1
۱۔ایہ خَط پولُس، جکو اِیشوَر ری مرضی خاں مسیح یسوع رے بارے میں پرچار کرئی اَن اَپݨے وشواسی بھائی تِیمُتھِیُس ری طرف خاں
2
۲۔مسیح میں اُوئاں نیک اَن وشواسی بھائیاں رے ناں ہے جکو کُلسے شہر میں ہے۔ اَپݨے ٻاپ اِیشوَر ری کِرپا تھاں ماتھے ہووے اَن او تھاں نا خُکھا راکھے۔
3
۳۔ مھے جَݙے وی تھاں خارُو پراتھنا کرئیں تو ہمیشہ اَپݨے پربھُو، یسوع مسیح رے ٻاپ یعنی اِیشوَر رو شُکر کرئیں۔
4
۴۔کیان٘کے مھاں خُݨیو ہے کہ تھان٘رو وشواس مسیح یسوع تے ہے اَن تھے خارے وشواسیاں خاں پریم راکھئی۔
5
۵۔تھان٘رے اِیئے وشواس اَن پریم خاں او اُمید ظاہر ہووئی جکو تھان٘رے خارُو اَکاش ماتھے راکھیوڑی ہے۔ ایہ اُمید اُوئے گھڑی خاں ہے جَݙے تھاں خَچائی رے شٻد یعنی خُوشی ری خبر رے بارے میں خُݨیو ہَتو۔
6
۶۔ایہ خُوشی ری خبر تھاں کَڈھے پُگی ری اَن جاں پُوری دُنیا میں پھل لے آوئی وی اَن بَدھئی وی، اِیئان٘ج ایہ تھاں میں اُوئیَج ݙن خاں بَدھئی وی جَݙے تھاں اِیشوَر ری کِرپا رے بارے میں خُݨیو اَن اِیئے نا خَچو خَمجھیو۔
7
۷۔اِیئے خُوشی ری خبر رے بارے میں تھاں نا پریمی اِپَفراس خِکھایو جکو مھاں بھیݪو شیوا رو کام کرئی۔ مسیح رو ایہ شیوادار مھان٘ری جگہا تے تھاں میں وفاداری خاں شیوا رو کام کرئی وو۔
8
۸۔ اُوئیَج مھاں نا خُݨایو کہ پویتر آتما رے وسیلے خاں تھے ہیکے ٻِجے خاں پریم راکھئی۔
9
۹۔اِیئے خارُو جکے ݙن خاں مھاں ایہ خُݨیو، تو مھاں وی تھان٘رے خارُو اِیشوَر خاں پراتھنا اَن مِنتھ کرتا رہیں کہ او تھاں نا پویتر آتما رے وسیلے خاں عقل اَن خَمجھ ݙے کہ تھے اُوئے ری مرضی نا بھَلی طرح اوݪکھ خَگو۔
10
۱۰۔اَن تھے ایَہڑی زندگی گُزارو جکے خاں پرمیشوَر راضی ہووے۔ تھے ہر طرح را نیک کام کر را پھل لے آؤ اَن اِیشوَر ری اوݪکھاݨ میں بَدھتا جاؤ۔
11
۱۱۔ مھان٘ری پراتھنا ہے کہ تھے اُوئے ری پرتاٻ آݪی قُدرت رے مطابق ہر طرح ری طاقت خاں مضبوط ہووتا جاؤ کہ تھے ہر حالت میں خُوشی خاں صبر اَن برداشت کر خَگو۔
12
۱۲۔تھے ہمیشہ اَکاشی ٻاپ رو شُکر کرتا رہو جکے تھاں نا اِیئے لائق بݨایا کہ تھے اُوئے میراث را بارَخ بَݨو جکو اُجاݪے میں رہوݨ آݪے نیک مِنکھاں نا لابھئی۔
13
۱۳۔اِیشوَر آپاں نا اَندھارے ری غُلامی خاں چھُڑا را آپرے پریمی ݙِیکرے ری بادشاہی میں لے آیو رو،
14
۱۴۔ جکے رے وسیلے خاں آپاں نا مُگتی یعنی پاپاں ری معافی لابھی ہے۔
15
۱۵۔اِیشوَر نا کَئی کونی ݙِٹھو پݨ مسیح اُوئے نا ظاہر کریو۔ او اِیشوَر رو رُوپ اَن خارے بݨایوڑے چیزاں خاں پہل ہَتو اِیئے خارُو او مُون٘بھی ہے۔
16
