1
۱۔ اُوے خاں پچھے یسوع گلیل ری جھیل جکے نا تبریاس ری جھیل کہئی رے پار گیو۔
2
۲۔اَن ہیک موٹو ٹوݪو اُوئے رے لارے ہو گیو۔ کیانکہ اُوئاں اُو چمتکار جویا ہَتا۔
3
۳۔جکو اُوئے بیماراں تے ݙخلیا ہَتا۔پچھے یسوع پہاڑ تے چڑھ گیو۔ اَن اُوتھ آپرے چیلاں بھیݪو ٻیٹھو۔
4
۴۔اَن یہویاں ری عید فصح نیڑی ہَتی۔
5
۵۔پݨ جݙے یسوع آنکھیں اُکھݨ اَن جویو کہ موٹو ٹوݪو مھارے کڈھے آئی وو۔ تو اُوئے فلپس نا کہیو کہ مھاں کیتھ خاں ٻاٹی مول ری لاں کہ ایے کھاوئے۔
6
۶۔پݨ اُوئے اُوئاں نا آزموتو لیوݨ رے خارو کہیو ہَتو۔ کیانکہ کہ او آپ جی جاݨتو کہ ہوں کی کرݨ آݪو ہا۔
7
۷۔ فلپس اُوئے نا بݪتی ݙنی کہ ٻے خو دینار رے ٻاٹے اُوئے رے خارو گھݨی کونی ہوئے۔ کہ ہر ہیک نا تھوڑی گھݨی ملے۔
8
۸۔اُوئے رے چیلاں میں خاں ہیک شمعون پطرس رے بھائی اندریاس اُوے نا کہیو کہ۔
9
۹۔ایتھ ہیک چھوکرو ہے جکے رے کڈھے جوو رے پانچ ٻاٹے اَن ٻے مَچھے ہے۔ پݨ ایہ اترے منکھاں رے خارو کی ہوخے۔
10
۱۰۔پچھے یسوع اُوئاں نا کہیو کہ منکھاں نا ٻخاݨو اَن اُوئے جگہ گھݨو ہریاول ہتی۔ اَن اُو اُتھ ٻیخ گیا۔ ایہ خاراں پانچ ہزار منکھاں رے نیڑا ہَتا۔
11
۱۱۔اَن یسوع اُو ٻاٹے لیئے اَن شکر کر تے اُوئاں نا جکو ٻیٹھا ہَتا اُوئاں نا بنڈ ݙنئں۔ اَن ایئاں جی مَچھیاں میں خاں وی جتری اُوئاں نا لوڑھ ہَتی بنڈ ݙنیئں۔
12
۱۲۔اَن جݙے اُو دھاپ گیا تو اُوئے آپرے چیلاں نا کہیو کہ اُوئاں ٹکڑاں نا جکو بچ گیا اُوئاں نا بھیݪا کرو تاکہ کئی وی زیان نی تھئیں۔
13
۱۳۔ تو اُوئاں بھݪاں کیا۔ اَن جوو رے پانچ ٻاٹیاں رے ٹکڑاں خاں جکو اُوئاں کھاوݨ آݪا خاں بچ گیا ہَتا۔ ٻارہے ٹوکرے بھریئے۔
14
۱۴۔پچھے اُوئاں منکھاں ایہ چمتکار جکو یسوع اُوئاں نا جووݪیو۔ جو تو کہیو کہ حقیقت میں جکو نبی دنیا میں آوݨ آݪو ہَتو ایہ جی ہے۔
15
۱۵۔تو پچھے یسوع ایہ خمجھتے کہ اُو چاہوئی کہ آوئے اَن مھناں ضوری ضور آپرو بادشاہ بݨاوئے۔ پچھے پہاڑ تے ہیکھلو بوہو گیو۔
16
۱۶۔ اَن جݙے آتھݨ ہوئی تو اُوئے را چیلا جھیل رے کندھے تے گیا۔
17
۱۷۔اَن ٻیڑی تے چڑھ تے جھیل رے پار کفرنحوم رے پاخے جاوتا وا۔ اُوئے گھڑی اندھارو ہویو ہتو رو اَن یسوع اُوئے نی اجݨ کونی آیو ہَتو۔
18
۱۸۔اَن جھانکھی ری وجہ خاں جھیل میں موٹے چھوݪے آوݨ لاگے۔
19
