¹ Pauli, umuwonvi wakwe Leza swinya umupositoli wakwe Yesu Kilisitu kuwusuwilwa wawantu awasolwe nu Leza nuwumanyinsanie wachisinka wuno wukuzumilizania nuwu leza, ² nuwusuwizi wawumi wamuyaya wuno Leza, wino asiwipa, walayizizye lyo impindi zyonsi zitani ziwe. ³ Pampindi yakwe wawumbuzile izwi lyakwe ukupitila mukuwizya mwakwechino nati nsuwilwa ukulingana nukukomelezya kwakwe Leza eketula witu. ⁴ Kwe Taitasi, umwananenye mwisuwilo. Inkumbu swinya umutende ukufuma kwe Leza ETata swinya Yesu Kilisitu eketula witu. ⁵ Pamulandu woo nakulesile mu krete alyakuti uwike ivintu mumasyo vino vyasyazile, nukulasika wasongo mutwaya tonsi ndimuno nakulanjizizye wewe. ⁶ Esongo azipizile atakawe nakasinza, umonsi uwa mwanachi wenga, uwawana wano awasuwilwa, wano wasi nulumbili luwipe nanti achilumba. ⁷ Chazipila ukuti esongo, wino akakolelela ing'anda yakwe Leza, atakawe nakasinza. Atazipila ukuwa uwakuyitutuwalika, nanti akuvitwa wangu, nanti akusendwa kwipala. nanti awakusunsa, swinya nanti amuntu umufunuke. ⁸ nakno fwendi wazipila awe awakupochelela aweni nukukunda chino achizima. wazipila awe awakwelengania, umulungamane, umutele swinya uwakuyilema. ⁹ Wazipila ukulemansya kwi landwe lyawuchisinka lino lyasambilizizwe. Ukuti awomye awawuye nichisambilizyo ichizima nukololosya wano wakumupanzika. ¹⁰ Amuno pali awantu awavule wachipiluko, awalande ivintayivwika nawakachenjezya, nkaninkani wano awaputulwe. ¹¹ Chazipila ukuwalesya. Wakavulungania imbumba zyonsi pakusambilizya ukusozwi nsoni ukwifungulo vino watazipizile ukusambilizya. ¹² Wenga uwawa kasesema wawo atili, '' wa krete awawufi penye, avitumbu iviwipe, awakata awawunuke.'' ¹³ ukulondolola koo akwachisinka. Achaleka wololosyani muwukali, ukuti wawe ichete mukusuwila. ¹⁴ Watazipila ukpechela kumilumbe yachi yuda pamwi kunkomelezyo zya wantu wano wakufuma kuwuchisinka. ¹⁵ Kwewano awaswepe, ivintu vyonsi aviswepe. Kweni kwe wano awawekwe nawantasuwila, pasi ichiswepe, kweni amelenganio yawo yonsi nintwitwi zyawo zyati ziwekwa. ¹⁶ Wakuwa vino awakumanya Leza, kweni wakumukana nimilomo yawo. Awakandamane, wantayivwila, awasita ukufichila ukuwomba umulimo wumwi uwuzima.