۱۶۔اِیشوَر خارے چیزاں اُوئے رے وسیلے بݨائے، بھَلائیں او اَکاش رے ہووے جاں دھرتی رے، ݙِٹھوڑے ہووے جاں اَݨ ݙِٹھے، تخت ہووے جاں مُلکھ، حکُومتاں ہووے جاں اختیار۔ اِیشوَر ایہ خارے چیزاں اُوئے رے وسیلے اَن اُوئے ریَج خارُو بݨائے۔
17
۱۷۔او خارے چیزاں خاں پہل ہے وو اَن خارے چیزاں نا خن٘بھاݪئی۔
18
۱۸۔او ݙِیل رو ماتھو ہے یعنی اُوئے نا وشواسی منݙݪی ماتھے اختیار ہے۔ او شرُوعات ہے اَن مَریوڑاں مئیں خاں خاراں خاں پہل جیوتو ہویو کہ او خارے باتاں میں خاراں خاں پہل ہووے۔
19
۱۹۔اِیشوَر نا ایہ پسند آیو کہ اُوئے را خارا گُݨ ݙِیکرے میں ہووے۔
20
۲۰۔اِیشوَر اُوئے رے خُوݪی تے ٻلِیدان رے لوہی رے وسیلے خارے چیزاں خاں خُلح کر لِنی، بھَلائیں او دھرتی رے ہووے جاں اَکاش رے۔
21
۲۱۔پہل تھے وی آپری بُری خوچ اَن بُرے کاماں ری وجہ خاں اِیشوَر خاں اݪگا اَن اُوئے را دُشمن ہَتا۔
22
۲۲۔پݨ ہمے مسیح رے ݙِیل ری موت رے وسیلے خاں اِیشوَر تھاں خاں خُلح کر لِنی ری کہ او تھاں نا نیک، بے عیب اَن بے اِلزام بَݨا را آپرے آگے حاضر کرے۔
23
۲۳۔اِیئے خارُو ضرُوری ہے کہ تھے آپرے وشواس ری بُنیاد تے پَکا رہو اَن اُوئے اُمید نا نی چھوڑو جکو خُوشی ری خبر خُݨَݨ خاں تھان٘رے مَن میں پیدا ہوئی ہے۔ ایہ اوج خُوشی ری خبر ہے جکے رو پرچار اَکاش رے ہین٘ٹھا پُوری دُنیا میں ہویو اَن جکے رو ہُوں پولُس وی شیوادار بݨ گیو۔
24
۲۴۔ہُوں اُوئاں ݙُکھاں ری وجہ خاں راضی ہاں جکو تھان٘رے خارُو برداشت کرئیں وو کیان٘کے ہُوں مسیح رے ݙِیل یعنی وشواسی منݙݪی رے خارُو اُوئاں ݙُکھاں نا برداشت کرئیں وو جکو حالی رہ گیا تا۔
25
۲۵۔اِیشوَر مھناں آپری وشواسی منݙݪی رو شیوادار بَݨا رو ایہ ذِمے واری ݙِنی ہے کہ ہُوں تھاں نا اُوئے رے شٻد ری پُوری بات۔
26
۲۶۔یعنی اُوئے بھید رے بارے میں خُݨاواں جکو جَگت ری شرُوعات اَن کَئی پیڑھیاں خاں لُکیوڑو ہَتو پݨ ہمے اِیشوَر اُوئے نا آپرے وشواسیاں تے ظاہر کریو ہے۔
27
۲۷۔اِیشوَر ری مرضی ہَتی کہ غیر قوماں نا ٹھاء لاگے کہ ایہ بھید گھݨو قیمتی اَن پرتاٻ آݪو ہے۔ او بھید ایہ ہے کہ مسیح تھاں مئیں رہئی، جکے رے وسیلے خاں آپاں اِیشوَر رے پرتاٻ میں شامل ہووݨ ری اُمید راکھئیں۔
28
۲۸۔اِیئے خارُو مسیح رو پرچار آپاں خارے مِنکھاں میں کرئیں اَن خاراں نا اُوئے خَمجھ خاں خِکھاوئیں جکو اِیشوَر آپاں نا ݙِنی ہے کہ ہر مِنکھ مسیح میں کامل ہو رو اِیشوَر رے آگے حاضر ہووے۔
29
۲۹۔اِیئے وجہ خاں ہُوں شیوا رو ایہ کام سخت محنت خاں کرئیں کیان٘کے ہُوں ایہ مسیح ری اُوئے طاقت خاں کرئیں جکو مھیں مئیں ہے۔