¹ Yaz oix bux nyâuh Yâuf pez ô stayx pâyz tuz pănh nyăngz ô Phê-bê nănh ayx nyâuc zâpv sưc yămz Sen-cơ-rê Huyb-toongh.” ² Jođ nyâuh Yâuf pez jic tuz stipx nâyx tauh ô yămz Zâu cah njaf, âyz nyâuh zeen Zâu đăngb nyăngz jau, Nâyx tauh ô sămv zuc toix lungđ jođ nyâuh Yâuf pez Stăngc nănh, wâyc zuc nănh stăngc pitc tauh munh đungx yâuc stăngc Yaz.” ³ Yaz zuyz woac tayđ Bikv-si-la, Cloon A-qui-la, Cloon yaz songc congz Njâuv-Zâu Yê-su cumh pâuz nyăngz Munh.” ⁴ Nănh stiz nongc mengc Njâuv yaz nyăngz mengc, Yaz seenz nzuf jab hâuđ nănh stiz nyăngz hâuđ nyâyc, Yâuc max si cănh yaz, Njynh Cloon muif nomz Côkz max zâyf Yiu-tai Munh nyăngz Huyđ-toongh lauf Sâuf nănh stiz.” ⁵ Blătc nzuf yaz zuyz woac Tayđ Huyđ-toongh yămz nănh stiz iz lanh Yâuf pez nyăngz pyau. Yaz yâuc zuyz woac zaoh banf Ê-bên-nê-tukv, Yămz Miênh thiêuz av, Nănh zeen Njâuv-Zâu Yê su năngx đangc quaix.” ⁶ Yaz yâuc zaoh tauv cloon nyâuh Yâuf pez ayx cumh pâuz zâuđ woax tauh Ma-li-ya. ⁷ Yaz zuyz woac tayđ any-rô-nia, Cloon Yu-đatc, Nănh stiz cloon yaz songc yămz nzauh, Nănh stiz iz lanh Stipx Njâuv Zâu năngx đangc têx Yaz, Nâyx iz lanh Munh Njâuv Zâu Yê-su paiđ nănh stiz nzônh cuđ jeenx ayx cumh pâuz phunz nănh.” ⁸ Yaz oix zaoh yaz stăngz nzongf nyăngz toic am-li-a.” ⁹ Yaz pungx woac zaoh U-ba-nukv, Cloon yaz Songc ayx Njâuv Zâu nyăngz congz, Yaz zaoh tayđ Ikv-ta-ji, yaz Stăngz nyăngz toic.” ¹⁰ Yaz yâuc pungx woac zaoh tayđ A-ben-lê, Yâuc tuz Stâyv quaix ayx hopđ Njâuv nyăngz nyâuđ woax tauh, Yâuc pungx woac zaoh tayđ A-ri-ô-bu-lu, ah sênz pyau Munh.” ¹¹ Yaz yâuc zaoh tayđ cloon yaz songc stingx woax tauh Hê-rô-đi-ôn, Yaz yâuc pungx woac zaoh tayđ Nakc-si-nukv nyăngz muif lanh pyau Munh.” ¹² Yaz zaoh tayđ Stăngc ayx Zâu nyăngz cumh pâuz woax đomc iz lanh Munh nzif sab, Zi-phê-na, Cloon Zi-phô-sa, Yaz yâuc zaoh tayđ banf Betc-si, Naih congz yămz Zâu woax tauh ô." ¹³ Yaz yâuc zaoh tayđ Zâu sên taih ayx nănh nyăngz cumh pâuz woax Du-phu, yâuc zaoh tayđ Ru-phu nyăngz nzif, Nănh tex yaz, Năngđ tex nănh nyăngz toonz nâyx.” ¹⁴ Yaz jođ zaoh A-siny-ri-tu, Phô-lê-gôn, Ba-zô-ba, Cloon woax đomc Yâu pez.” ¹⁵ Yaz yâuc zaoh tayđ Phi-lô-lô-gukv, Cloon Yu-lia, Nơ-diêu, Cloon nâyx tauh tah nyăngz ô, ô-lim-ba, Cloon Zâu nyăngz Namh-nyâuf naih mynb