Pasal 11

Yohanes diemias aso Jesus, e dutani pa. (Nanapi Lukas 7:18:35 pai kota)

1 Jesus tiopanariri kavo so nie murit suramuandua pa sia to manau pa, suvi vurusu jana. Ria dieniaue ditopanusara Sien Allah nie arer pai nanapi Kota vederiasi pasi. 2 Apa Yohanes viono Kambu Sren e venana bui pai, diediawa Jesus nie nanari- pi pai. Apa diemias nie murit pesia e senda so Jesus e setutanie setojo: 3 "Avo au rua ariri Sien Allah nie arer pai ma pa te, amatanota siniotu vevesieie ?" 4 Amana Jesus ruar so siae diojo, "Mesovera so Yohanes e metopa so i, nana pi vitosi metadiawa e mesajosi pa; 5 Toapa, veremi kaber pa sesajo, veraemi marera pa senda, vepota pado pa sepanaam; vene taradiau poya pa setadiawa, vevoru pa setenam riwanea, e Sien Allah nie Kavo Vesie pai tiopanusara maso kaiwasa vevaro pi pa sia. 6 Vesie maso siniotu vekavo irara Ya va pa sia.'' 7 Yohanes nie amias pa senda to manau pa, janama Jesus kievo so kaiwasa pai, nanapi Yohanes, Jesus kievore diojo, "Vitoni menda mesajori nana mapar rubua wai pa? Sasa wana pai sio riria e vemanawar ninae? 8 Ite vitoni menda mesajori pa? Mesajo siniotu vesasun nana sasu vesasie nina te? Siniotu vesasun nana sasu vesasie pasi ma, sinana pa, anio Raja. 9 Apavo menda so mapar rubua wai so vito? Mesajo nabi nina te? Ariria, vape i ma riewai nanapi nabi. 10 Aso Yohanes jani nina, andı ayat venana Surat Repo pai kievo nanai pa, toapa, Sien Allah kievore diojo, Ine Amias pai nine, jemias i, e piepon Au, ave amamo dierara ria anota Au.' 11 Itopa so mia, "Nana dunia nei mamo, varo siniotu vebaba rawai Yohanes vion Kambu Sren pai. Toa saridioi e, kaiwasa venanapi Sien Allah nie uta vie prenta nana wa sia, siniotu vemadia rawai pa sia, sebaba rawai Yohanes. 12 Nanapi rabua Yohanes tiopa nie aniau pai pa, veito rabua nine, siniotu pasi sio sasera ve simuvediora Sien Allah nie Kaiwasa pai tutir ria vekarakuai. 13 Veito rabua Yohanes riama ne, Musai prenta diona pasi vura e Nabi pa sene aniau pasi, sierera pi veve diadi mo pasi. 14 E, meto mesanemitiar mamo, Yohanes ma joma Elia nina, andi vie arer to manau so riama pa. 15 Membe taradiau mamo, ite metadiawa! 16 Avo nari isora tarawa kaiwasa rabua ninesia nanapi vito? Sembava ariri atuma vemasoi na pasar. Esia sesau so esia e setojo, 17 Tamei ranu vemamasar so mia, vape menggambarai memajai, tandoi roi sai so mia, vape menggambarai mesai.' 18 Yohanes riama dian pisia va, dunu kambu va, dieriori so Sie pai pavo, dunu anggur va vape kaiwasa pai diojo wainunu vekariria pa sira savui. 19 Janama Siniotu Atu ne irama, Yapie Junu; vape kaiwasa kievore diojo, 'Mesajo siniotu wai, diapi bariu, dunu bariu, vie maneta tutir siniotu veruir pajak e, vie maneta tutir siniotu veve tatar. Toapa jana, vape Sien Allah nie paya pai vieruana nana Nie nanaripi pai."

Jesus Kiesiou Kota vesanemitiar I va pa sia pa. (Nanapi Lukas 10-13-15 pai kota)
20 Avori Jesus sisiajara Kota vieruana pitandor to pau nana pasi. Aso kaiwasa venana Kota ja sia, senggambarai semanau sene tatar pasie sesovera so Sie pai pa. 21 Kievore diojo, 'Kawai so Kota Korasin au; e kawai so au kota, Kota Betsaida! Pitandor veveruana tomanau so mia nesi, siveruana nanapi Kota Tirus tutir Sidon, areto kaiwasa venana pa sia nari semanau sene tatar pa sie, sesovera so Sie pai papo, e sesasun sia nanapi sasu vemandat e sepir wavu nanapi sendumi pasi. 22 Vape Itopa so mia, nana raria dunia nei kieriria wa mamo, mene hukuman pai nari mierabat rawai, nanapi kaiwasa venana Kota Tirus tutir Sidon pai. 23 Mae Kota Kapernaum au ma, nari seposasan au raajai so rora wae? Sa piva, nari sengge au ravav so uta vevoru pa senana wa. Aso masi pitandor veveruana so mia pasi, iveruana si nanapi Sodom, areto Sodom andia veito rabua nine. 24 Vape Itopa so mia, nanapi raria dunia nei kieriria wa mamo, mene hukuman pai ma nari mierabat rawai nanapi hukuman venana Kota Sodom pai.
Yesus vie trima kasi so Tamani pa e, siniotu pa sirama soi pa. (Nanapi Lukas 10:13-15 pakota)
25 Nanapi diam jani Jesus kievore diojo, 'Sie rora e kakopa, Itopa trima kasi so Au, aso pi jasi vura bueniwarasi vurusu siniotu veve pande pa si, mae vueruanasi maso siniotu vianiau va pasi pa. 26 I ma vio sanevesieni so Yai au pana. 27 Avori Jesus kievore diojo; Pi vura Yai siwasi maso Ya to manau. E esi disajo riruin Atu pai va, Tama pai miesari. E esi disajo riruin Tama pai va, Atu pai miesari, e maso Siniotu Atu ne Yau, vieruana Tama pai soa pa sia. 28 Mendama soa pa Yau, vemarior pa mia vura, e vesariou marabat pa mia; nari Jono andei maso mia. 29 Mendausara pa ine prenta nesi e metaniau nana pa Yau. Aso Ya ma. Yo mesamuai vesie pananesi va, e isanandik Ya va, apavo nari pa. 30 Aso Ine Prenta nesi ma, sio sanevesieni, e pi Jona e mesariowa ne ma, tapisa."