¹ Lelo kwakwe mwemwe, mwafwile mumawembuko na mbembu zyinu. ² Mwalinji amumawembuko yaa na mumbembu zino mwatezile mwawamo ukulingana ni nzila zyansi yoo. Mwikalanga ukulingana ne kavinda wansambu zyamwilewelewe, umuzimu wuno wukuwombela muwana wantayivwila. ³ Twatezile twikala muwantu waa, ukufichilisya ivikumbuchilwa viwipe vya mbembu zyitu zyamumiwele, nukufumya ivikumbuchilwa vyamuwili ni vya melenganio. Twalinji swe wana wawukalale wamiwele yitu, ndivino ku wantu wonsi. ^{4 5 6 7} Kweni Leza amwizule muwila pamulandu wawukulu walukundo lawkwe kwe luno wakunda sweswe. Pano tawlinji swe wafwe mumawembuko, wapanzile sweswe awawumi ponga mwe Kilisitu_mwati mupusukwa ni nkumbu. Leza wazyulupusizye sweswe ponga ne Kilisitu, swinya Leza wapanzile sweswe ukwikala ponga mumsyo ya mwiyulu mwakwe Yesu Kilisitu, akulikuti ku mpindi yino yikwiza afwile alanjizye kwe sweswe uwukulu wa nsawu zyakwe izintapimwa izya nkumbu zyakwe zino zikulondololwa mu chikuku chakwe kawkwe sweswe mwe Kilisitu Yesu. ⁸ Amunomwati mupusukwa pawila ukupitila mwisuwilo, swinya choo chitafumile kwe mwemwe, achawupi che Leza, ⁹ asacha kufuma mumilimo, ukuti wumwi atayitutuwalika. ¹⁰ Amuno swe wuwombeli we Leza, awelewulwe mwe Kilisitu Yesu pawomba imilimo mizima yino Leza welenginie kali pakwe sweswe, ukuti twapita mwakwe yoliyo. ¹¹ Achaleka yizuka kuno mwatezile mwawa awamakandi mumuwili. Mukwitwa"uwuntaputulwa" pakwe chino chikwitwa "uwuputulwa" mumuwili uwupangwe namakasa ya wantu. ¹² Amuno pampindi lyanye mwapawusilwe kwe Kilisitu, wamwizilila kuwantu wawina Israyeli, aweni kwi pangano lyi layano, ukuntawa nukusuwila nukusita kuwane Leza munsi yapansi. ¹³ Kweni kanonzi mwe Kilisitu Yesu mwemwe wano mwatezile mwataluka kwe Leza mwati muletwa kupipi nu wazi we Kilisitu. ¹⁴ Amuno weni amutende witu. Wapanzile wawili wenga. Numuwili wakwe wononile uluwumba lwawalwani luno lwankinie sweswe. ¹⁵ Achino, wamazizye isundo lyankomelezyo ni nkochelezyo ukuti azipozile ayelewule wumwi umuntu umupya mwakwe weliwe wenga, nga apanga umutende. ¹⁶ Kilisitu akumanyania awantu wonsi mumuwili wonga kwe Leza ukupitila uwuchingane, pakukoma uwulwani. ¹⁷ EYesu wizile nukuwizya umutende kwe mwemwe wano mwatalusile numutende kwe wano walinji kupipi. ¹⁸ Amuno ukupitla eYesu sweswe swensi tuli nuwuwombeli mumuzimu wonga kwe Tata. ¹⁹ Apano, kanonzi mwe wamakandi musi aweni swinya nawa mwizilila. ukuwa mwe wikazi awanji nawantu watele awe Leza ni vyawi vya ng'anda ye Leza. ²⁰ Mwati muzengwa palufula lwa wapositoli nawakasesema, ne Kilisitu Yesu weliwenye aliwe lye pekona. ²¹ Mwakwe weliwe uwuzengwe wonsi wukuwikwa ponga nukukula vino ang'anda yakupepelamo mu mfumu. ²² Amwakwe weliwe kuno namwe swinya mwati muzengwa ponga vino amasyo yakulala Leza mumuzimu