باب۱

1 ۱۔ایہ خَط پولُس ری طرف خاں ہے جکو اِیشوَر ری مرضی خاں مسیح یسوع رے بارے میں پرچار کرئی کہ اُوئے وعدو کریوڑے جِیون رو خَنݙیخو خُݨاوے جکو مھاں نا مسیح یسوع میں لابھئی۔ 2 ۲۔ ایہ خَط تِیمُتھِیُس رے ناں ہے جکو مھیں خارُو پریمی ݙِیکرے آݪِیکار ہے۔ اَپݨے ٻاپ اِیشوَر اَن اَپݨے پربھُو، مسیح یسوع ری کِرپا اَن دَیا تھیں ماتھے ہووے اَن او تھناں خُکھو راکھے۔ 3 ۳۔جکے اِیشوَر ری بھَگتی مھارے ٻاپ ݙاݙے کی، ہُوں وی اُوئاں آݪِیکار صاف مَن خاں اُوئے ری بھَگتی کرئیں اَن ݙن رات آپرے پراتھناواں میں تھناں ہمیشہ یاد کر رو اِیشوَر رو شُکر کرئیں۔ 4 ۴۔ہُوں تھناں خہٹݨ رے خارُو خِکئی کہ مھارو مَن راضی ہو جاوے کیان٘کے مھناں یاد ہے کہ مھارے جاوݨ آݪے ٹائیم تُوں کِترو رویو ہَتو۔ 5 ۵۔مھناں تھارو خَچو وشواس یاد ہے اَن مھناں یقین ہے کہ تھارو وشواس اُوئان٘ج ہے جاں پہل تھاری نانی لُوئِس اَن تھاری ماں یُونِیکے رو ہَتو۔ 6 ۶۔ اِیئے خارُو ہُوں تھناں یاد ݙِراوئیں کہ تُوں اِیشوَر ری ݙِنوڑی اُوئے برکت نا استعمال کرتو رہ جکو مھارے ہاتھ راکھݨ خاں تھناں لابھی ہے۔ 7 ۷۔ کیان٘کے اِیشوَر آپاں نا پویتر آتما اِیئے خارُو کونی ݙِنو کہ آپاں ٻِیہاں پݨ اِیئے خارُو ݙِنو ہے کہ آپاں نا طاقت لابھے، آپاں آپت میں پریم راکھاں اَن آپرے آپ تے قاٻُو راکھاں۔ 8 ۸۔اِیئے خارُو تُوں اَپݨے پربھُو یسوع ری گواہی ݙیوݨ خاں نی خَرمیج اَن نِیج مھیں خاں خَکِیج جکو اُوئے رو پرچار کرݨ ری وجہ خاں قید ہاں۔ تھناں چاہیجے کہ خُوشی ری خبر خُݨاوݨ رے خارُو تُوں مھیں آݪِیکار اِیشوَر خاں لابھݨ آݪے طاقت خاں ݙُکھ اَن تکلیفاں اُکھݨتو رہ۔ 9 ۹۔کیان٘کے اُوئے آپاں نا مُگتی ݙے ری پویتر زندگی گُزارݨ خارُو ہیلو کریو ہے اَن ایہ مُگتی اَپݨے کاماں ری وجہ خاں کونی پݨ اِیشوَر رے خاص ارادے اَن کِرپا خاں لابھی ہے۔ ایہ کِرپا جَگت ری شرُوعات خاں پہل مسیح یسوع میں آپاں تے ہوئی 10 ۱۰۔پݨ ہمے آپاں نا مُگتی ݙیوݨ آݪے یسوع مسیح رے آوݨ خاں پرگھٹ ہوئی جکے موت نا ختم کر ری آپری خُوشی ری خبر رے وسیلے خاں اَمر جِیون نا اُجاݪے مئیں لے آ رو آپاں تے پرگھٹ کر ݙِنو۔ 11 ۱۱۔اِیشوَر مھناں خُوشی ری خبر خُݨاوݨ آݪو، پرچار کرݨ آݪو اَن گرُو بݨایو۔ 12 ۱۲۔اِیئے خارُو ہُوں ݙُکھ اُکھݨئیں وو پݨ پَچھے وی ہُوں خَرمیجتو کونی کیان٘کے جکے تے ہُوں وشواس لے آیو ہاں، اُوئے نا ہُوں اوݪکھئیں۔ مھناں یقین ہے کہ جکے خُوشی ری خبر نا امانت خَمجھ ری مھیں اُوئے نا ݙِنی ہے او اُوئے ری حفاظت آپرے پاچھے آوݨ رے ݙن تک کر خَگئی۔ 13 ۱۳۔جکو ٹھیک باتاں تھیں مھیں خاں خُݨیے ہے اُوئاں نا مھارے نمُونے تے بہہ رو خِکھاوتو رہ اَن مسیح یسوع میں وشواس اَن پریم خاں زندگی گُزار۔ 14 ۱۴۔ او خُوشی ری خبر جکو اِیشوَر تھناں بھَلی امانت رے طور تے ݙِنی ہے، پویتر آتما ری مدد خاں جکو اَپݨے مئیں رہئی اُوئے ری حفاظت کر۔ 15 ۱۵۔تھناں ٹھاء ہے کہ آسِیہ صُوبے را خارا مِنکھ مھیں خاں پھِر گیا را اُوئاں میں فُوگلُس اَن ہرمُگنِیُس وی ہے۔ 16 ۱۶۔پربھُو یسوع، اُنیسفِرُس رے خاندان تے دَیا کرے کیان٘کے اُوئے کَئی واری مھناں حوصلو ݙِنو۔ او اِیئے بات خاں کَݙے کونی خَرمیجو کہ ہُوں قیدی ہاں 17 ۱۷۔پݨ جَݙے او رُوم شہر میں پُگو، تو اُوئے مھناں لابھتو رہیو اَن آ رو مھیں خاں ٹَکریو۔ 18 ۱۸۔مھاری پراتھنا ہے کہ پربھُو رے پاچھے آوݨ آݪے ݙن پرمیشوَر اُوئے تے دَیا کرے۔ تھناں تو ٹھاء ہے کہ اُوئے اِفِسُس شہر میں مھان٘ری کِتری شیوا کی۔