¹ Six Zâu Yê-su ninyh woa cah-lanv zoongz.” ² Tah nyâyc đomz njâu, Zâu Yê-su phunb đangz lauf woa layf paix pyau, Songx munh căpx dlonf taih quib nănh, Nănh songđ stâyv woa nzaox nănh stiz.” ³ Woax zanyf naih đomc nzaox gâyf stênx-stengb cloon đomc Pha-li-si Munh, ênz ah tauh munh nzif pamf pongz lauh nyăngz Stoif, Bix zuc zoz ênz taih stâuđ songx munh woa cah đangc.” ⁴ Nănh stiz bux Zâu Yê-su coong, “Stênx-stengb lex! Lâyc tauh ya munh nzif ninyh văngc munh langh nâyx zanyf nănh bix zuc munh zoz tuz nzâyz taih nây.” ⁵ Mô-sê nyăngz Đoouc-lif Gâyf, Zăpx êu pănh zoz njauz pyây ôx nâyx hungđ munh năngx tayc. Stênx-stengb lex, Mâyh coong geh! Pănh cayx ayx laix?” ⁶ Nănh stiz naic nănh năngđ nâyx, Six oix stiv jaf nănh coong woac longđ, Bix cănh nongc nănh nyăngz woac coux nănh, Six Zâu Yê-su cumc nzac zoz bah đoz ja woa nib mync. ⁷ Woax đomc munh njinh luz naic nănh, Zâu Yê-su cany pyây nyoongz quef coong bux nănh stiz, “nyâuh đomc toix laiv tauh năngđ max zengx pamf Stoif quaix bix zoz njauz ôx lâyc tauh ya munh đangc geh! ⁸ Coong nzuf Zâu Yê-su năngx jec nzac nongc bah đoz ja woa nib.” ⁹ Nănh stiz numđ Zâu Yê-su năngđ nâyx coong, “Nănh stiz songđ stingđ njâuh stôv lanh stôv lanh seetb cungh ngwoaic ninyh nzuf, Munh côx seetb ninyh đangc, nzăngđ tauv munh gunx, Seetb ninyh nzuf, Cungb năngx naih Zâu Yê-su, cloon woax tauh munh nzif stâuđ woa.” ¹⁰ Zâu Yê-su cany quef naic woax tauh munh nzif coong, “ô lex! woax đomc Munh quaix laiv tix nzuf nzof weh? Nănh stiz max tingc mâyh nyăngz Stoif mah?” ¹¹ Woax tauh munh nzif tauz, “Stênx-stengb lex! Max naih mănv nzof gôh. Zâu Yê-su bux nănh coong, “ô lex! Yaz lauf max tingc mâyh nyăngz Stoif đêh, mâyh phanv muf gôh, Blătc nây nongx gâyf năngx pamf Stoif gôh bef.” ¹² Zâu Yê-su năngx nzaox songx munh coong, “Yaz six Gwăngz syux bamh canz. toix laiv tauh lêpc Yaz, woax tauh max zuc yămz nzămc cah njaf. Woax tauh songđ tuz Gwăngz syux nănh nyăngz Mengc.” ¹³ Pha-li-si munh coong ănz nănh, “Mâyh cănh ayx zanyx manyf phunz Mâyh, mâyh nyăngz woac Six max naih stuyh muc nef.” ¹⁴ Zâu Yê-su tauz, “Max cun yaz cănh ayx zanyx manyf phunz yaz, Yaz nyăngz woac six Seenz. Wâyc zuc yaz pâyz tuz yaz tăng laiv tix taih, Yâuc cayx ninyh laiv tix. Six nyâuh max pâyz tuz nyâuh tăng laiv tix taih, Yâuc pâyz tuz oix ninyh laiv tix.” ¹⁵ Nyâuh âyz bamh