¹ Kalpasan iti sumagmamano a tawen, sinuot ti Dios ni Abraham tapno maamoanna no agtulnog met laeng kenkuana. Inawaganna ni Abraham, ket simmungbat ni Abraham, "Adtoyak." ² Kinuna ti Dios, "Alaem ti putotmo a ni Isaac, a dungdungoem unay, ti kakaisuna nga anakmo nga inkarik nga itedko kenka. Ket mapankayo iti daga ti Moriah, ket sumang-atkayo iti bantay nga ipakitak kenka, ket idatonmo isuna a kas daton a mapuoran." ³ Bimmangon ngarud a nasapa ni Abraham iti dayta a bigat, insaganana ti asnona, ket nangikuyog iti dua kadagiti adipenna, kaduada ti putotna a ni Isaac. Nangbalsig met isuna iti kayo a pagaron a pangpuor iti daton a mapuoran. Kalpasanna, inrugida ti panagdaliasatda nga agturong iti lugar nga imbaga kenkuana ti Dios. ⁴ Iti maikatlo nga aldaw a panagdaldaliasatda, timmangad ni Abraham ket nakitana iti adayo ti lugar a kayat ti Dios a papananda. ⁵ Kinuna ni Abraham kadagiti adipenna, "Agbatikayo ditoy a dua agraman ti asno kabayatan a dakami ken ti ubing a lalaki ket mapankami sadiay. Sadiay, agdayawkami iti Dios, kalpasanna, agsublikaminto kadakayo." ⁶ Ket innala ni Abraham ti kayo a pagaron a pangpuor iti daton a mapuoran ket impabaklayna iti anakna a ni Isaac. Nangbagkat met ni Abraham iti mausar a pagpasged. Nangitugot met iti immuko, ket nagkuyogda kenni Isaac a nagna. ⁷ Kalpasanna, nagsao ni Isaac iti amana a ni Abraham, kinunana, "Ama." Simmungbat ni Abraham, "Wen, anakko, adtoyak!" Kuna ni Isaac, "Kitaem, addaantayon iti kayo ken beggang a pangpasged iti apuy, ngem sadino ti ayan ti kordero nga agpaay kas daton a mapuoran?" ⁸ Simmungbat ni Abraham, "Anakko, ti Dios a mismo ti mangisabetto iti kordero nga agpaay kas daton a mapuoran." Intuloyda ngarud a dua iti nagna. ⁹ Nakadanonda iti lugar nga imbaga ti Dios a papananda. Sadiay, nangbangon ni Abraham iti altar a bato ket inurnosna ti kayo iti rabaw daytoy. Kalpasanna, pinungona ti putotna a ni Isaac kat impaiddana iti rabaw ti altar, iti rabaw ti kayo. ¹⁰ Ket innala ni Abraham ti immuko ket inggaw-atna ti imana tapno papatayenna ti putotna a lallaki ¹¹ Ngem inawagan isuna ti anghel ni Yahweh manipud langit ket kinunana, "Abraham! Abraham!" simmungbat ni Abraham, "Adtoyak!" ¹² Kinuna ti anghel, "Saanmo a dangran ti ubing, gapu ta napaneknekakon ita a raraemen ken agtultulnogka iti Dios. Ammok daytoy gapu ta saanka a nagkedked a mangidaton iti kakaisuna nga anakmo." ¹³ Kimmita ni Abraham ket nakakita iti kalakian a karnero iti asideg, a naisalat ti sarana iti kasamekan. Napan ngarud innala ni Abraham ti kalakian a karnero ket pinatayna daytoy, ken indatonna iti rabaw ti altar a kas daton a mapuoran, imbes a ti putotna. ¹⁴ Pinanaganan ni Abraham dayta a lugar iti "Ni Yahweh ti mangisabet." Inggana kadagitoy nga al-aldaw, kunkuna dagiti tattao " Idiay bantay ni Yahweh, mangisabetto isuna." ¹⁵ Immawag ti anghel ni Yahweh ni Abraham manipud langit iti maikadua a daras. ¹⁶ Kinunana, "Siak a ni Yahweh, ibagak kenka nga inaramidmo ti imbagak kenka ket saanmo nga impaidam ti bugbugtong nga anakmo. Isu a sipapasnekak nga agkari, ket ti bagik ti saksi, ¹⁷ nga umadunto dagiti kaputotam a kas iti kaadu dagiti bituen iti tangatang ken kadagiti binukel ti darat iti igid ti baybay. Abakento dagiti kaputotam dagiti kabusorda ken tagikuaendanto dagiti siudadda. ¹⁸ Nagtulnogka kaniak, isu a babaento kadagiti kaputotam, mabendisionanto dagiti tattao iti amin a nasion ditoy lubong." ¹⁹ Ket nagsubli da Abraham ken Isaac iti pagur-urayan dagiti adipenna, ket nakukuyogda a nagsubli idiay Beerseba, ket intuloy ni Abraham ken dagiti tattaona ti nagtalinaed sadiay. ²⁰ Kalpasan a napasamak dagitoy a banbanag, adda iti nangibaga kenni Abraham, "Ti asawa ti kabsatmo a lalaki a ni Nahor, a ni Milca, ket naadaan met ti anak." ²¹ Ket ti inauna nga anakna a lalaki ket ni Uz. Ti simmaruno ket ni Buz. Simmaruno kenkuana ket ni Kemmuel nga ama ni Aram. ²² Ti simmaruno kenni Kemmuel ket ni Kezed, kalpasanna ni Hazo, kalpasanna ket ni Pildas, kalpasanna ket ni Jidlaf, kalpasanna ket ni Betuel. ²³ Ni Betuel ti Ama ni Rebecca. Dagidiay dagiti walo nga annak a lallaki ni Milca, nga asawa ti kabsat a lalaki ni Abraham a ni Nahor. ²⁴ Adda met iti inkabbalay ni Nahor, a ti naganna ket Beuma. Naganak isuna iti uppat a lallaki: Ni Teba, ni Gaham, ni Taaz ken ni Maaca.