1
۱۔ایئے خاں پچھے یہودیاں ری عید ہوتی اَن یسوع یروشلیم میں گیو۔
2
۲۔اَن یروشلیم میں موٹوے دروازے تے ہیک حوض جکو عبرانی میں بیت حسدا خُݨیجتو جکے را پانچ برآمدہ ہے۔
3
۳۔اُواں میں ڈھگ خارا کمزور، اندھا، لنگڑا اَن ادھ مریوڑا جکو پاݨی رے ہلݨ رو انتظار کرتا وا۔
4
۴۔کیانکہ ایشور رو ہیک فرشتو جکو تھوڑی تھوڑی دیر خاں پاݨی ہِلاوتو۔ اَن جکو کوئی ہِلݨ خاں بعد پہلی پاݨی میں اُترتو جیڑھی وی بیماری ہوتی او ٹھیک ہو جاوتو۔
5
۵۔ اَن اوتھ ہیک منکھ ہَتو جکو اٹھتریخ برخ خاں بیمار ہَتو۔
6
۶۔یسوع جݙے اُوئے نا ائیاں پیو ڑو جویو اَن جاݨیو کہ او ڈھگ ݙناں خاں ایئے حالت میں ہے۔ تو اُوئے نا کہیو کہ کی تو بھلاں ہووݨو چاہوئی۔
7
۷۔ اُوئے بیمار اُوئے نا بݪتی ݙنی کہ اے ایشور مھیں کڈھے کوئی ایڑھو منکھ کونی جکو پاݨی ہلے اَن منئے حوض میں اُتارئے اَن جتری تک ہوں آپ جی پُگئی تو ٻجو میں خاں پہل اُتر جاوئی۔
8
۸۔یسوع اُوئے نا کہیو اُٹھ اَن آپرو مانچو اُکھݨ تے پھر ٹُر اَن جا۔
9
۹۔ اُو اُوئے جی گھڑی ٹھیک ہو گیو۔ اَن آپرو مانچو اُکھݨ تے بہݨ لاگو۔ اَن اُو ݙن سبت رو ݙن ہوتو۔
10
۱۰۔پݨ یہودیاں اُوئے منکھ نا جکو ٹھیک ہو گیو ہَتو۔ کہ آج سبت ہے تے خارو ٹھیک کونی کہ تو آپرو مانچو اُکھݨ تے جاوئے۔
11
۱۱۔اَن اُوئے اُوئاں نا بݪتی ݙنی جکے مناں بھݪاں کریو اُوئے مناں کہیو کہ آپرو مانچو اُکھݨ تر پھر ٹُر اَن جا۔
12
۱۲۔ پچھے اُوئاں اُوئے خاں پوچھیو کہ اُو کُݨ ہَتو۔ جکے تناں کہیو کہ آپرو مانچو اُکھݨ تے پھر ٹُر اَن جا۔
13
۱۳۔پݨ جکو ٹھیک ہویو کونی جاݨتو ہَتو کہ کُݨ ہے۔ کیانکہ یسوع اوتھ ٹوݪے ری وجہ خاں نکݪ گیو ہَتو۔
14
۱۴۔ ایئے خاں پچھے یسوع اُوئے نا ہیکل میں جویو اَن کہیو جو تو ٹھیک ہویو رو۔ بݪے گناہ نی کرئے ائیاں نی ہوئے کہ تھارو حال ایئے خاں وی گھݨو خراب ہوئے۔
15
۱۵۔او منکھ گیو اَن یہودیاں نا خُݨایو کہ جکے مناں ٹھیک کریو او یسوع ہے۔
16
۱۶۔ ایئے خارو یہودی یسوع نا تنگ کرݨ اَن اُوئے نا مارݨ ری کوشش کرݨ لاگا کیانکہ او سبت آݪے ݙن وی ایڑھا کام کرتو ہَتو۔
17
۱۷۔پݨ اُوئے اُوئاں نا کہیو کہ مھارو ٻاپ اجݨ تاݨی کام کرئی۔ اَن ہوں وی کام کرئی۔
18
۱۸۔ایئے خارو یہودی ٻجا وی گھݨاں اُوئے نا مارݨ ری کوشش کرݨ لاگا۔ کیانکہ اُو چھڑو سبت رو جی احترام کونی کرتو ہَتو بلکہ ایشور نا آپرو ٻاپ کہیہ اَن ایشور رے برابر بݨ جاتو۔
19
۱۹۔ پݨ یسوع اُوئاں نا بݪتی ݙنی ہوں تھاناں خچ کہیں کہ ݙیکرو آپرے آپ خاں کئی کونی کر خگتو۔ بلکہ او جی کرخے جکو ٻاپ نا کرتے جوخے کیانکہ جکو وی او کرتو رئی ݙیکرو او جی کرتو رئی۔
20
۲۰۔کیانکہ ٻاپ ݙیکرے نا پیار کرئی اَن جکو اُو کرئی اُوئے نا وی بتاوئی۔ بلکہ ایئے خاں وی موٹا کام اُوئے نا بتاوئی۔ کہ تھیں حیران تھی جاخو۔
21
۲۱۔ کیانکہ جا ٻاپ مَریوڑاں نا جیتا کرئی ائیاں جی ݙیکرو وی جکے نا چاوئی زندہ کرئی۔
22
۲۲۔کیانکہ ٻاپ کئی ری وی عدالت کونی کرتو ۔ بلکہ ٻاپ عدالت رو خارو کام ݙیکرے رے ہاتھ میں ݙے ݙنو رو۔
23
۲۳۔ایئے خارو کہ خاراں ݙیکرے ری عزت کرے۔ جکو ݙیکرے ری عزت کونی کرتو اُو اُوئے رے میلݨ آݪے ری عزت کونی کرتو۔
24