munh nyăngz âyx Stămđ munh, Six yaz max stămđ mănv.” ¹⁶ Six coong yaz stămđ munh têx, Yaz stămđ tuz hopđ, wâyc zuc nzangc Pha paiđ yaz taih yâuc clon yaz stămđ.” ¹⁷ Nyâuh nyăngz Đoouc-lif Gâyf ja coong, “Naih iz lanh munh ayx zanyx manyf woac tinyh toix têx, Songđ zeen tuz gôh.” ¹⁸ Yaz cănh stăngc yaz ayx zanyx manyf six năngx naih yaz nyăngz nzangc Pha. paiđ yaz taih woax tauh yâuc stăngc yaz ayx zanyx zanyf.” ¹⁹ Nănh stiz naic, “Mâyh nyăngz Pha yămz laix? Zâu Yê-su tauz, “nyâuh năngđ max pâyz yaz, lauf max pâyz tuz yaz nyăngz Pha đêh, Six coong nyâuh năngđ pâyz tuz Yaz, nyâuh nzăngđ pâyz tuz yaz nyăngz Pha.” ²⁰ Zâu Yê-su yămz layf paix pyau coong nâyx đomc woac nzaox munh woax zanyf, Nănh stâyv stătx pungx hođ hoomh nzaox Munh, Max naih toix laiv tauh nzađ zoz nănh, wâyc zuc max zengx tauv nănh nyăngz săngx huđ.” ²¹ Zâu Yê-su năngx nzaox nănh stiz coong, “Yaz cayx ninyh gôh, nyâuh yâuc oix ninyh lov yaz, Six nyâuh zuc tayc wâyc nyâuh nyăngz stoif, Yaz ninyh nyăngz tync nyâuh yâuc max hayh ninyh.” ²² ayx lub nyăngz Yiu-tai Munh lanh bux lanh coong, “Nănh cayx ninyh laiv tix pănh bix ninyh max tuz loz? Nănh cayx ninyh tayc gôh Sta?” ²³ Zâu Yê-su tauz nănh stiz, “nyâuh six pênx bamh canz nyăngz Munh, Yaz six pênx Tênb-toongh Côkz nyăngz munh. nyâuh six săngh nây bamh canz, Yaz six max zâyc săngh nây bamh canz nyăngz munh.” ²⁴ Wâyc nâyx yaz bux nyâuh, Tauv nyâuh tayc woax zanyf, nyâuh lauf năngx naih Stoif, wâyc zuc nyâuh max zeen yaz tăng gungh nzac taih woax tauh. Six nyâuh tayc woax zanyf, nyâuh six năngx naih Stoif.” ²⁵ Nănh stiz naic, “ha mâyh six toixlaiv tauh? Zâu Yê-su tauz, “Yaz bêc coong bux nyâuh quaix đangc nzof, Yaz six toix laiv tauh.” ²⁶ Yaz năngx naih đungx tyuh jau coong tingc tauv nyâuh nyăngz Stoif. Six yaz numđ paiđ yaz taih woax tauh nyăngz woac coong laix, Yaz yâuc lănv bux bamh munh six seenz nyăngz.” ²⁷ Nănh stiz max saz Zâu Yê-su coong nuz tauv nănh nyăngz Nzangc Pha. ²⁸ Zâu Yê-su bux coong, “Tauv nyâuh njăpf yaz bamh munh nyăngz toonz staox njăngx woax zanyf, nyâuh songđ pâyz tuz yaz six stâyv quâyx săngh woax tauh gôh. woax zanyf nyâuh songđ pâyz tuz yaz max zâyf âyz yaz âyx ayx toix laiv lungđ, Nzangc Pha bux yaz laiv hungđ, Yaz songđ coong woax hungđ.” ²⁹ Paiđ yaz taih woax tauh yâuc cloon yaz Yămz, nănh max quanyf yaz, Phunz yaz cănh