¹ एने होंदारे वेगाज , भगवानोन डायला पुजारा एने माणहोन डायला पुड़ारी एने येहूदीन नेम हिकाडनारा आखा एने येहूदी पोंचुन माणहे मिविन यीशुह मारने होमचू कोरया च्या यीशुह बांदिन ली जाईन रोमी सोरकारोन येहुदिया राजवाड़ान राज कोरनारा पीलातुसोन आथोमा होप देल्ला

² पिलातूस तिनाह फूस्यु ," तु येहुदीन राजा से के , ओवतु यीशु तिनाहा कोयु , होव जेंहे तु कोयु तेहेंज से |

³ एने डायला पुजारा तिनापर खूब वातोन गुनू लागाडतता | ⁴ पिलातूस तिनाहा फोसु फूस्यु ," या माणहे तार बारामा खूब वातन गुनू लागाड़ने बाज रयाह , होंबीन काय तु कायीज जोपाप नी आपतु के |

⁵ पूण यीशु फोसु जोपाप नी आप्यु , कोरीनं पिलातूस बोंगलाय गोयू | ⁶ एने सालोंडिट तीन फासका तिवारोमा , येहूदी माणहोन मांगोन इसाबे रोम सरकारन येहुदिया राजवाड़ान राज कोरनारु पिलातूस एक कैदीह जेलोमा दखु सूड देतलू |

⁷ एने च्याहरी बरअब्बा नावोन एक डामीस माणुह , सरकारन विरुदमा दोंगु माताडीन खूब माणहे मरतता तीनु हाते च्यु बी जेलोमा ओतु |

⁸ एने गर्दी मायला माणहे जाईन पिलातूसह रावण्या करने बाज गया , के तु आमरे करीन जेंहे करतु आवलु तेंहे जेलोंमायला कुणिही बी एक जोणोह सूड दे | ⁹ पूण पिलातूस तीनुहु फूस्यु , मी तुमरे करीन येहूदीन राजाहा सूड देंव के ?

¹⁰ काहाके यीशुह यहूदी डायला पुजारा कुयराये तेर आथोमा यीशुह होप रोयाह कोरीन पीलातुस हाजी हुते जाणीन यो फूस्यु |

¹¹ पूण डायला पुजारा माणहोन गर्दीह पिलातूसह फूसणे लागाड़तला के तु यीशुन बदले बरअब्बा सूड दे | ¹² यो होंबीन पिलातूस तीनुहु फूस्यु ," जर मी बरअब्बाह सूड देंव ते , तुमु यहूदीन राजा कयतला इनाहा मी काय करो |

¹³ च्या फसा आयड्या के ," इनाहा क्रूस पर चढ़ाव दे | ¹⁴ पिलातूस तीनुहु कोयु ," यू काय गुनू करलु से ? पूण च्या उंजु जूरे आयडीन कया ," इनाहा क्रूस पर चढ़ाव दे |

¹⁵ तेतार पिलातूस गर्दीह खुश करने करीन बरअब्बाह सूड देंण्यु एने यीशुह चोपकडा देवडाविन एने क्रूस पर चढावणे रोमी सेनीकोन आथोमा होप देल्लु ¹⁶ तेतार सेनीके रोम राज करणारा पिलातूसन राजवाड़ान कील्लान ओवालीन खोवीमा यीशुह ली गया , एने यीशुह आखा सेनीके सोमखेर कुंड लेदला |

¹⁷ एने च्या तिनाहा जांमण्या रंगन नांबलो डोगलो पेराव्या , एने काटान मुकुट गुथीन यीशुन मुंडोपर मेक्या ,

¹⁸ एने च्या यो कोईन तिनाहा वोंदणे बाज गया , के ए यहूदीन राजा तारी जय जयकार | ¹⁹ च्या तेर मुंडोपर बूरान फाटा करिन देतता , एने तिनापर थुप्या एने मांडा टेकिन तिनाहा वोंदया करया|

²⁰ च्या जेतार तिनाहा मजाक उडाडीन नोवराया , तेतार उपरलों रातलो डोगलो काडीन तेर डोंगलों पेराव्या , एने तिनाहा क्रूसोपर चढावणे करीन बारथे ली गया |

²¹ एने कुरेनी सहरोंन , सिमोन नावोन एक माणुह ओतु , च्यु सिकंदर एने रुफूसन बाह ओतु च्यु तेर गाँव दखु निकविन आवततु , तिनाहा सेनीके दरया , एने यीशुन क्रूस बोवजबरी उचलीन ली जाणे लागाड्या | ²² एने च्या तिनाहा गुलगुता नावोन जागे ली गया , एरो मतलब ," मुंडकान ठुबरान जागू

²³ एने च्या तिनाहा मूर नावोन दोवा बेसकलों दाकरसन रुह पिणे आप्या ,पूण च्यु नी पीदयू |

²⁴ ओवता च्या तिनाहा क्रूस पर चढावीन खिला ठुक्या एने तेर लुगडान करता टीकडी नाखिन कुणिहि काय जुडयो , च्या वाट लेदया | ²⁵ एने होंदारे नोव वाज रया अता , तेतार च्या क्रूस पर तिनाहा चढावला अता |