۱۹۔ آن جݙے اُو لُݙتے لُݙتے تین چار میل آگھا نکݪ گیا۔ تو اُوئاں یسوع نا جھیل تے بہوتے اَن ٻیڑی رے نیڑو آتے جویو۔ اَن اُو ٻہی گیا۔
20
۲۰۔پݨ اُوئے اُوئاں نا کہیو کہ ہوں جی ہاں ٻہیو نی ۔
21
۲۱۔پچھے اُو اُوئے نا ٻیڑی میں اُکھݨݨ تے راجی تھیا اَن اُوئے جی گھڑی ٻیڑی اُوئے جگہ جا پُگی جتھ او جاتا وو۔
22
۲۲۔ٻجے ݙن اُوئے ٹوݪے نا جو جھیل رے پار ابھا ہَتا۔ ایہ جویو کہ ہیک چھوٹی ٻیڑی خاں ٹاݪ اُتھ کوئی ٻجی ٻیڑی کونی ہَتی۔ اَن یسوع آپرے چیلاں بھیلو ٻیڑی تے کونی چڑھیو ہَتو بلکہ اُوئے را چیلا ہیکھلا جی بوہا گیا ہَتا۔
23
۲۳۔(پݨ کہینک چھوٹے ٻیڑے تبریاس خاں اُوئے جگہ رے نیڑے آئے جتھ اُوئاں پرمشور رے شکر کرݨ کا پچھے ٻاٹی کھادھی ہَتی)۔
24
۲۴۔ پݨ جݙے اُوئے ٹوݪے جویو کہ نی تو اُتھ یسوع ہے اَن نی جی اُوئے را چیلا ہے۔ تو اُو اُوئاں چھوٹے ٻیڑیاں تے ٻیخ تے یسوع نا لابھݨ کفرنخوم نی آیا۔
25
۲۵۔اَن اُوئاں جھیل رے پار جو تے یسوع نا کہیو مالک تو ایتھ کݙے آیو۔
26
۲۶۔ یسوع اُوئاں نا ٻݪتی ݙنی کہ ہوں تھاناں خچی خچی کہیں کہ تھاں مناں ایئے رے خارو کونی لابھتا کہ تھاں چمتکار جویا۔ بلکہ ایئے رے خارو کہ تھاں ٻاٹے کھا تے دھاپ گیا۔
27
۲۷۔عارضی ٻاٹی رے خارو محنت نی کرو۔ بلکہ اُوئے ٻاٹی خارو جکو ہمیشہ ری زندگی تک باقی رہے۔ جکو ابن آدم تھاناں ݙخے کیانکہ ٻاپ یعنی ایشور اُوئے تے مُہر لگائی ہے۔
28
۲۸۔ پچھے اُوئے اُوئاں نا کہیو مھاں کی کراں کہ ایشور رو کام کر خگاں۔
29
۲۹۔یسوع بݪتی میں اُوئاں نا کہیو ایشور رو کام ایہ ہے۔ تھاں اُوئے تے ایمان لے آؤ جکے نا اُوئے میلیو ہے۔
30
۳۰۔ پچھے اُوئاں اُوئے نا کہیو کہ ہمے تو کہیو چمتکار بتاوئیں کہ مھاں جو تے تھیں تے ایمان لے آواں تو کی کرتو رئیں۔
31
۳۱۔مھارے ٻاپ ݙاݙے رݨ پٹ میں من کھادھا کیانکہ لِکھیوڑو ہے کہ اُوئے اُوئاں نا آسمان خاں ٻاٹی ݙنی۔
32
۳۲۔ پچھے یسوع اُوئاں نا کہیو ہوں تھاناں خچی خچی کہیں کہ موسٰی تو تھاناں اُو ٻاٹی آسمان خاں کونی ݙنی ۔ بلکہ مھارو ٻاپ تھاناں آسمان خاں حقیقی ٻاٹی ݙوتو رئی۔
33
۳۳۔کیانکہ ایشور ری ٻاٹی او ہے جکو آسمان خاں اُترئی اَن دنیا نا زندگی ݙئی۔
34
۳۴۔پچھے اُوئاں اُوئے نا کہیو اے پرمیشور مھاناں ایہ خداں ری ٻاٹی ݙنی کر۔
35
۳۵۔ یسوع اُوئاں نا کہیو زندگی ری ٻاٹی ہوں ہاں۔ جکو مھیں کڈھے آوئی اُو کݙے وی بُکھو کونی ہووئے اَن جکو میں تے ایمان لے آوئی اُو کݙے ترخو کونی ہووئے۔
