¹ Quaix đangz Zâu Yê-su tingc nyâuđ yâuh ninyh Ga-li-lê Stengv, Nănh max ninyh Yu-đê Stengv. wâyc zuc nănh pâyz tuz yămz woa woax đomc ayx lub nyăngz Yiu-tai Munh oix lov congv tayx Nănh.” ² Woax dlapc yâuc cayx tauv Yiu-tai munh nyăngz plongz-njiuh stêtz.” ³ Zâu Ye-Su nyăngz yâuf taih bux nănh, Tah lex! Mâyh zuc seetb nâyx nomz tync ninyh Yu-đê Stengv, Phunz lêpc mâyh woax đomc munh năngx phătc mâyh ayx Jix-caox njingf nyăngz dlayc timb nef.” ⁴ Toix laiv tauh oix tuz manyh yangh nănh six max nongc pinyx nănh ayx nyăngz dlayc nef, Mâyh ayx nâyx đomc Jix caox njingf nyăngz dlayc, Six zuc ninyh Phunz Tênb-yaf munh phătc sta? ⁵ Njynh cănh Zâu Yê-su nyăngz Yâuf lenf lôx max zeen Nănh.” ⁶ Zâu Yê-su bux nănh stiz coong, “Max zengx tauv yaz nyăngz săngx huđ ninyh nef, Six nyâuh hănđ laiv zanyf ninyh yâuc tuz.” ⁷ Bamh munh max hănđ nyâuh, Six nănh stiz hănđ yaz, wâyc zuc yaz coong Nănh stiz ayx nyăngz huđ dlayc.” ⁸ Nyâuh phanv ninyh quaix stêtz gôh, Max zengx tauv tah ninyh nyăngz săngx huđ đêh.” ⁹ Coong songf nănh lauf năngx yămz Ga-li-lê Stengv.” ¹⁰ Zâu Yê-su nyăngz yâuf buz ninyh quaix plongz njiuh stêtz nzof, Six quaix đangz Zâu Yê-su nzăngđ pinyx ninyh, Nănh ninyh max phunz songx munh phătc nănh.” ¹¹ Yămz woa stêtz cah njaf woax đomc Yiu-tai munh lov nănh yâuc naic munh coong, “woax tauh ya munh yămz laiv?” ¹² Yămz woa quaix stêtz woax đomc songx munh coong woac nuz tauv Nănh, “ah phanx coong, “Nănh six ayx munh gongx, ah phanx coong, “Max zâyf đêh, lâyc tauh ya munh six cungb puv maoh jaf munh lêđ đêh.” ¹³ Six max naih mănv nzađ toongx songx coong tauv Zâu Yê-su, wâyc zuc nănh stiz cumh nzav Yiu-tai Munh.” ¹⁴ Quaix stêtz đămx cănv Zâu Yê-su nzac woa layf paix toongh ninyh nzaox munh.” ¹⁵ ayx lub nyăngz Yiu-tai munh seenz nyâyh ganc nzongf songđ lanh naic lanh coong, “lâyc tauh ya munh max zengx ninyh đămc tauv hakc-toongh nef, ha săngx laix nănh bix pâyz tuz đungx nâyv?” ¹⁶ Zâu Yê-su tauz nănh stiz, “Yaz nzaox nyăngz woac six max zâyf yaz cănh nyâyh seetb taih nzaox đêh, Six paiđ yaz taih woax tauh nyăngz woac lec.” ¹⁷ Toix laiv tauh tingc nyâuđ ayx âyz Tênb-Hungh nyăngz âyx, woax tauh songđ pâyz tuz yaz nzaox nyăngz woac six tăng Tênb-Hungh taih, Mah six yaz cănh nyâyh seetb taih nzaox.” ¹⁸ Toix laiv tauh cănh nyâyh seetb taih nzaox, woax tauh cungb oix nongc munh tanv nănh cungđ, Six toix laiv tauh oix nongc munh pâuh paiđ nănh taih woax tauh, Nănh coong nyăngz woac six seenz nyăngz, Max naih puv maoh.” ¹⁹ Max zâyc Mô-sê phunz Đoouc-lif