¹ ۱۔یاد راکھ کہ آخری زمانے میں مُشکل ݙن آخے۔ ² ۲۔کیان٘کے لوک مطلبی، پئیخاں را پُجاری، پھُوتی، ماݨ کرݨ آݪا، گِلیا کرݨ آݪا، ماں ٻاپ رو کَہیو نی منَݨ آݪا، شُکر نی کرݨ آݪا، اِیشوَر رو کَہیو نی منَݨ آݪا، ³ ۳۔پریم نی راکھݨ آݪا، دَیا نی کرݨ آݪا، اِلزام لگاوݨ آݪا، آپرے آپ تے قاٻُو نی راکھݨ آݪا، ظُلم کرݨ آݪا، نیکی را دُشمن، ⁴ ۴۔ ٹھَگ، لاپرواہ، آکڑباز، اِیشوَر نا چھوڑ اَن عیش اَرام خاں پریم راکھݨ آݪا ہوخے۔ ⁵ ۵۔او آپرے آپ نا نیک ظاہر کرخے پݨ اِیشوَر ری مرضی تے بہوݨ آݪا کونی ہووے۔ ایَہڑے مِنکھاں خاں اݪگا رہیا۔ ⁶ ۶۔اِیئاں مئیں خان٘ج کئیں مِنکھ ہے جکو اٹکݪ خاں گھراں میں بَڑ جاوئی۔ او اُوئاں بیوقوف لُگائیاں نا قاٻُو کر لئی جکو آپرے پاپاں ری وجہ خاں پریشان رہئی اَن گھݨے قسم رے بُرے مرضیاں میں پھَخیوڑے ہووئی۔ ⁷ ۷۔او ہمیشہ نَویں نَویں باتاں خِیکھݨ ری کوشش تو کرئی پݨ خَچائی نا کَݙے وی اوݪکھ کونی خَگتے۔ ⁸ ۸۔جاں ٻے مِصر رے جادُوگراں ینیس اَن یمبریس مُوسیٰ ری مُخالفت کی ہَتی اِیئان٘ج ایہ وی خَچائی ری مُخالفت کرئی۔ اِیئاں ری عقل بِگڑ گی ری اَن اُوئاں رو وشواس قبُول کرݨ رے لائق کونی۔ ⁹ ۹۔ پݨ ایہ مِنکھ آگے بَدھ کونی خَگے کیان٘کے اِیئاں ری بے وقوفی خارے مِنکھاں تے ظاہر ہو جاخے ری جاں اُوئاں ٻِنہاں جادُوگراں ری ہوئی ہَتی۔ ¹⁰ ۱۰۔تُوں خیکھݨ میں، اُٹھݨ ٻیخݨ میں، ارادے میں، وشواس میں، برداشت میں، پریم میں، صبر میں اَن پَکو رہوݨ میں مھارے لارے بُوہو۔ ¹¹ ۱۱۔اِیئے خاں ٹاݪ تھناں ٹھاء ہے کہ انطاکِیہ، اِکُنِیُم اَن لُسترہ میں کوکر مھناں تن٘گ کریو اَن مھیں کیَہڑا کیَہڑا ݙُکھ برداشت کریا۔ مھیں تمام گھݨا ݙُکھ اُکھݨیا پݨ پربھُو مھناں اُوئاں خاراں خاں چھُڑایو۔ ¹² ۱۲۔اصل میں جکو وی مسیح یسوع ری مرضی رے مطابق نیک زندگی گُزارݨ چاہوئی، اُوئاں خاراں نا ختایو جاخے، ¹³ ۱۳۔پݨ بُرا اَن ٹھَگ مِنکھ ٻِجاں خاں ٹھَگی کرئی اَن آپ وی ٹھَگیج را خراب ہووتا جاخے۔‏ ¹⁴ ۱۴۔پݨ تُوں اُوئاں باتاں تے قائم رہ جکو تھیں خِیکھیے ہے اَن جکاں رو تھناں یقین ہے کیان٘کے تُوں اُوئاں نا اوݪکھئی جکاں خاں تھیں ایہ باتاں خِیکھیے ہے۔ ¹⁵ ۱۵۔تھناں چھوٹے تھَکے خاں اِیشوَر شاستر رے باتاں ری ٹھاء ہے جکے خاں تھناں ایہ خَمجھ لابھئی کہ مُگتی تو مسیح یسوع تے وشواس لے آوݨ خاں لابھئی۔ ¹⁶ ۱۶۔پویتر شاستر ری ہر بات اِیشوَر ری طرف خاں ہے اَن خِکھاوݨ، دڑکو ݙے تے خَمجھاوݨ، خُدھارݨ اَن نیک کام ری تربیت میں فائدے ری ہے۔ ¹⁷ ۱۷۔کہ اِیشوَر را مِنکھ کامل بَݨے اَن ہر نیک کام کرݨ خارُو بالکل تیار ہو جاوے۔