¹ یسوع مسیح ھدائے چک ءِ مستاگ ءِ بندات۔ ² انچش کہ یسعیاہ نبی ءِ کتاب ءَ نبشتہ اِنت کہ بچار من وتی کاسد ءَ پر شما دیم دِیاں آ تئی راہ تیار کنت۔ ³ گیابان ءَ توارجنوکئے توار کیت کہ ھداوند ءِ راہ تیار بکن اِت۔ ⁴ آئی ءِ راہ ءَ تچک بکن اِت یوھنّا آتک ءُ گیابان ءَ پاکشودی دات ءُ گناھانی بکشگ ءِ واستا توبہ ءِ پاکشودی ءِ واستا توار جنگ ءَ اَت۔ ⁵ یھودیہ ءِ دمگ ءِ تیوگیں مردم ءُ یروشلم ءِ تیوگیں نندوکیں درآہت آئی ءِ کِرّا شُت اَنت ءُ آیاں وتی گناھانی اکرار کت یردن ءِ کور ءَ پاکشودی گپت۔ ⁶ او یوھنّا ءَ اوشتر ءِ مودانی پچ پِر اَت جمڑا ئے پٹّا ئے لانک ءَ بستگ اتے مدگ ءُ بینگے وارت۔ ⁷ ءُ اِے جارے جت کہ چہ من ءُ رَند ھما مردم کیت کہ آ چمن زوراکتر اِنت ءُ من اِے لائک نہ آں کہ بہ جُگاں ءُ آئی کوشبنداں بہ بوجاں۔ ⁸ من شمارا گوں آپ ءَ پاکشودی داتگ بلے آ شمارا گوں پاکیں روہ ءَ پاکشودی دنت۔ ⁹ ءُ آ روچاں یسوع گلیل ءِ دمگ ناسرت آتک یردن ءَ چہ یوھنّا ءَ پاکشودی گپت۔ ¹⁰ ءُ وھدے آ چہ آپ ءَ در آتک بُرزاد آھگ ءَ دیستے کہ آزمانا دپ پچ جت ءُ پاکیں روہ ءَ را چو کپوتے ءِ دروشم ءَ وتی سرا آھگ دیست۔ ¹¹ ءُ چہ آزمان ءَ توار آتک کہ تو منی لاڈکیں بچّےءُچہ ترا من وشّاں۔ ¹² ءُ یک دم روہ ءَ آئرا گیابان ءَ دیم دات۔ ¹³ ءُ آ گیابان ءَ داں چِل روچ ءَ چہ شیتان ءَ چکّاسگ بوت ءُ وکشی جناوراں گوں ھور اَت ءُ پرشتگاں آئی ھزمت کت۔ ¹⁴ پدا یوھنّا ءِ گرائینگ ءَ پد یسوع گلیل آتک ءُ ھدائے وشیں ھالے شِنگ کت۔ ¹⁵ ءُ گشتے وھد سرجم اِنت ءُ ھدائے بادشاھی نزیک اِنت، توبہ بکن اِت ءُ وشّیں مستاگ ءِ سرا ایمان بیار اِت۔ ¹⁶ ءُ گلیل ءِ کورے کشا روان اَت کہ آئی شمون ءُ آئی برات اندریاس ءَ کور دام جنگ ءَ دیست چیاکہ آ ماہی گیر اَت اَنت۔ ¹⁷ یسوع آیان ءَ گُشت منی پدا بیائے من شمارا آدم گیر جوڈ کناں۔ ¹⁸ آیاں ھما دمان دام یلا دات آئی پشت ءَ شُت اَنت۔ ¹⁹ کمو دور آئی زبدی ءِ چک آکوب ءُ آئی برات یوھنّا ءَ بوجیگ ءِ سرا دام ءِ دوچگ ءَ دیست۔ ²⁰ ائی پوراََ آیان ءَ توار کت آیاں وتی پت زبدی بوجیگ ءِ سرا گوں مزوراں یلا کت آئی ءِ پشت ءَ شت اَنت ²¹ پدا آ کپر نَھُوم ءَ شُت زُوت سبت ءِ روچ ءَ اِبابت ھانہ شت تالیم دئیگ ءَ لگِّت۔ ²² ءُ چرائی تالیم ءَ ھیران بوت اَنت چیاکہ آ اِشان پکیانی پیم ءَ نا بلکیں اھتیار دار ئے وڑ ءَ تالیم دیئگ اَت۔ ²³ ءُ ھما دمان ءَ آیانی ابابت ھانہ یک مردمے رست ناپاکیں روہ ءِ گور جتگ اَت۔ آئی کوکار کت ءُ ای وڑ گُشت۔ ²⁴ او یسوع ناسری! مارا گوں تو چے کار؟ چے زانا تو مے کُشگ ءَ آتکگے ؟ من ترا زاناں تو کےائے۔ ھدائے کُدُّوس ئے۔ ²⁵ یسوع آئرا ھبر دات ءُ گُشت چُپ کن ءُ اِیشرا یلا بکن۔ ²⁶ گڑا جن آ مرد ژامبلیت کوکار کنان ءَ در آتک ۔ ²⁷ تیوگیں مردم ھیران بوت اَنت گوں یک دگرا سُک سُک کت گشتے اِے چیئے؟ اِے نوکیں تالیمے! آ جِنّاں گوں اھتیار ءَ ھکم دنت ءُ جِنّ ایشی ھکم ءَ منّ اَنت۔ ²⁸ ءُ ھما دمان ءَ آئی شھرت گلیل ءِ تیوگیں دمگاں شنگ بوت۔ ²⁹ ءُ آ دمان ءَ چہ ابابت ھانہ ءَ در آتک گوں آکوب ءُ یوھنّا ءَ شمون ءُ اندریاس ءِ لوگ ءَ آتک۔ ³⁰ شمون ءِ ترو تَپیگ اَت شمون ءَ دمان ءَ آئی ءِ ھال اِشرا دات۔ ³¹ آ کِّرے شت ءُ آئی دستے گِپت آئرا پادے کت تپ ءَ آئرا یلا دات آ یسوع ءِ ھزمت کنگ ءَ لگِّت۔ ³² بیگاہ ءَ وھدے روچ برکت بوت مردماں تیوگیں نادُراہ ءُ جِنّی یسوعے کِرّا آؤرت اَنت۔ ³³ ءُ تیوگیں میتگ در ءِ دپ ءَ مُچّ بوت۔ ³⁴ ءُ آئی بازینے کہ وڑ وڑیں نادراھی گور جتگ اَت اَنت دُراہ کت اَنت ءُ بازیں جِنّے کش اتے ءُ جِنّان ءِ ھبر کنگ ءَ نیئش چیاکہ آیاں یسوع درست کت۔ ³⁵ سُھب ءَ چہ روچ ءِ دراھگ پیسر آ پاد آتک ءُ یک ویرانیں جاگھے ءَ شُت اودا دوا کت۔ ³⁶ شمون ءُ آئی سنگت یسوع ءِ پدا شُت اَنت۔ ³⁷ ءُ وھدے آ ءِ دیست گشتے تیوگیں مردم ترا شوھاز ءَ اَنت۔ ³⁸ آئی ایشان ءَ گُشت بیائے ما کِرّ ءُ گورے دگا میتگے ءَ راویں تانکہ من اُودا جار بجن آں چیاکہ من پمیشکا در آتکگ اں۔ ³⁹ ءُ آ سرجمیں گلیل ءَ آیانی اِبابت ھانہ ءَ یک یک ءَ شت جار جت ءُ جِنّیانی جِنّ ءِ کشِّت اَنت۔ ⁴⁰ یک گرِّیئے آتک آئی پاداں کپت ءُ ائی دیما جُکِّت ءُ گُشتے اگاں تو بلوٹے منا پاک ءُ ساپ کت کنے۔ ⁴¹ یسوع ءَ آئی سرا رھم آتک وتی دستے شھارت آئی سرا پِرمُشت ءُ آئرا گشتے من لوٹاں۔تو پاک ءُ ساپ بہ بے۔ ⁴² ھما دامانا آئی گرّ گار بوان بوت ءُ آ پاک ءُ ساپ بوت۔ ⁴³ یسوع آئرا تاکید کت ءُ چرائی رُکست بوت ءُ گشتے۔ ⁴⁴ گوں کسا ھبر مکن بلے برو وتی کاہن ءَ پیش بدار ءُ وتی پاک ءُ ساپ بوھگے بابت ھما چیز کہ موسی ءَ مُکرر کتگ اَنت بگش تانکہ پرایاں شاھد بہ بیت۔ ⁴⁵ بلے آ ڈنّا شُت باز شورے کت ءُ اِے گپ انچش مشور کت کہ یسوع شھرا پدا سرزائرا داھل بوت نہ کت بلکیں ڈنّا ویرانگاں نِشت مردم چہ چاریں نیمگاں آئی کِرّا آتکاں۔