¹ Kasta ti wagas a panangparsua ti Dios kadagiti langit ken iti daga ken kadagiti agbibiag a parsua a nangpunno kadagitoy. ² Iti maika-pito nga aldaw, nalpas ti Dios ti panangparsuana iti amin a banag, isu a saanen a nagtrabaho iti dayta nga aldaw. ³ Impakaammo ti Dios a para kenkuana ti tunggal maika-pito nga aldaw. Inlasinna dagidiay nga aldaw nga agbalin a naisangsangayan gapu ta iti maika-pito nga aldaw, saanen a nagtrabaho ti Dios, kalpasan iti panangparsuana iti amin a banbanag. ⁴ Ti sumaganad ket ti panangparsua ti Dios kadagiti langit ken iti daga. Ti Dios, a ti naganna ket Yahweh, inaramidna dagiti langit ken ti daga. ⁵ Idi damo, awan pay dagiti agtubtubo a mulmula, gapu ta saan pay a pinagtudo ni Yahweh a Dios iti rabaw ti daga. Maysa pay, awan ti mangarado iti daga a pagmulaan kadagiti mulmula. ⁶ Ngem ketdi, adda angep a nagpangato manipud iti daga isu nga adda danum iti entero a rabaw ti daga. ⁷ Kalpasanna, nangala ni Yahweh a Dios iti daga ket nangaramid iti tao. Inyangesna iti agong ti tao ti bukodna nga anges a mangted biag kadagiti banbanag ket nagbalin a naan-anay a sibibiag ti tao. ⁸ Nangaramid ni Yahweh a Dios iti minuyongan iti lugar nga Eden ti naganna, nga adda iti dayaen ti daga ti Canaan. Sadiay ti nangikabilanna iti tao nga inaramidna. ⁹ Pinagtubo ni Yahweh a Dios manipud iti daga ti tunggal kayo a napintas a kitaen ken agbungbunga iti prutas a nasayaat a kanen. Inkabilna met iti tengnga ti minuyongan ti kayo a ti bungana ket mangted iti biag nga agnanayon iti siasinoman a mangan iti daytoy. Inkabilna pay idiay ti maysa a kayo a mangted iti kabaelan a mangammo iti nasayaat ken dakes nga aramiden iti siasinoman a mangan iti daytoy. ¹⁰ Adda karayan nga agay-ayus manipud Eden a mangdanum iti minuyongan. Iti ruar ti Eden, nagkapat ti karayan. ¹¹ Ti nagan ti umuna a karayan ket Pison. Agay-ayus dayta a karayan iti entero a daga ti Havila, a pakasarakan iti balitok. ¹² Puro unay dayta a balitok. Adda met sadiay iti nabanglo a tutot a maawagan iti bidelium ken napapateg a bato a maawagan iti onix. ¹³ Ti maika-dua a karayan ket Gihon. Agay-ayus dayta a karayan iti entero a daga ti Cus. ¹⁴ Ti maika-tallo a karayan ket Tigris. Agay-ayus daytoy iti dayaen ti siudad ti Assur. Ti nagan iti maika-uppat a karayan ket Eufrates. ¹⁵ Innala ni Yahweh a Dios ti tao ket inkabilna daytoy idiay Eden tapno aradoen ken aywananna daytoy. ^16-17 Ngem kinuna ni Yahweh kenkuana, "Iparitko a kanem ti bunga ti kayo a mangted iti kabaelan kenka a mangammo kadagiti tignay a nasayaat ken dakes nga aramiden. No manganka iti bunga manipud iti dayta a kayo, sigurado a matayka iti tiempo a kanem daytoy. Ngem ipalubosko a kanem ti amin a bunga dagiti dadduma a kayo nga adda iti minuyongan." ¹⁸ Kinuna ni Yahweh a Dios, "Saan a nasayaat nga agmaymaysa daytoy a lalaki. Mangaramidak ngarud iti maitutop a kaduana." ¹⁹ Nangala ni Yahweh a Dios iti daga ket inaramidna ti amin a kita dagiti ayup ken dagiti tumatayab ket inyegna dagitoy kenkuana tapno denggenna no ania ti ipanaganna kadakuada. Ket pinanagananna ti tunggal sibibiag nga ayup nga inaramid ni Yahweh a Dios. ²⁰ Ket pinanaganan ti tao ti amin a kita ti dingwen, tumatayab, ken naatap nga ayup, ngem awan kadagitoy a parsua ti maitutop iti tao. ²¹ Pinaturog ngarud ni Yahweh a Dios iti nasimbeng ti lalaki. Kabayatan a matmaturog ti lalaki, nangala ni Yahweh iti maysa kadagiti paragpagna. Ket dagusna nga inrekep ti nangalaanna iti daytoy ket pinaimbagna. ²² Inaramid ni Yahweh ti babai manipud iti paragpag nga innalana manipud iti bagi ti lalaki ket inyegna daytoy kenkuana. ²³ Kinuna ti lalaki, "Kalanglangakon daytoy! Ti tulangna ket naggapu kadagiti tulangko ken ti lasagna ket naggapu kadagiti lasagko. Awagak ngarud isuna iti babai, gapu ta nagtaud isuna kaniak a lalaki." ²⁴ Ti immuna a babai ket naala manipud iti bagi ti lalaki. Isu a no agasawa ti lalaki ken babai, masapul a panawanda dagiti nagannakda. Agkaduada a nasinged tapno iti kasta ket kaslada la maymaysa a tao. ²⁵ Numan pay lamolamo ti lalaki ken ti asawana, saanda nga ibain iti kinalamolamoda.