¹ Idi agtawen ni Sarah iti 127, ² natay isuna idiay siudad ti Kiriat Arba, a maaw-awagan itan iti Hebron, iti daga ti Canaan. Ket dinung-awan isuna ni Abraham. ³ Pinanawanna ti bangkay ti asawana ket nakisarita kadagiti sumagmamano a kaputotan ni Het, a kinunana. ⁴ "Makipagnanaedak laeng kadakayo, isu nga awan ti kukuak nga aniaman a daga ditoy. Lakkuandak iti sumagmamano a daga ditoy tapno maitabonko ti bagi ti asawak." ⁵ Simmungbatda kenkuana, ⁶ "Apo, maysa ka a naindaklan a tao kadakami, mangpilika iti maysa kadagiti kapipintasan a pangitantanemanmi ket itabonmo ti bangkay ti asawam iti daytoy. Awan kadakami ti agkedkedto a mangilako iti dagana kenka a pangitanemam iti bangkay ti asawam." ⁷ Ket timmakder ni Abraham ken nagruknoy iti sangoanan dagiti tattao kas panagraem kadagiti akinkukua iti daga, dagiti kaputotan ni Het. ⁸ Kinunana kadakuada, "No kunayo a sipapaluboskayo nga itabonko ti bangkay ti asawak ditoy, denggendak koma ngarud, ket kiddawenyo kenni Efron a putot ni Zohar, ⁹ nga ilakona kaniak ti rukib iti disso ti Macpela, nga adda iti pungto ti taltalonna. Kiddawenyo pay kenkuana nga ilakona daytoy kaniak iti tumutop a gatad a kayatna, ken ilakona kaniak iti sangoananyo amin. Iti kastoy a wagas ket maaddaanak iti daga a pagitaneman." ¹⁰ Itatta, agtugtugaw ni Efron a kadua dagiti tattao iti ruangan ti siudad a naguummongan dagiti kaputotan dagiti Heteo. Nangngeganna ti kinuna ni Abraham kadakuada. ¹¹ Ket kinuna ni Efron, "Saan, apo, denggennak. Itedkon kenka ti taltalon ken ti rukib nga adda iti masakupan daytoy, nga awan bayadna, ket saksi dagiti adda a tattao ditoy. Itabonmo koma ti asawam sadiay." ¹² Nagruknoy manen ni Abraham iti sangoanan dagiti tattao nga agnanaed iti dayta a daga, ¹³ ket kinunana kenni Efron, bayat a dumdumngeg amin dagiti dadduma, "Saan, denggennak. No sipapaluboska, bayadak ti taltalon. Ibagam kaniak no mano ti gatadna, ket itedkon kenka. No awatem daytoy, kukuakton ti taltalon, ket mabalinko nga itabon ti bangkay ti asawak sadiay." ¹⁴ Simmungbat ni Efron kenni Abraham, a kinunana kenkuana. ¹⁵ "Apo, denggennak. Ti gatad ti daga ket uppat a gasut a pidaso ti pirak. Ngem ti gatad ket awan ti aniamanna kaniam ken kaniak. Itedmo kaniak ti kuarta ket itabonmo ti bangkay ti asawam sadiay." ¹⁶ Ket immanamong ni Abraham kenni Efron maipanggep iti gatadna, ket nangtimbang para kenni Efron iti uppat a gasut a pidaso ti pirak nga insingasingna, bayat nga agdengdengngeg ti amin nga adda sadiay. Inusarna ti umno a pagtimbangan para kadagiti pirak nga us-usaren dagiti tattao nga aglaklako. ¹⁷ Isu a ti taltalon ni Efron idiay disso ti Macpela, iti asideg iti Mamre, ken ti rukib nga adda iti taltalon, ken dagiti amin a kayo nga adda iti taltalon ken dagiti mohon ti ketegan ti daga, dagitoy amin ket nagbalin a sanikua ni Abraham, ¹⁸ Kastoy ti wagas a pananggatang ni Abraham iti sanikua, bayat a dumdumngeg amin dagiti kaputotan ni Het iti ayan ti ruangan ti siudad. ¹⁹ Kalpasan dayta, intabon ni Abraham ti bangkay ni Sarah iti rukib nga adda iti taltalon iti disso ti Macpela iti asideg ti Mamre, a maaw-awagan itan iti Hebron, idiay daga ti Canaan. ²⁰ Isu nga iti taltalon ken ti rukibna ket napasingkedan a nailako kenni Abraham babaen kadagiti kaputotan ni Het, tapno usarenna a kas daga a pagitaneman.