gâyf nyâuh nzof mah? ha săngh laix nyâuh yâuc max âyz Đoouc-lif Gâyf ayx, nyâuh cungb oix lov jau tayx yaz?” ²⁰ Nănh stiz tauz, Mâyh blaz manđ max đăngđ mah? Naih mănv oix tayx mâyh yeh? ²¹ Zâu Yê-su coong, “Yaz ayx ah hâyđ Jix-caox njingc nyăngz dlayc, nyâuh yâuc phătc njingc? ²² Mô-sê êu nyâuh stăngc munh ayx quaix catz nyăngz Gâyf, Six nâyx hungđ Gâyf max zâyf tăng Mô-sê taih, Six tăng nyâuh nyăngz claof jex buz phunz taih, tingc congz noib nyâuh lauf oix stăngc munh ayx quaix catz nyăngz gâyf.” ²³ Six coong nyâuh toix tingc congz noib stăngc munh ayx quaix catz nyăngz Gâyf wâyc max oix pamf Mô-sê nyăngz gâyf, ha săngh laix yaz nongc tingc congz noib zany tuz tauh gumc munh gongx, nyâuh yâuc nhleenx yaz?” ²⁴ Max cuyb mangc cungh ngwoaic pâyh stămc, oix zuc nongc pengh stymz stămđ.” ²⁵ Wâyc nâyx naih ah phanx yămz Yê-lu-sa-lem Stengv nyăngz munh naic coong, “Munh oix lov tayx max zâyf lâyc tauh ya munh mah? ²⁶ Mangc geh! nănh toongx songx munh lănv đomc woac max naih mănv ayx laix ănz nănh, naih dlih ayx lub nyăngz Yiu-tai Munh pâyz tuz tingc nănh seenz Zâyc njâuv-Zâu mah six?” ²⁷ Lâyc tauh ya munh coonz tay yămz laiv tix pănh six pâyz lec, Six Njâuv Zâu tăng laiv tix taih pănh max naih mănv pâyz đêh.” ²⁸ Zâu Yê-su năngx yămz woa layf paix toongh nzaox munh woax zanyf nănh hamv coong, “nyâuh seenz pâyz tuz yaz six toix laiv tauh, Yâuc pâyz tuz yaz tăng laiv tix taih. Six paiđ yaz taih woax tauh six seenz nyăngz. Max zâyf dluyh yaz cănh oix taih, six nănh paiđ yaz taih, nyâuh yâuc max pâyz tuz Nănh.” ²⁹ Six yaz pâyz tuz nănh, wâyc zuc yaz six tăng Nănh woa taih, nzof nănh yâuc paiđ yaz Taih.” ³⁰ Nănh stiz numđ Zâu Yê-su coong ayx naz, Nănh stiz seenz oix nyopz zoz nănh nzongf, Six max naih mănv nzađ coib puf zoz Nănh, wâyc zuc max zengx tauv Nănh nyăngz săngh huđ.” ³¹ Yămz woa nyăngz songx munh lauf naih zeen Nănh nyăngz Munh đungx. Nănh stiz naic coong, “ha tauv woax tauh ya Njâuv Zâu taih, Nănh hayh ayx tuz Jix caox njingf nyăngz dlayc Năngx đungx têx nâyx tauh max?” ³² Pha-li-si Munh numđ munh coong woac sapb lănv tauv Zâu Yê-su ayx nyăngz jau, Nănh stiz songđ cloon stayb munh pyây paiđ jămđ layf paix pyau nyăngz pengz ninyh lov Zâu Yê-su zoz.” ³³ Zâu Yê-su bux nănh stiz coong, “Yaz songđ năngx cloon nyâuh yămz ah dlapc timb. nzof yaz songđ phunb đangz muf paiđ yaz taih woax tauh woa gôh.” ³⁴ Nyâuh hănđ oix lov yaz yâuc lov max phătc, wâyc zuc yaz ninyh nyăngz tync, nyâuh ninyh max tuz.” ³⁵ ayx lub nyăngz Yiu-tai munh lanh naic