1
بݪے اُوے مناں کہیو۔اے ابن بشر،جکو کچھ تیں پایو اُوے نا کھا لے ائیے طومار نا کھاجا آن اسرائیل رے گھرانے خاں بات کر۔
2
پچھے میں آپ رو مانݙو کھولیو۔آن اُوے اُو طومار مناں کھݪایو۔
3
آن مناں کہیو۔اے ابن بشر،آپ رے پیٹ نا کھݪا۔آن آپرو جسم اُوے طومار خاں جکو ہوں تناں ݙئیں بھرے۔جݙے میں کھادو۔تو اُو مانجے مانݙے شیرینی رے باعث شہد آݪی کاݪ ہتو۔
4
بݪے اُوے مناں کہیو۔اے ابنِ بشر،روانہ ہو آن اسرائیل رے گھرانے کڈھی جا آن مانجے باتاں اُواں نا کہہ ݙے۔
5
کیانکے تو مُشکل لسان آن دھند زبان ری قوم کڈھے کونی بلکہ اسرائیل رے گھرانے کڈھے بہیر کریو جاوی۔
6
آن نی ڈھگ ایڑی اُمتاں کڈھے جکاں ری مشکل لسان آن دھند زبان ہے۔آن جکاں ری بات تو خمجھ کونی خگتو۔آن جیکڈھے ہوں تناں اُواں کڈھے بہیر کرا تو کی اُو تانجی کونی خڹے؟
7
پڹ اسرائیل رو گھرانو تانجی خنڹ خاں انکار کرخے۔کیانکے اُو مانجی خنڹ خاں انکار کرئی۔کیانکے اسرائیل رو خارو گھرانو سخت پیشانی آن تنگ دل ہے۔
8
جو میں تاجو مانݙو اُواں رے مانݙے خاں آن تاجی پیشانی اُواں ری پیشانی خاں زیادہ سخت کر ݙنی ری۔
9
میں تاجی پیشانی نا الماس آݪی کار آن چقمق خاں زیادہ سخت کر ݙنی ری۔ائیے رے کرئے تو اُواں خاں نی ٻیح۔آن اُواں رے مانݙاں خاں ٻیح نی کر۔کیانکے اُو سرکش گھرانو ہے۔
10
بݪے اُوے مناں کہیو۔اے ابنِ بشر، اُواں تمام باتاں نا جکو ہوں تناں کہیخ آپرو دل لگا آن کان خاں خڹ۔
11
آن روانہ ہوجا۔آن اسیراں یعنی آپ ری قوم رے ݙکراں کڈھے جا آن اُواں خاں کلام کر آن کہہ ݙے کہ ایشور ائیاں کہی وہ۔ چائیے اُو خڹے چائیے نی خڹے۔
12
بݪے مناں روح اُکھڹیو۔آن جݙے ایشور رو جلال آپری جگہ خاں اُٹھیو تو میں آپرے لارے موٹی گرج ری آواز خڹی۔
13
یعنی ہستیاں رے پراں ری ھیکے ٻجے خاں لاگن ری۔آن بھیݪی چکراں ری آواز۔
14
پچھے روح مناں اُکھڹلیو آن مناں لے گی۔آن ہو تلخ دل آن غضب ناک ہو روانہ ہووہ۔آن ایشور رو ہاتھ میں تے بھاری ہتو۔
15
آن ہو تلِ ابیت رے اُوے اسیراں کڈھے آیو جکو نہر کبار تے رہوتا ہتا۔آن ہوں خات ݙن تک اُواں رے میناں متحیر ہو تے ٻیٹھو رھیو۔
16
آن خاتاں ݙناں بعد ایشور رو کلمو مناں حاصل ہویو۔اُوے کہیو کہ
17
اے ابن بشر،میں تناں اسرائیل رے گھرانے رو پاسبان بڹایو ہاں۔تُو تُوں مانجے مانݙے رو کلمو خڹ آن اُواں نا مانجی طرف خاں آگاہ کر۔
18
جیکݙے ہوں شریر نا کہاں۔کہ تو ضرور مر جائیخ رو آن تُو اُواں نا آگاہ نی کرے۔آن شریر نا تاکید نی کرے کہ اُو آپری بدروش خاں باز آوے آن آپری جان نی بچاوے۔تو اُو شریر آپری بدی میں مرخے پڹ اُوے رو لوہی ہوں تاجے ہاتھ خاں پاچھو لہئیخ۔
19
جئے اگر تیں شریر نا آگاہ کر ݙنو آن اُوے آپری شرارت آن آپری بد روش خاں توٻہ نی کرئی۔تو اُو آپری بدی میں مرخے۔پڹ تیں آپری جان نا بچا لینی۔
20
آن جݙے صادق آپری راستبازی خاں پِھر جاوے آن بدی کرئے۔آن ہوں اُوے رے خامنے ٹھوکر راکھاں تو اُو مرخے۔کیانکے تیں اُوے نا آگاہ کونی کریو۔ائیے رے خارو اُو آپرے گناہ میں مرخے آن خچائی را جکو کام اُوے کریا یاد کونی کریا جاوے۔پڹ اُوے رو لوہی ہوں تاجے ہاتھ خاں پاچھو لئیخ۔
21
پڹ جئے تیں صادق نا آگاہ کریو۔کہ گناہ نی کرئے۔آن صادق گناہ نی کریو۔تو اُو ضرور جی خے۔ائیے رے خارو کہ اُوے نا آگاہ کریو ہتو۔ آن تیں آپری جان نا بچا لینی۔
22
آن اُوے ایشور رو ہاتھ میں تے ہتو۔آن اُوے مناں کہیو اُٹھی پدہر میں نخر جا آن اُوتھے ہوں تیں خاں کلام کرئیخ۔
23
جݙے ہوں اُٹھیو آن پدہر میں نخر گیو۔آن کی جوئیں وی کہ ایشور رو جلال اُوے جلال آݪی کاݪ اُبھو ہتو۔جکو میں نہرکبار تے ݙٹھو ہتو آن ہوں مانݙے تاڹی کھریو۔
24
پچھے آتما میں میں بڑی۔آن اُوے مناں پگاں تے اُبھاڹیو آن میں خاں بات کر تے کہیو۔جا آن آپرے گھر میناں آپ رے آپ نا بند کر ݙے۔
25
آن تُو اے ابن بشر،جُو تیں تے بندھن ناکھیو جاخے۔آن تُو اُواں خاں ٻاندھیو جائیخ۔آن اُواں رے میناں خاں ٻاہر کونی نخرے۔
26
آن ہوں تانجی جٻان تاجے تاݪو خاں چپائیخ ری آن تُو گونگو ہو جائیخ رو۔آن اُواں رے خارو ناضح کونی ہو وے۔کیانکے اُو سرکش گھرانو ہے۔
27
آن ہوں جݙے تیں خاں کلام کرئیخ۔پچھے تاجو مانݙو کھولئیخ۔آن تُو اُواں نا کھئیخ۔ایشور پرمیشور ائیاں کہی وہ۔جکو خڹئی اُو خڹے آن جکو اعتراض کرئے اُو اعتراض کرئے۔کیانکے اُو سرکش گھرانو ہے۔