۲۴۔ہوں تھاناں خچی خچی کہیں کہ جکو مھارو کلام خݨتا۔ اَن جکے مناں میلیو ہے اُوئے تے ایمان لے آخے او ہمیشہ ری زندگی میں شامل تھی جاخے۔ اُوئے تے سزا رو حکم کونی ہوتی۔ بلکہ اُو موت خاں نکل تے ہمیشہ ری زندگی میں داخل تھی جاوئی۔
25
۲۵۔ ہوں تھاناں خچی کہیں کہ او گھڑی آخے بلکہ ایئے او جی گھڑی ہے کہ مَریوڑا ایشور رے ݙیکرے ری ٻولی خُݨخے اَن جکو خُݨخے اُو جی جیخے۔
26
۲۶۔ کیانکہ جاں ٻاپ آپ میں زندگی راکھئی ائیاں جی ݙیکرو وی آپ میں زندگی راکھئی۔
27
۲۷۔اَن اُوئے نا اختیار ݙنو کہ عدالت کرے۔ ایئے خارو کہ اُو ابن انسان ہے۔
28
۲۸۔ ائیاں نی خوچو کیانکہ اُو گھڑی آئی وی کہ جیترا قبراں میں ہے اُوئے ری ٻولی خُݨخے۔
29
۲۹۔اَن جکاں نیکی کی ہے زندگی ری قیامت رے خارو اُٹھخے اَن جکاں بُرئی کی ہے سزا ری قیامت رے خارو اُٹھخے۔
30
۳۰۔ ہوں آپرے آپ خاں کئیں کونی کر خگتو۔ جاں ہوں خُݨئی اُوئاں جی عدالت کرتو رئی۔ اَن مھاری عدالت خچی ہے کیانکہ ہوں آپری مرضی خاں کونی بلکہ اُوئے ری مرضی خاں جکے مھناں میلیو ہے۔
31
۳۱۔جے ہوں آپری گواہی ݙیوا تو مھاری گواہی اعتبار کرݨ آݪی کونی۔
32
۳۲۔ہیک ٻجو ہے جکو مھاری گواہی ݙئی۔ آن مھنے ٹھاہ ہے کہ جکو اُو گواہی ݙئی اُو اعتبار آݪی ہے۔
33
۳۳۔ تھاں یوحنا نی خنݙیخو میلیو اَن اُوئے خچائی ری گواہی ݙنی ہے۔
34
۳۴۔بھانویں ہوں آپرے طور خاں منکھ ری گواہی منظور کونی کرتو۔ تو وی ہوں تو وی ہوں ایئے باتاٻ تھاناں کہیو کہ تھاں نجات پاؤ۔
35
۳۵۔اُو ٻݪتو اَن چمکتو چراغ ہے۔ اَن تھاناں پاخ وی آیو۔ کہ تھوڑی دیر تک اُوئے ری روشنی خاں خوش رہو۔
36
۳۶۔ پݨ مھیں کڈھے جکو گواہی ہے۔اُو یوحنا ری گواہی خاں موٹی ہے۔ کیانکہ جکو کام ٻاپ مناں پورا کرݨ خارو ݙنا۔ ایہ اُوجی کام ہےجکو ہوں کرئی اُو مھاری گواہی ݙئی کہ ٻاپ مھناں میلیو ہے۔
37
۳۷۔اَن ٻاپ جی جکے مناں میلیو ہے مھاری گواہی ݙنی ہے۔ تھاں کڈے اُوئے ری ٻولی کونی خُݨی اَن نی جی اُوئے ری شکل جوئی۔
38
۳۸۔اَن تھاں اُوئے رو کلام آپرے من میں کونی راکھتا۔ ایئے خارو کہ تھاں اُوئے رے میلݨ آݪے رو یقین کونی کریو۔
39
۳۹۔تھاں اگ کتھیاں میں جووئی ایئے خارو تھاں خوچیو کہ اُوئاں میں تھاری ہمیشہ ری زندگی ہے۔ اَن ایئے او جی ہے جکو مھاری گواہی ݙئی۔
40
۴۰۔ تو وی تھاں زندگی لیوݨ رے خارو مھیں کڈھے آوݨ پسند کونی کرتا۔
41
۴۱۔ ہوں منکھاں خاں عزت کونی چاہوتو۔
42
۴۲۔پݨ ہوں تھاناں جاݨیئں تھاں میں ایشور ری محبت کونی۔
43
۴۳۔ہوں آپرے ٻاپ رے ناں خاں آیو ہا۔ اَن تھیں مناں قبول کونی کرتا۔ کوئی ٻجو آپرے ناں خاں آوئے تو تھاں اُوئے نا قبول کرخو رو۔
44
۴۴۔تھاں جکو آپت میں ہیکو ٻجے خاں عزت چاہوئی۔ اَن او عزت جکو ایشور واحد خاں تھاں نا ملئی۔ کونی جووتا۔ کیکر ایمان لے آ خگئی۔
45
۴۵۔ خوچو نی کہ ہوں ٻاپ نا تھاری بارے میں شکایت کرئیخ۔ تھاری شکایت کرݨ آݪو موسٰی جی ہے جکے تے تھارو بھروسو ہے۔
46
۴۶۔کیانکہ جے تھاں موسٰی رو یقین کرنت تو مھارو وی یقین کرنت۔ ایئے خارو کہ اُوئے مھارے بارے میں جی لِکھیو ہے۔
47
۴۷۔پݨ جݙے تھیں اُوئے ری آگ کتھی تے وی بھروسو کونی کرتا۔ تو مھارے باتاں تے کݙے یقین کرخو۔