Cloon nănh stiz woax đomc. ¹⁶ Nyâuh Yâuf pez lanh oix zaoh lanh tomz lanh Đăngb, Njâuv Zâu nyăngz Huyđ toongh Yâuc zaoh nyâuh Yâuf-pez.” ¹⁷ Yâuf pez lex, Yaz jođ quynb nyâuh oix zuc buôngh hayh jaf ayx phunz munh đanv woax đomc Munh, Nănh stiz oix jaf nyâuh Yâuf-pez zeen longđ, max toix nyâuh hođ quaix nyăngz gâyf, six zuc pyeenv goib nănh stiz.” ¹⁸ Nănh stiz max zâyf Canyx-bongc Njâuv Zâu đêh, Nănh stiz six tâuh cănh tuz gongx, Nănh stiz coong woac blangc woac camz woac sauz, Jaf zuc max saz tuz pec jaz woax đomc Munh.” ¹⁹ Songx Yâuf pez numđ lănv coong nyâuh Yâuf pez âyz cuđ jeenx ayx, Tinyh đoih songđ numđ nyađ nyâuh Yâuf pez, Yaz oix nongc nyâuh Yâuf pez naih Tongb-manyh toix lungđ six gongx, toix lungđ six huđ nyăngz dlayc, nyâuh six zuc ayx cayx năngđ Munh oongx nâyx.” ²⁰ Sađ pengh oonz nyăngz Tênb-Hungh, Six Njâu sămx Sax-tanx ănz nzac nyâuh Yâuf pez nyăngz staux đi ninyh, “Jođ Zâu Yê-su muif dlih sađ pôz phunz nyâuh Yâuf pez ô Stayx.”Yâuc cloon nyâuh Yămz.” ²¹ Cloon yaz songc congz ayx woax tauh Ti-mô-tai, Pungx woac zaoh tayđ nyâuh Yâuf pez ô Stayx, Cloon yaz songc Stingx woax tauh Lu-sơ, Ra-sôn, Cloon Sô-si-ba-tơ, Yaz nyăngz sây stunz.” ²² Yaz six Tetc-tu, Stăngc Phao-lô ja nâyx zây jeenx, Zaoh tayđ zeen Zâu nyăngz Yâuf-pez.” ²³ Gai-utv six nâyx tauh ya Munh phunz phepx Huyđ toongh tinyh đoih căpx dlonf yămz nănh nyăngz pyau woax tauh lauf zaoh tayđ nyâuh Yâuf pez ô Stayx, Ê-ratv-tu, Six-tu-quiv jămđ nâyx nomz stengv nyăngz nyanh woax tauh, ²⁴ Jođ pănh nyăngz Njâuv Yê-su Muif dlih sađ pôz phunz nyâuh songx Munh A-Men.” ²⁵ Pănh six zuc tinyh đoih tanv Tênb-Hungh, Yaz lănv cuđ jeenx coong tauv Njâuv Zâu Yê-su nyăngz jau, âyz nây cuđ jeenx Tênb-Hungh hayh phunz nyâuh Yâuf pez zeen tuz wăn, Nâyx đomc cuđ jeenx nyăngz woac Njâuv Zâu Yê-su Pinyx sax nzêuh Munh, Six nâyx zanyf plongx yangh seetb taih nzof gôh. ²⁶ Six nâyx zanyf stâyv quâyx săngh woax tauh Tênb-Hungh lănv bux nănh nyăngz tâuc woac munh ja jeenx taih lănv plongx yangh coong nzuf bux phunz Manf côkz Munh pâyz tuz six zuc stipx âyz nănh nyăngz woac ayx. ²⁷ Wâyc năngđ nâyx Pănh six zuc tanv naih Tongb-manyh woax tauh Tênb-Hungh nyăngz Gwăngz-eng. Six Njâuv Zâu Yê-su phunz pănh tanv nănh Tauv banc Stâyv banc đaic A-Men.”*