¹ Palus e gehenaw dai kura ki Khodayas banda zhe Isaa Masih e paygumbar. Khodayas khosh mocan zhe bhawaras zhe hak jhonikas thara. ² Shatasa hameshas umbur zhe majaras umeedas thara kas wagda ki shurug aini shati Khoday kai aw se phan o ne dek bhaw. ³ Se prust watuna tan mond homa pashaw kia ki homa ghona Khodayas hokumas thara homa hawala thi ashes. ⁴ Bhawaras thara sahi banda Titus e nomuna. Barkat zhe tasali dada Khoday zhe homa Isaa Masih e gehenaw dai tai mila milaw hiw aria. ⁵ A tai Karitay shehen` ghõi histi itais ki tu te thaw hula mondr sahi kari zhe mai hokumas thara shahar shaharai shehen` moc mukarar kari. ⁶ Kas thara ki kura mondr diaw mo hin aria zhe tasi ek mi ja hin aria zhe tasi azheli bhawar karaw napharman mo hin aria. ⁷ Koki jagawaw Khodayas khosh banda hikas bati tasa thara kura mondr diaw mo hin aria, ne o se kahari hiaw hiw aria, mo o kia nasha karaw hiw aria, ne o shataw, ne o lalici. ⁸ Baliki mustapher, malgiri, narum mizaj, pak how aria. ⁹ Bhawaras zhe Khodayas Kitab aini mondran hisabuna kasaw hiw aria ki sahi sabakas som nasihat asta karik bhaw aria zhe kura ki khilap una moc an te asta tan som karik bhaw aria. ¹⁰ Koki bo mocbi hokum ne maniaw zhe behuda zhe dhoka diaw an. ¹¹ Tasi ashi band kareli. Shemi moc najahiz phaidas khater shum mond cicai dur tabah karin dai. ¹² Tasi mi mocaw ek moc mai aw kura ki khas kai tasi paygumbar ais ki Kuriti moc hamesha phan diaw, haiwan, aegoeg zuaw hin dai. ¹³ Shia guahi sahi. Shatalako tasi kai sahi mondr de ki tasi bhawar paka hiw aria. ¹⁴ Te Yahudian acoik zhe shatasi mocan hokum mo kõ karin aria kura ki hakani abatha hon dai. ¹⁵ Pak mocan bati saw ishnari pak hin magam guhangaran hatya zhe bhawar ne karawan hatya kia ishnari asta pak ne baliki tasi akal zhe hardi awdu gunahan thara piri shuan. ¹⁶ Te Khoday jhonik dai ghõi ta man dai magam tan kroman tharo tasa inkar Karin dai koki te napharman zhe kia prust krom karikas kabil ne.