lanh coong, “Nănh cayx ninyh laiv tix bix pănh lov max pongh? Sangx đâuc nănh oix ninyh pănh Yiu-tai munh pyaux đanv ninyh yămz zanb yangh Munh yămz woax đomc stengv nzaox munh lêc sta?” ³⁶ Nănh coong pănh oix lov nănh yâuc lov max phătc, nzof nănh coong nănh ninyh nyăngz tync, Pănh yâuc ninyh max tuz naz, Nâyx đomc woac âyz gâyf six coong laix?” ³⁷ Quaix stêtz blătc woax noib six năngx lub quaix nyăngz noib, Zâu Yê-su nyoongz quef stâuđ woa hamv coong, “Toix laiv tauh nyâuđ gatb bix taih yaz Nây hopb.” ³⁸ Năngđ Canyx-Stâub ja coong nâyx, Toix laiv tauh zeen yaz, Yungf mengc nyăngz womz six yămz woax tauh nyăngz nyâuđ njâuc seetb taih năngđ coiđ nâyx.” ³⁹ Zâu Yê-su coong năngđ nâyx six nănh oix coong tauv Singx-lingh, zeen nyăngz munh oix tuz Stipx, Six woax zanyf Tênb-Hungh max zengx phunz singx-lingh munh, wâyc zuc Yê-su max zengx tuz Gwăngz-eng.” ⁴⁰ Songx munh numđ nănh coong ayx ha, Naih ah phanx coong, “lâyc tauh ya seenz zâyf pănh zu woax tauh tâuc woac munh gôh!.” ⁴¹ Naih ah phanx coong, “lâyc tauh seenz zâyf Jix-tuz gôh. Năngx naih ah phanx aox coong, “Njâuv Zâu bix hayh tăng Ga-li-lê seetb taih naz?” ⁴² Canyx-stâub jađ coong, “Njâuv Zâu six ayx Đa-vitv Hungh nyăngz sây stunz, Yămz Đa-vitv Hungh nyăngz muôngf Bêtv-le-hem stengv stâyv max zâyf mah?” ⁴³ Wâyc năngđ nâyx, Munh songđ wâyc Zâu Yê-su bix phunz đanv tinyh gâyh. ⁴⁴ Naih ah phanx munh oix nyopz zoz Zâu Yê-su, Six max naih mănv nzađ coib puf tongf tauv Nănh.” ⁴⁵ Ninyh zoz Zâu Yê-su woax đomc pengz phunb đangz lauf tauv stayb Munh pyây, Cloon Pha-li-si Munh woa, Nănh stiz naic coong, “ha Săngh laix nyâuh Yâuc max zoz nănh đănx lauf nây?” ⁴⁶ Woax đomc pengz tauz, Max naih mănv hayh coong woac tuz Năngđ Nănh.” ⁴⁷ Woax đomc Pha-li-si Munh coong, “nyâuh lauf zuc lâyc tauh Yê-su jaf nyâuh nzof gôh sta” ⁴⁸ Naih toix laiv tauh ayx lub nyăngz Yiu-tai Munh mah six Pha-li-si munh zeen Nănh max? Max naih đêh sta? ⁴⁹ Six nâyx peob munh max naih mănv pâyz tuz Mô-sê nyăngz Đoouc-lif Gâyf tiny, Jic tuz Tênb-Hungh zaux nănh stiz.” ⁵⁰ Naih ah tauh woax đomc Pha-li-si Munh, Lôx noib ninyh lov Zâu Yê-su woax tauh Ni-cô-đêm naic coong, “ ⁵¹ Âyz pănh nyăngz gâyf, Pănh max zengx numđ munh coong quaix, “Max zengx pâyz tuz Nănh nyăngz coonz nengx, Pănh hayh tingc nănh nyăngz stoif max?” ⁵² Nănh Stiz tauz, “ha mâyh lauf Ga-li-lê Munh lef, Mâyh tex Canyx-stâub mangc geh! Max naih laiv tauh tâuc woac Munh seetb stâyv yămz Ga-li-lê stengv nef!” ⁵³ Quaix stêtz pac coz Munh mănv muf mănv nyăngz pyau nzuf.