¹ Nâyx tauh Mên-ci-sê-đêkv, ayx Sa-lem stengv nyăngz Hungh, yâuc ayx yămz njangb quaix Tênb-Hungh nyăngz stayb munh, Apc-la-ham ninyh panx tuz hingh woa pyâyz tauh Hungh stix phunb đangz lauf woax zanyf, Mên-ci-sê-đêkv ninyh pongh apc-la-ham yâuc pou woac phunz nănh. ² Apc-la-ham, zoz nănh bopc tuz hingh zab tuz taih nyăngz phănc, săpc phănc nănh zoz ah phănc stungx phunz Mên-ci-sê-đêkv, Mên-ci-sê-đêkv, woax nomz bux âyz gâyf six pengh oonz nyăngz Hungh, nănh ayx Sa-lem stengv nyăngz Hungh stix, năngx naih ah zâux woac nyăngz âyz gâyf six pengh stymz nyăngz Hungh stix. ³ Max naih laiv lanh pâyz tuz Mên-ci-sê-đêkv, nyăngz coonz nyunh yămz laiv tix, yâuc max pâyz tuz nănh stongz zez tâuh tăng laiv tix taih, yâuc max naih mănv pâyz tuz nănh stengb stâyv nyăngz noib lav, nănh six năngđ Tênb-Hungh nyăngz toonz, stâyv quâyx ayx stayb munh. ⁴ Năngđ naz nyâuh yâuf pez ô stayx nyâyh mangc jađ, Mên-ci-sê-đêkv tăng laiv lub, Pănh nyăngz claof jex, Apc-la-ham, songđ zoz nănh bopc tuz hingh zab tuz taih nyăngz jax dlaih, săpc phănc ah tanb phunz Mên-ci-sê-đêkv. ⁵ Âyz Đoouc-lif gâyf, Li-vi munh nyăngz sây stunz lanđ, six ayx stayb munh woax đomc, six zuc sâub I-sa-la-ên munh nyăngz tax hungđ, săpc phănc ah phănc phunz nănh stiz, max cun hănđ tinyh đoih ayx I-sa-la-ên munh, yâuc ayx Apc-la-ham nyăngz sây stunz.* ⁶ Mên-ci-sê-đêkv max zâyf Lê-vi stingx nyăngz stongz zez tâuh, six nănh tuz sâub Apc-la-ham nyăngz phănc săpc phănc ah phănc, yâuc pou woac phunz Apc-la-ham, tuz stipx Tênb-Hungh nyunc phunz nyăngz phănc.” ⁷ Pou woac phunz woax tauh, songđ ayx năngx lub têx, tuz pou woac woax tauh. ⁸ Coong tauv stayb munh, nănh stiz sâub săpc phănc ah phănc phunz, six nănh stiz lauf hayh tayc nyăngz munh, Six Mên-ci-sê-đêkv, lauf sâub săpc phănc ah phănc, Apc-la-ham nyăngz phănc, six nănh lauf tuz stâyv quâyx săngh năngđ Canyx-stâub coong nâyx, ⁹ Coong tauv Lê-vi munh nyăngz sây stunz, sâub săpc phănc ah phănc, six apc-la-ham lauf seetb săpc phănc ah phănc phunz mên-sê-đêkv. Woax zanyf Lê-vi munh lauf cloon seetb. ¹⁰ Wâyc zuc Mên-ci-sê-đêkv, pongh Apc-la-ham woax zanyf, Lê-vi lauf max zengx stengb stâyv, nănh năngx yămz pănh claof jex Apc-la-ham nyăngz stynb. ¹¹ Cah đangc noib Tênb-Hungh phunz Đoouc-lif gâyf I-sa-la-ên munh woax zanyf, songđ naih Lê-vi woax hungđ stayb munh nyăngz Đoouc lif gâyf ayx coonz tay, six coong Lê-vi woax hungđ stayb munh ayx nyăngz cumh pâuz năngđ hayh ayx phunz munh tuz clakx clunh têx, ayx laix zâyf năngx zuc naih pitc tauh stayb munh seetb taih năngđ Mên-ci-sê-đêkv woax hungđ stayb munh