¹ 1. ए मारा लाड़का बायह बोणहा मी तुमुह खूब मोंग कोरतलू एने तुमुह देखणे इच्छा कोरतलू ए लाड़का तुमु मारी मुकुटोन होस से इने रीते तुमु पोरबू यीशुमा खोरा टीकिन रोयू | ² 2. यूओदिया एने सुन्तुखे इन दुय बायरानुह मी रावण्या कोरतलू तुमु पोरबू यीशु हाते एक मोन ओयिन मिविन रोयजु |

³ 3.एने ए मार खोरु सात देणारा तीनु दुय बायराह शांती पर रोयणे तु मोदत कोरजी कोरीन मी तोंहो रावण्या कोरतलू काहाके यीशुन हाजी खोबर दिहराह कोयणे मारहाते , एने क्लेमेंस हाते एने दिहरा मार हाते काम कोरनारा हाते खूब मेहनुत कोरला तिंदरे नाव ज्यों जोलमकीज जीवायोन चापडामा लेखाय रोयोह | ⁴ 4. पोरबू यीशुमा जोलेमका खुशिमा रोयू एने खुशिमा रोयू कोरीन मी तुमुह फोसु कोयतलु | ⁵ 5. आखा माणहोह तुमु हुवाव्वा बोणीन रोयतला कोरीन मालूम पोडनु जुवे पोरबू यीशु फोसु जल्दी आवणेवालु से यो तुमु वीहोरता जुण |

⁶ 6. तुमु कायतान बारामा बी चींता जुण कोरता बाकिनआखि वातोन कोरता पोरथना कोरजू तुमुह ज्यों काय जुवे बोगवानोह कोयजु एने ज्यों काय च्यु तुमरे करता कोरलु च्यों आखों ओर कोरीन बोगवानोह धन्यवाद कोरजू |

⁷ 7. जर तुमु एंहे कोरे ते बोगवान तुमुह ओहली शांती आपहे के तुमरा सोमझोन बारथे से | एने यी शांती यीशु मसिह हाते तुमु जीवणेमा तुमरा मोनोन विचारोन राखवावी कोरहे | ⁸ 8. एने एंवी ए मार बायहा ज्या ज्या वाते खोरा से ज्या ज्या माननेन लायकोन से ज्या ज्या वाते हाजा से ज्या ज्या वाते चूखला से ज्या ज्या वाते खुशीन से ज्या ज्या वाते नावलायला से ज्या ज्या वाते खूब हाजा गुणोन से एने ज्या ज्या वाते बोंडायी कोरनेन से इनु आखान बारामाज विचार कोरता रोयू |

⁹ 9 ज्या काय तुमु मेंहे दोखा हिकला एने जाण रोयाह एने मेंहे दोखा होंबवला एने ज्यों काय मी कोरतलु देखला च्यों आखा तुमु कोरता रोयजु तेतार बोगवान ज्यू आपुह शांति आपणारु से तुमरे हाते रोयहे ¹⁰ 10. खूब दिहोमा तुमु मार बारामा चीं ता कोरने विचार कोरला मी पोरबू यीशुमा खूब खुश से मी जाणतलु के तुमु मारी फिकुर कोरतला पूण एंवी लोगोण मेंहे मोदत कोरने तुमुह शांती नी जुडी ¹¹ 11.मेंहेपर कायिज निंबेदे कोरीन मी एंहे नी कोयतलु काहाके ज्यों काय मेंहेपर से तीनामाज होमेस्या खुशिमा रोयणे हीक गोयलु से | ¹² 12.मेंहे पर कोम से एंने मेंहे पाह आखों से ती बी केंहेक जीवणू कोरीन मेंहे मालूम से आखि जाणे एने आखि हालोमा आफरीन रोयणे एने बुखलु रोयणे एने मेंहेपर रेट से ती बी एने कायीज निंबेले ती बी मी नीरहु रोयणेह हीक गोयलु से | ¹³ 13. काहाके ज्यु मसीह मेंहे ताकोत आपतलू तीना दोखू मी आखों काम कोर सकतलू | ¹⁴ 14. ती बी मार कोडकीमा मेंहे सात दीही मोदत कोरीन मारो हाजों कोरला | ¹⁵ 15 ए फिलिप्पियोंन मोंडली मायला माणहो तुमु जाणतला के पेल्लिवार यीशु मसीहन हाजली खोबर देखाडणे मी मकिदुनिया सुडीन निकोंवलु ते तुमुह सुडीन दिहरा कुण बी मेंहे मोदत नी कोरया | ¹⁶ 16. एने जेतार मी थिस्सलुनीके मा ओतु ते तुमु दुयेक कावा मेंहे मोदत कोरला एने मेंहे दान ली मूकोंल्ला ओता ¹⁷ 17.मेंहे दान जुवे कोरींन मी एंहे नी कोयतलू बाकिन होंटों आशीर्वाद तुमुह जुडनु जुवे कोरीन मी इच्छा कोरतलु | ¹⁸ 18 एंवी मेंहे काय जुवे च्यों आखों मेंहेपर से ज्यों जोरडि से तीना दोखी बी होंटों मेहेपर से तुमु इपफ्रुदीतुस हाते ली मुकल्ला च्यों इलाम देखिन मी खूब आफरी गोयलु च्यों इलाम ज्यों बोगवानोह बादा चोंडावला ओता हाजों गोंदायण्या चीजोन होस च्यों बोगवानोह खूब पोटलो |

¹⁹ 19.एने मार बोगवान तेर महिमान मालदोनोन इसाबे यीशु मसिहमा तुमरी आखी जोरवूतोह पूरी कोरहे ²⁰ 20.आपणा बाह बोगवानोन बोंडायी जोलमकीज ओयती रोय आमीन | ²¹ यीशु मसीहमा आखा चूखला माणहोह जय यीशु कोयजु ज्या विस्वासी बायहे मारहाते से च्या बी तुमुह जय यीशु कोयतला | ²² 22.खास ज्या केयसर राजान ओवाल्यामा काम कोरनारा मायला आखा चूखला माणहे तुमुह जय यीशु कोयतला | ²³ 23.आपणा पोरबु यीशु मसीहन दया तुमरी आखान जीव आत्मा हाते रोये ! आमीन |