¹ Pauli, umupositoli we Kilisitu Yesu ukupitila mukuonda kwe Leza, ku wantu watele wakwe Leza mu Efeso, wano awasuwalikwa mwe Kilisitu Yesu ² nkumbu kwe mwemwe nu mutende ukufuma kwe Leza Etata witu ni Mfumu Yesu Kilisitu. ³ Lekani Eleza ne Tata wa Mfumu Yesu Kilisitu alumbulwe, wino ati apepa sweswe nuwupepwe wa cha muzimu chonsi mumasyo ya mwiyulu mwe Kilisitu. ⁴ Eleza wasozile sweswe mwakwe weliwe ukufuma pantaliko yansi, ukuti tuwe swe watele nasita akampifya muminso yakwe mulukundo. ⁵ Eleza wasozile sweswe pantaliko pakulelwa vino awana ukupitila Yeau Kilisitu, ukulingana nuwuzima wakusechelesya uwakulonda kawkwe. ⁶ Ukulelwa kwitu kukukonka mukutuvya kwa wuchindami wa nkumbu zyakwe zino atupilevye sweswe mwe wino amukunzile. ⁷ Mwakwe Yesu Kilsitu tuli ni pususyo ukupitila muwazi wakwe nukutetelwa kwa mbembu, ukulingana ni nsawu zya nkumbu zyakwe. ⁸ Wavuzizye inkumbu yoo pakwe sweswe ni njeru zyonsi nuwumanyichisanie. ⁹ Eleza wapanzile ukumanyikwa kwe sweswe imfundo invwame mukulonda kwakwe, ukulingana kwe chino chamusechelezizye weliwe, nachino walolesizye mwe Kilisitu, ¹⁰ Nakalolele ku melenganio pa mpindi yakukwana, pakuwika ivintu vyonsi ponga, ivintu vyonsi mwiyulu napansi, pansi pa mutwe wonga, ne Kilisitu nye. ¹¹ Mwakwe Kilisitu twasozilwe ukuwa awampyani. twelenginie pecho pakutalika ukulingana namelenganio yakwe weliwe wino akawomba chilichonsi ukulingana ni mfundo yakulonda kwakwe. ¹² Eleza wasozile sweswe ukuwa awampyani alyakuti sweswe, wano awantaliko pakusuwila mwe Kilisitu, kuliwa akutunvya kwa wuchindami wakwe. ¹³ Mwe Kilisitu, namwe swinya, pano mwalile mwivwa amazwi ayachine, ilandwe lyipususyo lyinu, mwasuwizile mwakwe weliwe mwawisilwe ichimanyikwilo chilayano lya muzimu mwimichile, ¹⁴ wino ansalamu yampyani yitu ukufichila twasenda insawu imfichilikwe kwe choo, kulutunvyo lwa wuchindami wakwe. ¹⁵ Pamulandu wakwe choo, ukufuma lyo nivwa ivya wusuwalikwa winu mu Mfumu Yesu nu lukundo lwinu ku wantu wonsi watele wakwe Leza, ¹⁶ Intatela ndeke ukusalifya Leza pakwe mwemwe pano nkulumbula mwemwe mumapepo yane. ¹⁷ Nkupepa ukuti eLeza wa Mfumu Yesu Kilisitu, eTata wauchindami, alipa mwemwe umuzimu wa njelu nukuwumbulika muwumanyinsyanie wakwe weliwe. ¹⁸ Nkupepa kuno aminso ya mwenzo winu yazipizile yawalilichilwe, ukuti mumanye ukusuwila kwe cho wawawita mwemwe ni nsawu zyawuchindami ya mpyani wakwe muwantu wakwe Leza wonsi awatele. ¹⁹ Mumapepo yane nkulenga kuno mufwile mumanye uwukulu wamaka yakwe ayalusye kwakwe sweswe wano tukusuwila, ukulingana nakumiwombele yawukulu wanzuto zyakwe. ²⁰ Amaka ayaliyonga yano Leza wawombezile mwe Kilisitu pano wamuzyulupusizye kuwufwe nukumwikazya kwi kasa lyendilo mumasyo yamwiyulu. ²¹ Wikazizye Kilisitu papela uwukavinda wonsi ni nsambu namaka nukuchinvya, nga ni zina lyonsi lino likutakwa. Kilisitu alivinda, asampindivye yoo, kweni nimpindi yino yikwiza. ²² Leza wawisile ivintu vyonsi pansi pamatamba ye Kilisitu nukupa weliwe ku Keleziya ukuwa amutwe pa vintu vyonsi. ²³ Ikeleziya amuwili wakwe, ukufichilikwa kwakwe weliwe akafichilisya mwakwe vyonsi