔ ¹³ اُوئے ماتھے خاں باخݙے میلیو جکو مانجے ہاݙکھیا میں بڑ گی۔ اُوئے ہمارے پگاں رے خارو جاݪ بچھایو۔ اُوئے مناں لارے کر ݙنو۔ اُوئے مناں خنیو اَن بے ختھو کر ݙنو۔ اَن خارے ݙن رے کام میں گھات ݙنو۔ ¹⁴ مانجے قصوراں رو بھار میں تے ناکھیو گیو۔ اُوئے رے جی ہاتھ خاں بُݨیوݨی ہے۔ اَن مانجی نخڑی تے راکھیوڑی ہے۔ اُوے ہماری طاقت مُکا ݙنو۔ پرمیشور مناں اُوئاں رے ہاتھ میں ݙے ݙنو۔ میں خاں اُٹھیو کونی جاوتو۔ ¹⁵ ہمارے خارے بہادراں نا پرمیشور مانجے خامھݨے بےعزتی کی ہے۔ اُوئے مانجے خلاف محفل رو علان کیو ہے۔ ایئے رے خارو کہ مانجے منکھاں نا مَرا ݙیوے۔ پرمیشور یہوداہ ری کنواری ݙیکری نا کھݪے میں مَار ناکھی۔ ¹⁶ ایئے رے خارو ہوں روتی ۔ اَن مانجے آنکھیاں خاں آنخو بہوا۔کیانکے جکو مھناں تسلی ݙیوݨ آݪو ہے ۔ اُو میں خاں اݪگو ہے۔ مانجا ݙیکرا پریشان ہو گیا۔ایئے رے خارو کہ دشمن جیت گیا۔ ¹⁷ صیون آپراں ہاتھ کھنڈاوئی اُوئے نا کوئی تسلی ݙیوݨ آݪو کونی۔ پرمیشور یعقوب رے بارے میں حکم ݙنو کہ اُوئے رے آخے پاخے را منکھ اُوئے رے خلاف ہوئے۔ یروشلیم اُوئاں میں پلیت آݪی کار ہے۔ ¹⁸ پرمیشور انصاف کرݨ آݪو ہے۔ کیانکے کہ میں اُوئے رو حکم کونی منیو۔ اے خارے قوماں خُݨو تھاں اَن مانجے ݙکھ نا جو وو۔ مانجے کنوارے اَن مانجا جوان۔ غلامی میں گیا را۔ ¹⁹ میں آپرے چاہوݨ آݪاں نا ہیلو کرایو۔ پݨ اُوئاں مناں دھوکو ݙنو۔ مانجے ایشور رے پوجاریاں اَن بوڈھیا شہر میں آپری جان ݙے ݙنی۔ جݙے آپرے خارو ٻاٹی ری تلاش میں ہَتو۔ تاکہ آپری جان نا خنبھاݪ لاں۔ ²⁰ اَے پرمیشور جو ہوں کترو گھݨو ݙکھیو ہاں۔ مانجو اَندر جوش خاں بھَریوڑو ہے۔ کیانکے میں گھݨی مخالفت کی۔ ٻاہر تلوار بے اولاد کرئی۔ اَن گھر میں مَرݨ رو خامان ہے۔ ²¹ اُوئاں مانجی آہ خُݨ لی پݨ کوئی کونی جکو مناں تسلی ݙے مانجاں خارا دشمن مانجی مصیبت ری خبر خُݨ تے راجی ہویا کہ تئے اَیئاں کریو ہے۔ کاش کہ تو بدلے رو ݙن لے آوے۔ جکے میں او وی میں آݪی کار بݨ جاخے۔ ²² کاش کہ اُوئے رےخارے چلاکے۔ تھارے خامھݨے آوے۔ ہمارے خارے قصوراں رے بدلے۔ جاں تے میں خاں کریو ہے اُوئاں جی اُوئاں خاں وی کر۔ حقیقت میں مانجا ݙکھ گھݨا ہے۔ اَن مانجو من ݙکھ میں ہے۔