yămz đêh, wâyc zuc yaz muif dlih ayx hopđ nănh nyăngz nyâuđ.” ³⁰ Naih munh đungx numđ Zâu Yê-su coong nâyx đomc woac songđ zeen nănh.” ³¹ Zâu Yê-su coong bux zeen nănh woax đomc Yiu-tai munh, Six coong nyâuh năngđ âyz yaz nzaox nyăngz woac ayx, nyâuh seenz zâyf ayx yaz nyăngz Stâyb-sây.” ³² Nyâuh yâuc pâyz tuz seenz gâyf, nzof seenz gâyf yâuc pungx goib nyâuh.” ³³ Nănh stiz tauz, “Buz ayx Apc-la-ham nyăngz Sây-stunz, Stâyv quâyx buz max zâuđ ayx nâuh phunz toix laiv tauh nef, ha mâyh coong buz zâyf tuz ayx pungx goib nyăngz munh max?” ³⁴ Zâu Yê-su tauz nănh stiz, “Yaz coong seenz bux nyâuh, “Toix tauh pamf Stoif, woax tauh songđ zuc ayx Stoif-nyăngz nâuh.” ³⁵ Ayx nâuh nyăngz munh stâyv quâyx max tuz cloon pyau munh yămz, cungb seenz toonz nzăngđ tuz stâyv quâyx yămz.” ³⁶ Six coong Tênb-Hungh nyăngz toonz pungx goib nyâuh nef têx, nyâuh songđ tuz pênx pungx goib nyăngz munh.” ³⁷ Yaz pâyz tuz nyâuh ayx Apc-la-ham nyăngz Sây Stunz, Six nyâuh lauf oix tayx yaz, wâyc zuc yaz nzaox nyăngz gâyf nyâuh max oix mungv.” ³⁸ Yaz coong toix laiv lungđ dlayc, Six yaz phătc yămz Pha woa, Six nyâuh ayx âyz nyâuh Pha zăpx bux nyâuh.” ³⁹ Nănh Stiz tauz, “Buz nyăngz Pha six Apc-la-ham,” Zâu Yê-su bux nănh stiz, “Six coong nyâuh năngđ seenz zâyf ayx Apc-la-ham nyăngz sây-stunz nef têx, nyâuh ayx nyăngz dlayc songđ năngđ Apc-la-ham ayx nyăngz dlayc nâyx.” ⁴⁰ Yaz cungb coong yaz numđ quaix Tênb-Hungh bux nyăngz seenz gâyf lănv bux nyâuh, nyâuh yâuc oix lov jau tayx yaz, Six Apc-la-ham max zengx naih laiv zanyf ayx năngđ nyâuh nâyx nef.” ⁴¹ Nyâuh cungb ayx âyz nyâuh Pha ayx nyăngz dlayc,” Nănh stiz tauz coong, “Buz six max zâyf sây haov nef. Buz cungb naih ah tauh Pha, Six Zâu Tênb-Hungh.” ⁴² Zâu Yê-su bux nănh stiz, “Six coong Tênb-Hungh năngđ seenz zâyf ayx nyâuh nyăngz Pha Têx, nyâuh songđ stăngz yaz, wâyc zuc yaz six Tênb-Hungh paiđ taih, Nâyx zanyf yaz naih mynb cloon nyâuh yămz nây, Six max zâyf dluyh yaz âyx cănh taih nef, Six nănh paiđ yaz taih lef!. ⁴³ Nyâuh wâyc săngh laix bix max saz yaz coong nyăngz woac? Six wâyc nyâuh max oix stipx yaz nzaox nyăngz gâyf.” ⁴⁴ Nyâuh nyăngz Pha six Manđ nyăngz Hungh, nyâuh cungb oix ayx âyz nyâuh Pha nyăngz gao ayx, Tăng coonz taih nănh tayx munh, Nănh max numđ nyađ seenz gâyf, wâyc zuc tăng nănh max naih seenz gâyf, wâyc zuc tăng nănh puv maoh