¹ ए तिमुथी तूं मारा लाडका पुरयान होस से मी पोरथना कोरतलु के मोसी यीशुन दोयामा तूं वातडु रोय।

² बोगवानोन हाजी वात ज्यो पुरावु आपणारान ओगोव तू मार मूयो दोखु होबोवलु ओतु तीनी हाजी वातोह खोरा माणहे हीकाडजी च्या माणहे यी हाजी वात दीहरा माणहोह हीकाडने लायक बोणहोत। ³ तु मोसी यीशुन हाजु सोयनीकोन होस से कोरीन यीशु मोसीन कोरता दुःख वेढतू रोयजी

⁴ तु जाणतलु के च्यु कुण युद्ध कोरनारु से ते च्यु सोताह दाडीन दीही दुनियान काल्ला बी कामो मा नी फोसाडे एने तेर कोरती कुसीस कोरहे ।

⁵ ओहलो च्यु जोखडी पोडीन दोवडनारु नेम मानीन दोवडनु जुवे तेतारन्ज इलाम जुडहे । ⁶ ओहलो ज्यु खेतोवावु खेतोम मेहनुत कोरतलु तीनाह पेल्लु इस्सु जुवणु जुवे।

⁷ ज्यो मी कोयतलु तीनापोर मोन लागाडजी काहाके पोरबु तोहो आखी वात सोमजणेह मोदत कोरहे ⁸ होमेस्या यीसु मोसीह तार मोनमा ओर कोरतु रोयजी च्यु दावुदोन कुटुमो मायलु ओतु एने बोगवान तीनाह मोरलाम दोखु जीवतु करयु यीज हाजली खोबोर ज्यी मी माणहोह हीकाडतलु

⁹ मी इन हाजी वातोह हीकडलु कोरीन एवी मी दुःख वेठतलु एने माणहे मेहे गुणावालु सोमज्या एने कुडवामा हाकवो कोरिन बांद देल्ला पुण बोगवानोन हाजी वातोह कोयणेन सेवाह कुण बी नी रुक सोक्या

¹⁰ बोगवानोन निवाडला माणहे यीसु मोसी पोर बुरहु मेकीन वाच जाणेन कोरता मी यो आखो दुख ¹¹ यी वात खोरी से ; जोर आपु मोसी हाते मोरला से ते ,आपु तीना हाते जीवण्या बी से ।

¹² जोर आपु यीसु मोसीन कोरता दुःख वेठोन रोयहु ते तीनाहाते राज बी कोरहु ,पुण जोर आपु तीनाह काय नी उवोखतला कोयहु ते ,च्यु बी आपुह कोयहे मी तुमुह नी उवोखतलु ;

¹³ जोर आपु खोरा नी रोयतला ती बी च्यो काय च्यु कोयतलु तीनामा होमेस्या च्यु खोरु रोयतलु काहाके च्यु कोदी बोदनारु नींबे । ¹⁴ तीमुथी तु इनी वातोन विस्वासी माणहोह ओर करसकतु रोयनी बोगवानोन ओगोव एक दीहरा हाते बोगवान वातोन बारामा जुलयता जुण कोरीन तीनुह चेतावणी आपजी काहाके जोर च्या जुलाये ते कायतान बी फायदु नींबे एने ज्या यो होबोवतला च्या तीदरु बुरहु सुडीन बीगडी जातला

¹⁵ तो बोगवान नोजरोमा हाजु माणहु बोणनेन कोरता मेहनत कोरजी हाजा काम कोरनारु माणहु तेरे कामोन कोरता कोदी नी लाजवाये तु ओहलो काम कोरनारा होस बोण जा एने बोगवान खोरी होकोह हाजीहुते हीकडजी । ¹⁶ दीहरा माणहो हाते बोगवानोह नी पोटे ओहली बीगुर कामोन वात जुण कोरतु काहाके ओहली वात तोहो बोगवान दोखी सेटी कोर देहे

¹⁷ च्यी बीगुर कामोन वात कीडायला फूडान से यो एक माणहोन पूरा डीलोह बीगाडहे हुमुनीयुस एने फिलेतुस च्या दुय जोण ओहली ही हीकाडनारा ओतो

¹⁸ च्या खोरी वात दोखा बोटकी गोयला से एने कोयतला के च्या दीही आव लागला मोरला माणहे जीवता ओय गोयला एहें हीकाडीन च्या थुडाक विस्वासी माणोह बुराहाम दोखा सेटा कोर देतला से ¹⁹ च्या ओहलो हीकाडतला ती बी हाजा विस्वासी बोगवानोन खोरी वात पोर बुरहु कोरता रोयतला बोगवानोन खोरी हीक वातडा पायान होस से तीनापोर सीक्कान होस दुय वात लेखाय रोयाह के पेल्ली वात पोरबु तेरे माणहोह जाणतलु एने दुसरी वात ज्यु पोरबुन नावलीन बुरहु कोरे च्यु मोठा पाप दोखु सेटु रोयहे ।

²⁰ एक माणहोन घरमा थुडाक रासे हुनाना एने चोंदीन ओतराज नी रोये एने थुडाक लाकडान एने कादवोन रासे बी रोयला माणहे हुनान एने चोंदीन रासे मान पानोन कोरता एने लाकडान एने कादवोन रासे बीगुर मान पानोन कोरता वापरतला ।

²¹ जोर विश्वासी सोताह खोराब काम दोखु सेटु ओयीन रोये ते च्यु ओहलो रासे से जीनाह माणहे खास तीवारोन कोरता वापोरला तेर जीव पोवित्र रोयहे एने कोरिन तेरे मालक तीनाह वापोर सोके एने च्यु काल्लो बी हाजा कामे कोरणे तीयार रोये ²² कोरीन ए तीमुथी दीहरा जुवान पूरया कोरने हुतला खोराब काम दोखु तु नाह जा बाकीन ज्या सुखले मोन पोरबुन नाव लेये तीनु विस्वासी हाते दोरमीन कामोम एने बोगवान खोरी वातोपोर बुरहु करनेमा एने दीहराह मोंग कोरतु रोयणेमा एने दीहराह हाते मेलाखु रोयणेन फोसोव जा

²³ ज्या वायबार वातु कोरतला तीनुहाते काल्लो बी नातो जुण मेकतु काहाके तोहो मालुम से के इनसेहे आखी बातीन वातोमा माणहे एक दीहरा हाते जुलायतला । ²⁴ पोरबुन कोरता सेवा कोरनेमा दिहरा हाते जोगडु नी कोरनु बाकीन च्या दिहरा हाते सांतीवार रोयणु जुवे एने च्या बोगवानोन खोरी होकोह दीहराह हीकाडनु जुवे एने च्या दीहारा हाते खोतायणु नी एने दीहारान वीरुद बी नी कोरनु

²⁵ ज्या बोगवान वीरुद कोरतला तीनुह नोमीन हीकाडु तेतार ज्या माणहे आमुह वीरुद कोरतला तींदरो मोन फीरावीन बोगवानोखेर वाव देहे एने च्या बोगवानोन खोरी वातोह हाजी हुते सोमजी जाहोत

²⁶ च्या बुताडन जावो दोखा वाच जाहोत काहाके बुतडु तीनुह काय कोरावणे च्यु हुत्तोतु तोहलो कोरावणे तीनोह सीकार कोर लेदलु ।