²⁶ एने गुनान एक पाटी लेखीन तेर मुंडोन ऊपर लागाड देण्या के ," यहूदीन राजा |"

²⁷ एने च्या तीना हाते दुय डाखूनुह , एक तेर जेवडीखेर , एने एक तेर डाखरीखेर क्रूस पर चोडाव्या |

²⁸ पवित्र पुस्तकोमा लेखला लेखोन होस च्यु गुनावालु मानाय गयू | ²⁹ एने वाटोन दोडी सोरकिन जाणारा मुंड आलवी आलवीन यो कयीन तिनान मजाक उडाड्या के " आह तीन दिहोमा मंदिरोह उदारीन फसु बांदणारा

³⁰ क्रूस पर दखु उतरीन सताह वाचाड ले |" ³¹ एंहेज डायला पुजारा , एने यहूदीन नेम हिकाडनारा गुरु बी यीशुन मजाक उडाडीन कया ," यू ते दिहराहा वाचाड्यू , एंवी सोतान जीव मोत दखु केहे नी वाचाड सकतलु |?

³² होयू इस्राएलन राजा , मसीह, एंवी क्रूस पर दखु उतरिन आवे , तेतार आमू तोहो देखिन बुरहु करहु एने ज्या यीशु हाते क्रूस पर चोढावला ओता , च्या बी तिनान मजाक उडाड्या | ³³ एने माथेक दिहे दखा मांजनेक दिहे तीन वाजता लोगण आखि कवीमा आँदारो ओय गयो |

³⁴ एने हाँजपर तीन वाजता यीशु मोठे आयडीन कोयु , “इलोई, इलोई, लमा शबक्तनी?”एरो मतलब यो से के , ए मारा भगवान , ए मारा भगवान तु मेहे काहा सूड देण्यु ?|

³⁵ ज्या हाते ऊबरोयला ओता , तीनुमा थुडाक यो होंबीन कया , " होंबु यू ते एलिय्याह बुलाडने बाज रयूहु | ³⁶ एने एक जण दोवडीन गयू एने पोटको खाटला दाखरसन रुहोमा बुड़ावीन , बूरान फाटान सिगीपर विलगाड़ीन , तिनाहा चुहाड्यू , एने च्यु तीनुहु कयु , आगा , इनाहा एखलु सुड देता एलिय्याह आविन इनाहा क्रूसपर दखु सुडावतु के नी देखता |

³⁷ तेतार यीशु मोठे आयडीन , जीव सूड देण्यु |

³⁸ एने मंदिरोन पोडदू उपर दखु नेचु लोगोण दुय टूकडा ओय गोयलु | ³⁹ ज्यू सेनीकोन पुड़ारी यीशुन ओगव उबरोय रोयू ओतु , च्यु जेतार यीशु केंहेक आयडीन मरतलू देख्यू ते च्यु कोयु , " खोराखोर यू माणुह भगवानन पुरयुज से |

⁴⁰ वारुज बायरा नांबे दखा बावतता , एने तीनुमा मरियम मगदलीनी, एने आयतलू याकूब , एने योसेसोन आई मरियम , एने सालोमी ओति

⁴¹ जेतार च्यु गलील मा ओतु तेतार ची तेर फसव जातरय तती एने तेरी सेवा चाकरी करया करतती , एने तिनिहाते वारुज बायरा ओता च्या ज्या तेर हाते यरुशलेम मा आवली ओति | ⁴² जेतार हाँज ओय गयली ओति , ते इनान करता तयारीन दिह ओतु आरामोन दिहोन पेल्ले दिही ज्यू अया करततु |

⁴³ तेतार अरिमतियाहन रयणारु यूसुफ आव्यू च्यु पोंचुन नावहाद्यु माणहु ओतु , च्यु भगवानन राजोन करीन वाट जुव रोयततु , च्यु हिम्मोत करीन पिलातूस हाते गयु एने यीशुन दोडहो मांग्यु |

⁴⁴ यीशु ओतरी जल्दी मर गयु , यो होंबीन पिलातुस बोंगलाय गयु एने च्यु रोमी राजोन एक होव सेनीकोन पुड़ारीह बुलावीन फूस्यु , काय यीशु ओतरु जल्दी मर गयु काय |? ⁴⁵ जेतार च्यु सेनीकोन पुड़ारी दखु यीशु मर गयु करीन जाण लेदयू तेतार च्यु यीशुन होवह यूसुफोह आपणे लागाड्यू |

⁴⁶ यूसुफ एक नवली बुरीबुह लेफडी डाठि वेचाती लेदयू , च्यु यीशुन होवह क्रूसपर दखु उतारीनं लावीन , तिनाहा तिनी डाठीमा वेटावीन एक मोटट्यामा मेक्यू , च्यो मोटट्यों सापरियामा खोंदीन बोणावलो ओतो एने एक मोटलु दोगडू मोटट्यान जुपा पर डूव्विन मेक देण्यु |

⁴⁷ एने मरियम मगदलीनी एने योसेसन आई मरियम देख रई ओति के च्यु कां मेकायलु से |