¹ Njâuv Zâu Yê-su nyăngz lauh yangh, tăng Tênb-Hungh phunz nănh nyăngz cumh pâuz Munh pâyz tuz max lauh hayh naih laiv hungđ dlayc seetb taih. Njâuv Zâu Yê-su paiđ nănh nyăngz Stynz-Munh ninyh bux nănh nyăngz pâuz Giăng pâyz tuz nâyx đomc dlayc. ² Giăng yâuc ayx zanyx manyf lănv nzuf zuy njênf nănh phătc nyăngz dlayc, nănh lănv nâyx đomc six Zâu Tênb-Hungh nyăngz woac. Cloon Njâuv Zâu Yê-su ayx zanyx manyf. ³ Pou phunz laiv lanh toc nâyx pun Tênb-Hungh nyăngz Stâub, yâuc pou phunz laiv lanh toc yâuf ayx âyz nâyx đomc woac, tuz ja ănz nây stâub nâyx đomc dlayc săngx huđ songđ seetb taih tauv stătx nzof gôh. ⁴ Yaz Giăng ja jeenx zuyz phunz Munh yămz Zâu av nyăngz huyđ toongh. Jođ đangc dlih yămz, nâyx zanyf yămz, đangz phanx năngx taih woax tauh, cloon woax đomc nhlic nomz Mengc hoonh, sađ pôz sađ pengh oonz phunz cloon nyâuh yâuf pez ô stayx yămz. ⁵ Yâuc yămz Njâuv Zâu Ye-su, nănh six ayx zanyx manyf tayc blătc bix năngx săngh phunz stengb taih tah yeetx lanh six seenz nyăngz, nănh cun nzuf bamh canz muif hungđ nyăngz Hungh. Nănh stăngz pănh songđ nyunc tayc nongc nănh nyăngz samđ stav phunz pănh gâyh đutb stoif .** ⁶ Nănh pyênv pănh săngh ah nomz Côkz, phunz pănh pênx stayb Munh bokc dlic nănh nyăngz Pha, Zâu Tênb-Hungh. Nănh stâyv quâyx naih Gwăngz-eng, naih jab naih lanyf tauv banc stâyv banc Đaic! A-Men. ⁷ Mangc geh! nănh yămz woa vănx nzac taih, muif lanh Munh nyăngz mâyc six tuz phătc nănh, njynh cloon nzopb nănh woax đomc Munh, njynh cloon muif hungđ pec stingx yămz nây bamh canz, six zuc pungx stingb haoh wâyc nănh, seenz six năngđ nâyx A-Men. ⁸ Dlênc quaix nyăngz Zâu Tênb-Hungh Coong, “Yaz six An-pha, ô-mê-ga. Six tăng đangc dlih yămz, nâyx dlih yămz. Đangz phanx năngx taih naih quyênh naih lanyf woax tauh. ⁹ Yaz six giăng, ayx pănh yâuf pez ô stayx nyăngz yâuf, pănh cloon Njâuv Zâu songc Mengc săngh, yaz songđ cloon pănh tinyh đoih ayx congz zâuđ, nongc Noic tanyđ, yâuc ayx Tênb-Côkz nyăngz pec stingx, wâyc lănv Njâuv Zâu Tênb-Hungh nyăngz gâyf songđ zuc luif ninyh yămz batv-mô coiđ synh. ¹⁰ Yămz Zâu nyăngz noib, Singx-lingh cun yaz, yaz songđ numđ naih woac stingb cayx năngđ blungh blex stingb nâyx buib seetb yaz woa cah đangz phanx Coong, “woax đomc woac bux êu, ¹¹ “Yaz six zuc ja jeenx ănz zây clonc, lănv mâyh phătc laiv hungđ dlayc, zuyz phunz nhlic nomz Huyđ-toongh, Ê-phê-sô, Sa-miêkc-nơ, Betc-găm, ti-a-ti-rơ, Satc-đe, phi-la-đen-phia, cloon Lau-đi-si stengv. ¹² Yaz wynb đangz lauf mangc jađ laiv lanh cloon yaz lănv woac, songđ phătc nhlic zây sămz toongz. ¹³ Yâuc phătc naih ah lanh cayx năngđ bamh munh nâyx zuz gwuyz đao, cah lapc yâuc naih câuv pongz cah lapc. Stâuđ woa nhlic zây toongz mungh tongx congv. ¹⁴ Nănh nyăngz pyây đongz phangb pec cayx năngđ pa-kiz yungh pyâyz, yâuc năngđ toongb cătc, mynb yâuc năngđ tâuf bleetc. ¹⁵ . Nănh nyăngz staux cayx năngđ munh pu tongh stib, nănh nyăngz stingb yâuc năngđ womz buib glungz glungz têx. ¹⁶ Nănh nyăngz pyaoh puf nzauf nhlinc nomz stingz tau, nzeetx nja seetb ah zungz nzuc đao iz mynb njayc njemh, nănh nyăngz mynb yâuc gwăngz năngđ bah noib. ¹⁷ Yaz jenx phătc nănh, yaz songđ glinyf nzac nănh nyăngz staux synh ninyh, năngđ tayc nâyx, nănh yâuc nongc nănh nyăngz byaoh puf lupc yaz yâuc Coong, “nongx gâyf cumh nzav, yaz six ayx quef coonz, yâuc ayx stêtb mâyv woax tauh. ¹⁸ Yaz six ayx săngh mengc woax tauh, mangc geh yaz nâyx zanyf săngh tauv banc stâyv banc đaic. Nzof yaz yâuc nzauf yămz pâu nyăngz ja zâyh. ¹⁹ Mâyh songđ zuc ja nâyx zanyf mâyh phătc seetb taih nyăngz dlayc, cloon đangz phanx six zuc naih seetb taih nyăngz dlayc. ²⁰ ..Nây six nâyx đomc pinyx nyăngz dlayc âyz gâyf, six pây nây nhlic zây sămz toongz, cloon nhlic nomz stingz tau, nây nhlic zây toongz six pây tauv nhlic nomz Huyđ toongh, nây nhlic nomz stingz tau, six pây tauv nhlic nomz Huyđ toongh nyăngz stynz-munh.