¹ چہ پولس ءِ نیمگ ءَ کہ آ چہ ھُدائے رزایا مسیح یسوع ءِ کاسد اِنت ءُ برات تیمتھیس ءِ نیمگ ءَ، ھدائے ھما کلیسایا کہ کُرنتھس ءِ شھر ءَ اَنت ءُ پہ سرجمیں اکیہ پاریزگارانی نام ءَ۔ ² مے پت ءُ ھداوندیں یسوع مسیھ ءِ نیمگ ءَ شمارا ایمنی سر بات۔ ³ ھُدایا بِزاں مے ھداوندیں یسوع مسیھ ءِ پت ءَ ستا ءُ سنا سربات کہ رھمدلیں پتے ءُ ھر وڑیں دلبڈّیئے ھدا اِنت۔ ⁴ آ مارا ھر وڑیں سکّی ءُ سوریاں دلبڈّی دنت تاکہ ما ھما دلبڈّی ءِ وجہ ءَ دومیان ءَ دلبڈّی بدیاں کہ سکّیانی تہ ءَ اَنت۔ ⁵ چیاکہ مسیح ءِ ھاترا ما ھَمینچُک گیشتر سکّی ءُ سوری سگّیں، ھَمینچُک گیشتر مارا مسیح ءِ برکت ءَ دلبڈّی رس ایت۔ ⁶ اگاں ما سکّی ءُ سوریانی اماچیں شمے دِلبڈّی ءُ نجات ءِ واستا ءُ اگاں مارا دلبڈّی رسیت اوں شمے دلبڈیئے واستا تاکہ ھمے سکّیاں کہ ما سگگا ایں شما ھم سگِّت بکن اِت۔ ⁷ ما پہ شما مھکمیں اوست ءُ امیت داریں چیاکہ ما زانیں ھما وڑ شما مے سکّی ءُ سوریاں ھوار اِت ھمے وڑ مے دلبڈّی ءَ ھوار بہ بیت۔ ⁸ او براتاں! ما نہ لوٹیں کہ شما ھما سکّی ءُ سوریاں نا بلد بہ بے کہ آسیہ ءَ مے سرا کپتگ اَت اَنت، انچیں مُسیبتے مے سرا کپتگ اَت کہ چہ مے اوپار ءَ ڈنّ اَت ءُ مے زندے امیت ھم ھلاس کت اَنت۔ ⁹ بلکیں ما سمجت مے مرکے ھکم آتکگ، مارا وتی سرا بیسہ نہ بوت بلکیں ھما ھُدائے سرا بیسہ بوت کہ مردگاں زندک کنت۔ ¹⁰ ھمائی مارا چہ اے وڑیں بلائیں بربادی ءَ رکّینت، ما امیت کنیں کہ دیما اوں مارا رکّینت۔ ¹¹ شما یکجاہ بہ بیت ءُ پر ما دوا بکن اِت تاکہ ھما نیامت مارا چہ باز مردمانی وجہ ءَ رستگ اَنت آئی ءِ شگر ءَ اوں بہ گِر اَنت چہ مے نیمگ ءَ۔ ¹² چیاکہ مارا وتی دل ءِ ای شاھدی ءِ سرا پَھر اِنت کہ مے کردار پہ دُگنیایا ءُ پہ شما جسمانی ھکمت ءِ گوما نہ اِنت بلکہ چہ ھُدائے پزل ءَ انت بزاں ھنچیں پلگاری ءُ سَپائی ءِ گوما کہ آ ھدائے لائک اِنت۔ ¹³ ما دگا گپ نبشتہ نہ کنیں بس ھما گپاں کہ شما وان اِت ءُ منّ اِت،من امیت کناں تا گڈ سرا شما منوگر بیت ای گپانی۔ ¹⁴ چہ شما بازیں ءَ منِّتگ اَنت کہ ما شمے پھر اں، ھنچو ھداوند یسوع ءِ روچ ءَ شما اوں مے پھرے۔ ¹⁵ ھمے بیسہ ءِ پدا من ارادہ کتگ کہ پیسرا شمے کرّا بیایا تاکہ شمارا دگا یک نیامت بہ رس ایت۔ ¹⁶ شمے کرّا بہ بان مکدُنیہ ءَ براواں ءُ چہ مکدُنیہ ءَ پدا شمے گورا واتر بہ باں ءُ شما منا یھودیہ ءَ راہ بدیئیت۔ ¹⁷ من کہ ای ارادہ کتگ اَنت گوں سردیں دل ءَ کتگ اَنت یا ھما گپانی کہ ارادہ کناں آیاں جسمانی تور ءَ بکناں کہ ھاں ھاں بہ کناں ءُ انّا انّا مہ کناں۔ ¹⁸ ھُدائے راستی ءِ کسم اِنت کہ مے ای کلام ءِ تہ ءَ ھاں ءُ انّا نیست۔ ¹⁹ چیاکہ ھدا ءِ چک یسوع مسیح کہ آئی منادی بزاں منا ءُ سلوانس ءُ تیمیتھس ءَ کتگ کہ آئی تہ ءَ ھان ءُ نہ دوئیں نیست اَت بلکیں آئی تہ ءَ ھان ءُ بس ھان بوتگ۔ ²⁰ چیاکہ ھُدائے چنچو وادہ اَنت آ تیوگا گوں ھان ءَ اَنت پمیشکا ھمائی واستا امین ھم بوتگ تاکہ مے وجہ ءَ ھدائے جلال زاھر بہ بیت۔ ²¹ او ھرچی مارا گوں شما مسیح کائم کنت ءُ مے سرا مُش ایت آ ھدا اِنت۔ ²² ھمائی مے سرا وتی مُھر اوں جت ءُ مے سرا زمانت ءِ ھسابا پاکیں روھے مے دل ءَ نادینت۔ ²³ من ھدایا شاھد کناں کہ من تنی وھدی کُرنتھس ءَ ای واستا نیاتکگ اں کہ شمار ھکّل ءُ نِھر بہ دیاں۔ ²⁴ ای وڑ نہ اِنت کہ ما شمے ایمان ءِ سرا واجھی کنگ لوٹیں بلکیں پہ دل ءُ سِتک شمے مددگاریں چیاکہ شما ایمان ءِ برکت ءَ مھکم اِت۔