¹ Ad-adda a nasikap ti uleg ngem kadagiti amin nga ayup nga inaramid ni Yahweh a Dios. Kinuna ti uleg iti babai, "Agpayso kadi nga imbaga ti Dios kadakayo, 'Saanyo a kanen ti bunga manipud iti aniaman a kayo iti minuyongan'?" ² Simmungbat ti babai, "Ti imbaga ti Dios ket, 'Saanyo a kanen ti bunga ti kayo nga adda iti tengnga ti minuyongan wenno sagiden man laeng daytoy. No aramidenyo dayta, mataykayo. ³ Ngem mabalinyo a kanen ti aniaman a bunga dagiti dadduma a kayo. ⁴ Kinuna ti uleg iti babai, "Saan, saan a pudno a mataykayo. Imbaga laeng ti Dios dayta ⁵ gapu ta ammona nga inton mangankayo iti bunga manipud iti dayta a kayo, maawatanyo dagiti barbaro a banbanag. Kaslanto nalukatan dagiti matayo, ken maamoanyonto no ania ti nasayaat nga aramiden ken ania ti dakes nga aramiden, a kas iti Dios." ⁶ Nakita ti babai a ti bunga dayta a kayo ket nasayaat a kanen, ken makaay-ayo unay daytoy. Tinarigagayanna daytoy gapu ta napanunotna a pasiriben isuna ti bunga ti kayo. Isu a nangpuros isuna iti sumagmamano a bunga ket kinnanna. Ket intedna ti dadduma iti asawana, ket kinnanna met daytoy. ⁷ Dagus a kasla nalukatan dagiti matada, ket naamirisda a lamolamoda, isu a nagbainda. Nangalada ngarud iti bulbulong ti igos ken dinaitda dagitoy tapno agbalin a pagan-anayda. ⁸ Iti dayta a malem, idi nagpuyupoy iti nalammiis nga angin, nangngegda ti arimpadek ni Yaweh a Dios kabayatan a magmagna isuna iti minuyongan. Isu a naglemmeng ti lalaki ken ti asawana kadagiti babassit a kaykayo iti minuyongan tapno saan ida a makita ni Yahweh a Dios. ⁹ Ngem inayaban ni Yahweh a Dios ti lalaki, kunana kenkuana, "Apay a padpadasendak nga ilemmengan?" ¹⁰ Simmungbat ti lalaki, "Nangngegko ti arimpadekmo iti minuyongan, ket gapu ta lamolamoak, nagbutengak ngarud ket inlemmenganka." ¹¹ Kinuna ti Dios, "Kasano a naammoam a lamolamoka? Nanganka siguro iti bunga ti kayo nga imbagak kenka a saanmo a kanen ania? Kasta kadi ti inaramidmo?" ¹² Kinuna ti lalaki, "Intedmo kaniak daytoy a babai nga agbalin a kaduak. Isuna ti nangted kaniak iti bunga iti kayo, ket kinnanko ngarud." ¹³ Ket kinuna ni Yahweh a Dios iti babai, "Apay nga inaramidmo iti kasta?" Simmungbat ti babai, "Kinnanko ti bunga gapu ta inallilawnak ti uleg." ¹⁴ Ket kinuna ni Yahweh a Dios iti uleg, "Gapu ta inaramidmo ti kastoy, sika laeng ti ilunodko kadagiti amin a naamo ken narungsot nga ayup. Kas nagbanaganna, sika ken dagiti dadduma pay nga uleg ket aguyasto, ket addanto tapok iti aniaman a kanem inggana nga agbibiagka. ¹⁵ Pagbalinenkayonto nga agkabusor iti babai, ket pagbalinekto nga agkabusor ti kaputotam ken ti kaputotan ti babai. Kagatemto ti mukodna, ngem tumekennanto ti ulom." ¹⁶ Ket kinuna ni Yahweh iti babai, "Paglak-amenkanto iti nakaro nga ut-ot no kasta nga agpasngayka. Kayatemto a makadua ti asawam, ngem iturayannakanto." ¹⁷ Ket kinunana iti lalaki, "Dimngegka iti imbaga ti asawam, ken nanganka iti bunga ti kayo nupay imbilinko kenka a, 'Saanmo a kanen daytoy,' Isu a pagbalinekto a narigat a patubuen dagiti banbanag iti daga gapu iti inaramidmo. Masapul nga agtrabahokanto iti kasta unay kabayatan nga agbibiagka tapno makapataudka kadagiti banbanag a kanem manipud iti daga. ¹⁸ Agtubonto dagiti naduma-duma a kita iti nasiit a ruot ken dadduma pay a kita iti ruot, ket lappedanto dagitoy ti panagdakkel ti inmulam. Ket tapno adda kanem, masapul a manganka kadagiti banbanag a nagtubo lattan iti kataltalunam. ¹⁹ Iti unos ti panagbiagmo, agling-etkanto iti panagtrabahom tapno maaddaanka iti taraon a kanem. Ket mataykanto, ken maitabonto ti bagim iti daga. Inaramidka manipud iti daga, ket agbalinto ngarud metlaeng a daga ti bagim." ²⁰ Pinanaganan ti lalaki a ni Adan ti asawana iti Eva, a ti kayatna a sawen ket "sibibiag," gapu ta isuna ti nagbalin a kapuonan dagiti amin nga agbibiag a tattao. ²¹ Ket nangpatay ni Yahweh a Dios kadagiti ayup ket nangaramid isuna kadagiti kawes manipud kadagiti lalat dagitoy para kenni Adan ken ti asawana. ²² Ket kinuna ni Yaweh, "Kitaenyo! Nagbalin a kas kadatayo dagiti dua gapu ta ammoda no ania ti naimbag nga aramiden ken dakes nga aramiden. Ita ngarud, saanen a nasayaat no manggaw-atda ken mangpurusda ket manganda iti bunga ti kayo a mamagbalin kadagiti tattao a mangan iti daytoy nga agbiag iti agnanayon!" ²³ Isu a pinapanaw ni Yahweh a Dios ti lalaki ken ti asawana manipud iti minuyongan ti Eden. Pinarsua ni Yahweh a Dios ni Adan manipud iti daga, ken inkapilitanen nga aradoenna ti daga. ²⁴ Kalpasan a pinapanaw ida ni Yahweh a Dios, nangikabil isuna iti maysa a kerubim ken maysa a gumilgil-ayab a kampilan nga agrikrikos, tapno maserraan ti pagnaan nga umuneg iti minuyongan, iti kasta ket saanen a makasubli dagiti tattao iti kayo a makaited iti biag nga agnanayon iti siasinoman a mangan iti bungana daytoy.