¹ Yaz lănv tauv pănh nyăngz pec Stingx stung zez tâuh nyăngz Apc-la-ham, tuz toix lungđ wâyc nănh nyăngz seenz stymz? ² Six coong Apc-la-ham, wâyc nănh ayx nyăngz dlayc bix tuz cloon Tênb-Hungh hopđ nyâuđ, Nănh songđ hayh nzeetx blangc, Six yămz Tênb-Hungh nyăngz cah đangc Apc-la-ham, max nzeetx blangc.” ³ Canyx-Stâub ja coong, “wâyc Apc-la-ham, zeen Tênb-Hungh, Tênb-Hungh songđ stunx Apc-la-ham cloon nănh hopđ nyâuđ.” ⁴ Toix laiv lanh ayx weekc tuz nyanh Lav, Six yâuc max hayh nongc mangc ayx pănh nyăngz quah tăngc.” ⁵ Bamh munh max hayh ayx laix tuz cloon Tênb-Hungh hopđ nyâuđ, Six okx njangh nyăngz bamh munh oix zuc zeen couv Tênb-Hungh nzăngđ tuz cloon nănh hopđ nyâuđ. wâyc nănh stiz nyăngz seenz Stymz, Tênb-Hungh songđ Stunx woax tauh cloon nănh hopđ nyâuđ.” ⁶ Đa-vitv Hungh yâuc năngđ nâyx coong, “Toix lanh cloon Tênb-Hungh hopđ nyâuđ, âyz gâyf six tuz quanyf nănh nyăngz Stoif, Seenz naih pôz.” ⁷ Pou phunz toix lanh tuz quanyf nzuf Stoif, “Pamf buc laiv Stoif yâuc tuz quanyf nzuf, ⁸ Pou phunz toix lanhh max zuc Zâu tingc Stoif.” (Nzungz-ddăngb 32:1-2) ⁹ Nâyx hungđ Hônb hiđ, Six cungb njâuh phunz woax đomc ayx quaix catz nyăngz gâyf woax đomc Munh, Mah six năngx phunz cloon max ayx quaix Catz nyăngz munh tymb? Max đêh, Yaz songđ coong Apc-la-ham zeen Tênb-Hungh, Tênb-Hungh songđ phunz cloon nănh hopđ nyâuđ.” ¹⁰ Nănh tuz Hopđ nyâuđ năngđ laix? Tênb-Hungh Stipx Apc-la-ham ayx quaix catz nyăngz gâyf woax zanyf, Mah six quaix đangz? Nănh max zengx quaix.” ¹¹ Blătc woa nănh nzăngđ quaix, Apc-la-ham ayx quaix catz nyăngz Gâyf, Six ayx Jix-houc, Năngđ tăpb yeenx phunz Tênb-Hungh stunx cloon nănh hopđ nyâuđ, wâyc năngđ nâyx Apc-la-ham Songđ ayx yeetx stong zeen Zâu Munh nyăngz Pha, Max cun nănh stiz hănđ six max ayx quaix catz nyăngz gâyf, Six nănh stiz zeen Tênb-Hungh, Tênb-Hungh songđ stunx nănh stiz cloon nănh hopđ nyâuđ.” ¹² Apc-la-ham Yâuc quaix catz nyăngz gâyf woax đomc munh nyăngz Pha, Max zâyf wâyc nănh stiz ayx quaix catz nyăngz gâyf, Six wâyc zuc nănh stiz zeen Tênb-Hungh năngđ Apc-la-ham nyunc ayx quaix catz nyăngz gâyf Nâyx.” ¹³ Tênb-Hungh nyunc woac phunz Apc-la-ham cloon nănh nyăngz Sây-Stunx, Nănh coong Nâyx nomz bamh canz six pênx nănh nyăngz Phănc, Tênb-Hungh năngđ nâyx nyunc woac max zâyf Apc-la-ham ayx âyz Đoouc-lif gâyf đêh, Six couv woah cloon Tênb-Hungh, Quaix seenz Stymz.” ¹⁴ Six coong Tênb-Hungh nyunc nâyx đomc woac phunz âyz Đoouc-lif gâyf ayx nyăngz munh max săngh Nongc, Tênb-Hungh nyunc nyăngz woac lauf Max naih stuyh Muc.” ¹⁵ Wâyc năngđ nâyx, Munh max âyz Đoouc-lif gâyf ayx, Tênb-Hungh songđ hănđ nzongf, Six toix nomz tync max naih Đoouc-lif gâyf, Yămz woa songđ max hayh pamf Đoouc-lif gâyf nzof gôh.” ¹⁶ Wâyc năngđ nâyx Apc-la-ham nyăngz sây-Stunz songđ oix zuc zeen couv Tênb-Hungh, Nzăngđ tuz stipx nănh nyunc nyăngz woac, Nâyx đomc nyunc woac six săngh quah tăngc, Bix njengx phunz Apc-la-ham nyăngz sây-stunz, tuz stipx nyunc woac, Max zâyf Săngh âyz Mô-sê nyăngz Đoouc-lif gâyf, Six săngh yămz pănh nyăngz stung zez Tâuh Apc-la-ham nyăngz seenz stymz.” ¹⁷ Năngđ Canyx-Stâub ja coong, “Yaz phunz mâyh ayx đungx stingx Munh nyăngz stu-stongz.* “Nâyx Đomc munh tuz mungv woac yămz Tênb-Hungh nyăngz cah đangc, Wâyc zuc Apc-la-ham zeen tingc sađ săngh Mengc phunz tayc blătc nyăngz Munh năngx săngh phunb stengb taih woax tauh, Yâuc zâyx muif hungđ woax tauh Ya.” ¹⁸ Max cun Apc-la-ham max naih six miuh, Six nănh zeen Tênb-Hungh nănh naih tync Mungc, Songđ tuz ayx đungx stingx munh nyăngz Pha, Cayx năngđ Tênb-Hungh bux Nâyx, “Mâyh nyăngz Sây-stunx Six hongđ nzongf, Max naih toix laiv tauh stauc tuz tongf.” ¹⁹ Woax zanyf Apc-la-ham, Songđ tapc tauv ah pez nyăngv, Blătc hanf naih Sây, Six nănh nyăngz au Sa-la, Yâuc côx max hayh naih sây nzof, Nănh numđ Stauh, Six Apc-la-ham zeen tingc mungc Tênb-Hungh max tuih pôuc.” ²⁰ Nănh yâuc max naih laiv zanyf yônx Tênb-Hungh Max ayx âyz nănh nyunc nyăngz woac, Six nănh nyăngz nyâuđ max plungh-planc Tanv Tênb-Hungh.” ²¹ Six Apc-la-ham zeen tingc yâuc âyz nâyx đomc nyunc woac ayx.” ²² Wâyc năngđ nâyx, Tênb-Hungh songđ nyeenc stipx Apc-la-ham nyăngz seenz stymz, Tênb-Hungh yâuc stunx Apc-la-ham nyăngz seenz Stymz cloon nănh hopđ nyâuđ.” ²³ Stunx Apc-la-ham cloon Tênb-Hungh hopđ nyâuđ nâyx zâux woac, Max zâyf cungb ja phunz nănh cungđ.” ²⁴ Yâuc năngx phunz cloon Pănh, Tênb-Hungh six stipx pănh, wâyc Pănh zeen ayx phunz Zâu Yê-su Tayc năngx săngh phunb Stengb taih woax Tauh.” ²⁵ Zâu Yê-su tayc wâyc pănh nyăngz stoif, Nănh săngh phunb stengb wâyc phunz pănh cloon Tênb-Hungh hopđ nyâuđ.”