1 Palus e gehenaw dai kura ki shatasa umburas hisab una kia mi Isaa Masih e som shiaw Khodayas marzias thara se paygumbar. 2 Sheshoyak baya Timotias e nomuna. Barkat, rakum zhe tasali Khoday dada zhe homa Khodayas Isaa Masih e gehenaw dai tai milaw hiw aria. 3 Shatasa Khodayas hatya sual kia ki a sapha hardias thara karim dai tasa shukur ki tan sual una a har wat tai yad karim dai. 4 Tai astru yad kai rat adua tai som milaw hikas bati citim dai ki phato a bo khoshan him. 5 Mai tai to bo bhawar karik yadi dehain dai kia ki awel tai awaw Luhis zhe tai ayaw Yunikay kariman aini zhe mai yakeen shiaw ki tu asta karis dai. 6 Shehen`as bati o a tai yadi dehaim dai ki tu Khodayas shato niamat upuai kia ki mai baza thaikas wajen dai tai milaw thi shiaw. 7 Koki Khoday homa behikas arwah ne baliki kudrat muhabat zhe cicaikas arwah dai aw. 8 To homa Khodayas guahi dikas zhe mai pe a tasa kaidi sharum mo kari baliki Khodayas kudratas zhe tasa khoshanian mondran khater una mai som gham uprai. 9 Kura ki homa gunah aini khalas araw zhe pak kai khundiaikas thara homa khundiaw zhe homa kroman tharo ne baliki tan iradan bati zhe tasa barkat kia ki Isaa Masih e wajen dai homa thara shurug aini shati shiaw. 10 Magam ajo homa Isaa Masih e wajen dai apashemi kura ki nashek khulai o umburas bati o khoshanias mondran thara phreylik araw. 11 Kas bati ki a Khodayas mondr diaw zhe paygumbar zhe bandawaw mukarar thi am. 12 Shatalako mi a gham zhum dai magam lac o ne jhonim dai koki kas ki a yakeen kai am to jhonim dai nai yakeen ki se mai amanatas tara adua zhe sambhal kariw. 13 Kia sahi mond ki abi mai pi sangai aa shatasa bhawaras zhe muhabatas thara kia ki abi Isaa thara Kara dai. 14 Pak rukhas wajen dai kia ki homa udreman aw shesa sahi amanatas kheyal Kara. 15 Tu jhonis dai ki Asia jaiga aini saw moc mai pi desha hawan. Phuglus zhe Harmugnis asta tasi mocaw aini. 16 Khoday Unisphurus e dura khayar kariw aria koki se bo c`at Mai madad kai aw zhe mai jelai parikas pi shermada ne thi aw. 17 Baliki se Roma aw e to mai khoji mai som milaw hika aw. 18 (Khoday tara adua tasa thara khayar kariw aria) se Iphsas una kia ki khesmat kai aw abi te prust kai jhona dai.