nănh nyăngz stymz nyâuđ oix jaf munh, Nănh songđ pênx puv maoh nyăngz Pha.” ⁴⁵ Yaz coong toix laiv lungđ six seenz nyăngz, Six nyâuh lauf max zeen yaz nef.” ⁴⁶ Nyâuh đomc naih toix laiv tauh hayh zah tuz seetb yaz naih toix laiv lungđ Stoif max? ha săngh laix yaz coong seenz gâyf nyâuh yâuc max zeen yaz?” ⁴⁷ Toix laiv tauh pênx Tênb-Hungh nyăngz munh six cănh mungv Tênb-Hungh nyăngz woac, Toix laiv tauh max zâyf Tênb-Hungh nyăngz munh, Nănh songđ max mungv Tênb-Hungh nyăngz woac.” ⁴⁸ Yiu-tai munh tauz coong, “Buz coong mâyh six Sa-ma-li munh blaz manđ toix max?” ⁴⁹ Zâu Yê-su tauz, “ Yaz max zâyf blaz manđ nef, wâyc zuc yaz pâuh yaz nyăngz Pha. Six nyâuh phătc yaz stanc.” ⁵⁰ Yaz max zâyf taih lov munh pâuh yaz nyăngz manyh yangh nef, Six cănh naih ah tauh lov munh pâuh manyh yangh phunz yaz. Nănh six stămđ Stoif-quanz.” ⁵¹ Yaz coong seenz bux nyâuh, :Toix laiv tauh âyz yaz nzaox nyuăngz woac ayx woax tauh stâyv quâyx max zuc tayc nef.” ⁵² Yiu-tai munh coong ănz Zâu Yê-su, Nâyx zanyf buz seenz pâyz tuz mâyh blaz Manđ gôh.” Apc-la-ham tayc blătc nzof, Tênb-Hungh nyăngz songx tâuc woac munh lauf tayc nzuf nzof, Six mâyh coong toix laiv tauh âyz mâyh nzaox nyăngz woac ayx, woax tauh Stâyv quâyx max zuc tayc naz. ⁵³ Pănh nyăngz claof jex Apc-la-ham bêc tayc blătc nzof, Ha mâyh zâyf ayx năngx lub têx nănh mah? hănđ six tâuc woac munh lauf tayc nzuf nzof, ha mâyh coong mâyh six toix laiv tauh geh? ⁵⁴ Zâu Yê-su tauz nănh stiz, “Six coong yaz cănh pâuh yaz nyăngz manyh tauh têx, Six max naih stuyh muc, Pâuh yaz woax tauh six yaz nyăngz Pha, six nyâuh hipđ ayx nyâuh nyăngz Tênb-Hungh woax tauh ya gôh.” ⁵⁵ Nyâuh stâyv quâyx max pâyz tuz nănh, Six yaz pâyz Nănh, Six coong yaz năngđ coong yaz max pâyz nănh têx, Yaz lauf năngđ nyâuh nâyx, Six yaz pâyz nănh yâuc âyz nănh nyăngz woac ayx.” ⁵⁶ Nyâuh nyăngz claof Jex Apc-la-ham, Numđ nyađ zu mungc tuz yaz nyăngz noib taih tauv, Nănh phătc nzuf songđ numđ nyađ. ⁵⁷ Woax zanyf Yiu-tai Munh coong, “ê mâyh ayx laix hayh tuz phătc Apc-la-ham? Woax zanyf mâyh lenf lôx max zengx tuz săpc nyâyc nyăngv.” ⁵⁸ Zâu Yê-su tauz, “Yaz coong seenz bux nyâuh, Apc-la-ham max zengx stengf stâyv, Bêc naih yaz lauh nzof.” ⁵⁹ Nănh stiz numđ nănh coong naz Nănh stiz songđ lumz njauz hangc đa ôx Nănh, Six Zâu Yê-su Pinyx tyuv seetb gâyh woa layf paix toongh.”