¹ Yaz mangc phătc Pa-kiz yungh coib woax đomc nhlic nomz yeenx woax zanyf, woax đomc săngh nyăngz tax hungđ, naih ah tauh hamv stingb buib cayx năngđ bah congz haoh nâyx nănh Coong, “taih gôh! ² Yaz mangc woa cah đangc songđ phătc ah lanh munh zâyh maf pec puf nzauf nađ songz, yâuc tuz stipx ah nomz banyh tênb mouc, nzof nănh suyb maf seetb ninyh năngđ munh tuz hingh. ³ Pa-kiz yungh coib tah nyâyc nomz yeenx, yâuc numđ tah nyâyc woax tauh săngh nyăngz tax hungđ êu Coong, “tah gôh! ⁴ Yâuc naih ah tauh zâyh maf stib nonc cayx năngđ tâuf nâyx seetb taih. Zâyh maf woax tauh woax nănh yâuc tuz stipx lanyf ayx phunz bamh canz taiv pengh. Wâyc ayx phunz bamh canz lanh tayx lanh. Nzof nănh yâuc tuz stipx ah zungz nzuc đao lub. ⁵ Pa-kiz yungh coib tah stamz woax nomz yeenx woax zanyf, yaz mungv yâuc numđ tah stamz woax tauh tax hungđ êu yaz Coong, “taih gôh! Yaz mangc woa cah đangc songđ phătc ah tauh maf jaz, zâyh maf woax tauh woa puf nzauf ah tauh nzăngv. ⁶ Nzof yaz yâuc numđ naih stingb năngđ munh coong woac seetb woa pyâyz tauh tax hungđ mungh tongx congv taih nănh Coong, “ah noib congz stynh cungb maif tuz ah sanz ( blauh zayz. ) Nzof ah noib congz stynh lauf cungb maif pôz sanz ( blauh jeenz.) yâuc max ayx tuz huđ ănz woax đomc tungh côh pyâu, cloon Ca-lanv-yâuh. ⁷ Pa-kiz yungh coib tax stâyx nomz yeenx woax zanyf, yaz yâuc numđ tah stâyx woax tauh tax hungđ nănh coong, “taih nây gôh! ⁸ Yaz mangc woa cah đangc songđ phătc naih ah tauh maf njămx mengz seetb taih, zâyh maf woax tauh naih bux hipđ ayx, zuc tayc muf yămz pâu woax tauh. Nănh lêpc đangz ninyh, nănh tuz stipx lanyf nongc nzuc đao tayx nây bamh canz tayc pyâyz phănc ah phănc, ah po tayc wâyc nyâuđ sab năngv. Zuc staiz nanc hoiđ, yâuc zuc stanyb hauc yez mêtc. ⁹ Pa-kiz yungh coib tah ngâuf woax nomz yeenx, yaz mangc congx toongh phătc woax đomc naih stymz ayx zanyx manyf phunz Tênb-Hungh bix zuc munh hoiđ tayx tayc woax đomc munh nyăngz mengc hoonh nănh stiz hamv Coong, ¹⁰ “Nănh stiz woax đomc zuc hoiđ nyăngz mengc hoonh hamv Coong, “Seenz gâyf đăngb zengh woax tauh dlênc quaix nyăngz Zâu lex! Mâyh cayx zu tauv laiv zanyf, mâyh nzăngđ tingc bamh canz munh, yâuc tingc clao ayx hoiđ tayx phunz buz samđ seetb woax đomc munh neh? ¹¹ Nănh stiz woax đomc coz munh tuz stipx lanh byenđ gwuyz đao pec, yâuc năngx naih woac bux êu nănh stiz six zuc zu batz lauh, năngx cloon woax đomc ayx Njâuv Zâu nyăngz cumh pâuz munh cloon pănh nyăngz yâuf pez zuc tayx tayc cayx năngđ nănh stiz nâyx tuz pong stâuv. ¹² Pa-kiz yungh coib tah guc woax nomz yeenx woax zanyf, yaz mangc phătc nib tongf đănz nzongf, bah noib mătb jaz cayx năngđ ah phunb buyx jaz taih tăng, nzof lav yâuc njaux stib cayx năngđ samđ nâyx. ¹³ Gungh sangc nyăngz stingz tau, tăng Gungh tuih nzac nib taih, cayx năngđ nzaox sâyb vănx tauh pyâu max zengx suc bix blâyc tuih gâyh njăngx quah nâyx, ¹⁴ Gungh yâuc glonf năngđ glonf stâub nâyx clakx clunh. Muif nomz zoongz, muif nomz coiđ, zuc stuyc tync nzuf. ¹⁵ Gungh đi munh nyăngz Hungh stix, cloon toongz pengz pyây, cloon puv quâyx munh, cloon naih quyênh naih lanyf nyăngz munh, năngx cloon woax đomc puv quâyx munh, ayx nâuh nyăngz munh, cloon dluyh stymz nyăngz munh, tyuv ninyh mem woa njauz bengh ngamh, cloon zoongz zâyđ nib cotb. ¹⁶ Nănh stiz hamv êu zoongz zâyc, cloon njauz bengx lakb nzac taih tăng nzez nănh stiz, max bây buz phătc Pa-kiz yungh nhleenx buz. ¹⁷ Wâyc zuc stamđ stoif woax tauh taih tauv, stamđ stoif lub woax noib naih mănv hayh tanyđ tuz?