36
۳۶۔پݨ میں تھاناں کہیو کہ تھاں مھنے جو لیو رو۔ اَن بھݪے وی ایمان کونی لے آوتا۔
37
۳۷۔خارو کچھ جکو ٻاپ مھنے ݙئی او مھیں کڈھے آ جاخے اَن جکو مھیں کڈھے آوئی ہوں اُوئے نا کݙے کاڈھا کونی۔
38
۳۸۔ کیانکہ ہوں آسمان خان ایئے رے خارو کونی اُتریو کہ آپ ری مرضی بہاں۔ بلکہ اُوئے رے مرضی تے جکے مھناں میلیو ہے۔
39
۳۹۔اَن مھارے میلݨ اݪے ری مرضی ایہ ہے کہ جکو کچھ اُوئے مھناں ݙنو ہے۔ اُوئے میں خاں کہنک وی گُوماواں نی۔ بلکہ اُوئے نا آخری ݙن بݪے جیتو کراں۔
40
۴۰۔کیانکہ مھارے ٻاپ ری مرضی ایہ ہے کہ ہر ہیک نا جکو ݙیکرے نا جو اَن اُوئے تے ایمان لے آوئی خداں ری زندگی پاوئے۔ اَن ہوں اُوئے نا آخری ݙن بھݪے جیتو کرئیخ۔
41
۴۱۔ پچھے یہودی اُوئے خاں کُرکو کرݨ لاگا۔ کیانکہ اُوئے کہیو ہَتو کہ جکو ٻاٹی آسمان خاں اُتری اُو ہوں ہاں۔
42
۴۲۔اَن اُوئاں کہیو کی ایہ یوسف رو ݙیکرو یسوع کونی؟ جکے رے ماں ٻاپ نا آپاں اُݪکھئی۔ پچھے ایہ کیکر کہئی کہ ہوں آسمان خاں اُتریو ہا۔
43
۴۳۔یسوع بݪتی میں اُوئاں نا کہیو۔ کہ آپت میں کُرکو نی کرو۔
44
۴۴۔ کوئی مھیں کڈھے کونی آ خگتو جتری تک ٻاپ جکے مھناں میلیو ہے اُوئے نا کھیچ نی لے آوئے اَن ہوں اُوئے نا آخرت میں بݪے جیتو کریئخ۔
45
۴۵۔نبیاں رے کتاباں میں ایہ لکھیوڑو ہے کہ ”اُو خارا ایشور خاں تعلیم لیخے۔“ جکو کوئی ٻاپ ری خُݨئی اَن اُوئے ری تعلیم لیئی اُو مھیں کڈھے آوئی۔
46
۴۶۔ (ایئاں کونی کہ کئی وی ٻاپ نا جویو ہے۔ پݨ جکو ایشور خاں ہے اُوئے جی ٻاپ نا جویو ہے)۔
47
۴۷۔ہوں تھاناں خچی خچی کہیں جکو ایمان لے آخے او جی خداں ری زندگی پاخے۔
48
۴۸۔ زندگی ری ٻاٹی ہوں ہا۔
49
۴۹۔تھارے ٻاپ ݙاݙے رݨ پٹ میں من کھادھا اَن مَر گیا۔
50
۵۰۔ ایہ اُو ٻاٹی ہے جکو آسمان خاں اُترئی۔ تاکہ جکو کوئی ایے میں خاں کھاوئے اُو نی مَرے۔
51
۵۱۔ہوں جی اُو ٻاٹی ہا جکو آسمان خاں اُتری ہے۔ جے کݙے کوئی ایئے ٻاٹی میں خاں کھاوئے تو اُو ہمیشہ جیتو رہ خے۔ اَن جکو ٻاٹی جگت ری زندگی رے خارو ہوں ݙئیخ اُو مھارو مانخ ہے۔
52
۵۲۔پچھے یہودی آپت میں ائیاں کہہ اَن تکرار کرݨ لاگا۔ کہ ایہ آپ رو مانخ کیاں کھاوݨ رے خارو ݙئی وو۔
53
۵۳۔ پݨ یسوع اُوئاں نا کہیو۔ کہ ہوں تھاناں خچی خچی کہئی کہ جے تھاں ابن انسان رو مانخ نی کھاؤ اَن اُوئے رو لوہی نی پیو تو تھاں میں زندگی کونی ہو خگتی۔