max năngđ A-rôn?” ¹² Phătc naih stayb seetb taih coi wănc, Đoouc lif gâyf lauf coi wănc. ¹³ Coong tauv pănh nyăngz Njâuv Zâu, nănh six cănh pitc stingx munh, woax stingx munh max zengx naih laiv lanh tuz ayx stayb munh yămz congx toongh Canyx bongc Zâu. ¹⁴ Munh songđ pâyz tuz manyh pec, pănh nyăngz Zâu stengb stâyv taih toix Yu-đa stingx, Mô-sê coong stayb munh woax zanyf, nănh yâuc max zengx naih laiv zâux woac coong tauv Yu-đa stingx.” ¹⁵ Năngx naih ah tyuh songđ phunz pănh pâyz năngx yox têx, six năngx naih pitc tauh stayb munh seetb taih cayx năngđ Mên-ci-sê-đêkv nâyx. ¹⁶ Nănh tuz njăpc ayx stayb munh max zâyf bamh munh nyăngz gâyf njăpc taih, six âyz max hayh dlêtc nyăngz gâyf njăpf stayb munh taih. ¹⁷ Wâyc zuc Canyx-stâub coong, “mâyh stâyv quâyx ayx stayb munh, năngđ Mên-ci-sê-đêkv woax hungđ stayb munh nâyx.”* ¹⁸ Lôx nyăngz Đoouc lif gâyf songđ zuc tuyđ quengx, wâyc zuc haiđ yongb max săngh nongc. ¹⁹ Mô-sê nyăngz đoouc lif gâyf max hayh phunz laiv hungđ tuz clakx clunh, six nâyx zanyf, naih ah hungđ gâyf năngx gongx têx, hayh ênz tuz munh ninyh stătx Tênb-Hungh. ²⁰ Năngx naih ah hâyđ Zâu Tênb-Hungh nyunc woac, nănh njăpc Lê-vi munh ayx stayb munh woax zanyf, nănh max nuz laiv hungđ nyunc woac. ²¹ Six njăpc cah đangz woax tauh nănh cănh nuz nănh nyunc woac coong, “Zâu nyunc nyăngz woac stâyv quâyx max wănc stymz, “nănh coong mâyh six ayx stayb munh stâyv quâyx.” ²² Tênb-Hungh nyunc nâyx hâyđ woac, Yê-su tuz baoz đamz tuz ayx năngx gongx quaix nyăngz cumh pâuz.” ²³ Đangc dlih naih stayb munh đungx, six wâyc nănh stiz hayh tayc, max hayh tuz stâyv quâyx ayx stayb munh nyăngz cumh pâuz. ²⁴ Six Yê-su stâyv quâyx săngh, nănh songđ tuz stâyv quâyx ayx stayb munh.” ²⁵ Wâyc nâyx Yê-su stâyv quâyx săngh nănh songđ hayh Njâuv couv nănh bix taih lov Tênb-Hungh woax đomc munh, nănh njynh leox stăngc nănh stiz jođ Tênb-Hungh. ²⁶ Wâyc năngđ naz, Yê-su six ayx pănh sămv zuc nongc nyăngz stayb munh, nănh max naih tync nzêmh, nănh max naih stoif, nănh six đăngb zengh gâyh goib stoif munh muf yămz woa gungh njangb quaix nyăngz tync. ²⁷ Yê-su max năngđ woax đomc stayb munh, nănh max sămv munh muif noib nzâyz stanyb lanyh ninyh congx stav nănh stiz nyăngz stoif, quaix đangz wâyc stav pec stingx nyăngz stoif, Yê-su cănh nongc nănh congx ah hâyđ đokc caux nzuf. ²⁸ Âyz Mô-sê nyăngz Đoouc lif gâyf njăpc ayx stayb munh woax đomc six bamh munh, songđ đoonh nzongf six yămz Đoouc lif gâyf cah njaf, quaix đangz Tênb-Hungh cănh nyunc njăpf nănh nyăngz toonz taih, nongc ayx stayb munh songđ clakx clunh stâyv quâyx.