¹ اَن شاہِ فارِس خورس ری بادشاہی رے پہلکے برخ میں ایئے رے خارو کہ پرمیشور رو وچن جکو یرمیاہ ری زبانی آیو ہَتو۔ پورو ہویو پرمیشور شاہِ فارِس خورس رے من میں گھاتیو اَن اُوئے آپری خاری راجائی میں پرچار کروایو اَن اُوئے ایہ فرمان وی لکھیو کہ۔ ² شاہِ فارِس خورس ایئاں کہیو وو کہ پرمیشور آسمان رے ایشور دھرتی رے خارے ملک مناں ݙنا ہے۔اَن مناں زور ݙے اَن کہیو ہے کہ ہوں یروشلیم میں جکو یہوداہ میں ہے اُوئے رے خارو اہیک گھر بݨاواں۔ ³ اَن تھاں کڈھے جکو اُوئے ری خاری قوم میں خاں ہووےاُوئے رو ایشور اُوئے بھیݪو ہے۔ اَن اُو اُوئے یروشلیم نا جکو یہوداہ میں ہے جاوئے اَن پرمیشور اِسرائیل رے اِیشور رو گھر جکو یروشلیم میں ہے بݨاوے۔ اَن او جی ایشور ہے جکو یروشلیم ہے۔ ⁴ اَن ہر ہیک جکو کئی جگہ تے رہ گیو ہے۔ جیتھ او پردیسی ہے تو اتھ را منکھ چاندی اَن خونے اَن مال جناور خاں اُوئاں ری مدد کرے چھڑو اُوئاں خاں ٹاݪ جکو آپری خوشی خاں ایشور رے گھر رے خارو دے جکو یروشلیم میں ہے۔ ⁵ پچھے یہودہ اَن بنیامین رے گاں را امیر منکھ اَن پوجاری اَن لاوی ہر اہیک جکے رے من نا ایشور تیار کریو ایئے رے خارو کہ ایشور رو گھر بݨاوݨ رے خارو یروشلیم میں گیا۔ ⁶ اَن او خارا جکو اُوئے رے آخے پاخے ہَتا چاندی را ٹھیکر اَن خونے رے چیزاں اَن مال متا اَن قیمتی چیزاں خاں اُوئاں ری مدد کی۔ چھڑو اُوئاں خاں ٹاݪ جکاں آپری خوشی خاں ݙنو۔ ⁷ اَن خورش بادشاہ پرمیشور رے بھگتی گھر رے ٹھیکراں نا وی بھیݪا کروایا جکاں نا نبوکدنضر یروشلیم خاں کاڈھ لے آیو ہَتو اَن جکاں نا اُوئے آپرے ݙیوتاں رے گھر میں راکھیا ہَتا۔ ⁸ خورش شاہِ فارِس اُوئاں نا سورج ݙیوتا رے خزانچی جکو (پیخاں رو حساب کتاب راکھتو) اُوئےے رے ہاتھ خاں کڈھوایو۔ اَن اُوئاں نا یہودہ رے امیر منکھ شیسبصر نا ݙنو۔ ⁹ اَن اُوئاں ری گنتی ایہ ہے خونے رے تریخ تھال اَن چاندی را ہزار تھاݪ اَن اُنتریخ چُھرے۔ ¹⁰ اَن چونے را تریخ پیالا اَن چاندی رے ٻجی قسم را ہزار ٹھیکر۔ ¹¹ خونے اَن چاندی را خارا ٹھیکر پانچ ہزار چار خو ہَتا۔ شیسبضر ایئاں خارا نا جݙے غلامی را منکھ بابل خاں یروشلیم نا پُگایا گیا لے آیا۔