54
۵۴۔جکو مھارو مانخ کھاوئی اَن مھارو لوہی پیئی۔ او خداں ری زندگی راکھئی۔ اَن ہوں اُوئے نا آخرت میں بݪے جیتو کریخ۔
55
۵۵۔کیانکہ مھارو مانخ حقیقی کھادھو اَن مھارو لوہی حقیقی پیݨ ری چیز ہے۔
56
۵۶۔جکو مھارو مانخ کھاوئی اَن مھارو لوہی پییئ اُو مھیں میں قائم رہئی اَن ہوں اُوئے میں۔
57
۵۷۔ جاں ٻاپ جکو جیتو ہے مھنے میلیو ۔ اَن ہوں ٻاپ میں جیتو ہا۔ ایئاں جی اُو جکو مناں کھاوئی مھیں میں جیتو رہخے۔
58
۵۸۔جکو ٻاٹی آسمان خاں اُتری ہے ایہ جی ہے۔ ٻاپ ݙاݙے آݪی کار کونی کہ کھادھو اَن مَر گیا۔ جکو ایہ ٻاٹی کھاخے او خدائی جیتو رہخے۔
59
۵۹۔اُوئے کفرنحوم میں تعلیم ݙوتے بھگتی گھر میں ایہ باتاں کہیں۔
60
۶۰۔ پچھے اُوئے رے چیلاں میں خاں گھݨاں ایہ خُݨ اَن کہݨ لاگا کہ ایہ کلام مشکل ہے۔ ایئے نا کُݨ خُݨ خگئی۔
61
۶۱۔پݨ یسوع آپرے من میں ایہ جاݨ تے کہ مھاراں چیلا ایئے بات تے کُرکو کرئی وو۔ اُوئاں نا کہیو کہ کی ایہ بات تھارے خارو تھوݙے ری وجہ ہے؟۔
62
۶۲۔جے تھاں ابن انسان نا اُونچا جاتے جوخو جتھ اُو پہلی ہَتو تو پچھے؟۔
63
۶۳۔جیتو کرݨ آݪی روح ہے۔ جسم خاں کوئی فائدو کونی۔ جکو باتاں مھیں تھاناں کہیں اُو روح ہے اَن زندگی وی ہے۔
64
۶۴۔ پݨ تھاں میں خاں کہینک ایڑھا ہے جکو ایمان کونی لے آوتا۔(کیانکہ یسوع پہل خاں جاݨتو ہَتو۔ کہ اُو جکو ایمان کونی لے آوتا کُݨ ہے۔ اَن کُݨ اُوئےناجھݪواخے۔)
65
۶۵۔پچھے اُوئے کہیو کہ ایئے رے خارو مھیں تھاناں کہیو ہا کہ کوئی میں کڈھے کونی آ خگتو۔ جتری تک ٻاپ ری طرف خاں اُوئے نا ݙنو نی گیو ہووئے۔
66
۶۶۔ ایئے خاں پچھے اُوئے را گھݨاں چیلا پھر گیا۔ اَن بݪے اُوئے بھیݪا نی رہیا۔
67
۶۷۔پچھے یسوع اُوئاں ٻارہاں نا کہیو کہ کی تھاں وی جاوݨو چاہوئی۔
68
۶۸۔شمعون پطرس اُوئے نا بݪتی ݙنی کہ اے پرمیشور مھاں کے کڈھے جاواں۔ خداں ری زندگی رے باتاں تو تھیں کڈھے جی ہے۔
69
۶۹۔اَن مھاں تو ایمان لے آیا ہا اَن اُݪکھ لیو رو کہ ایشور رو پویتر تو جی ہے۔
70
۷۰۔ یسوع اُوئاں نا بݪتی ݙنی کہ کی مھیں تھاں ٻارہاں نا کونی چُگیا؟ اَن تھاں میں خاں ہیک شیطان ہے۔
71
۷۱۔اُوئے ایہ شمعون اِسکریوتی رے ݙیکرے یہوداہ رے بارے میں کہیو ہَتو۔ کیانکہ ایہ جی اُوئاں ٻارہاں میں خاں ہَتو۔ جکو اُوئے نا جھلاوݨ آݪو ہَتو۔