¹ Năngđ naz, pănh six zuc hođ quaix tah yeetx tab jix-tuz nyăngz gâyf, hungv ninyh cah đangc tutc ninyh năngx tauv pănh zeen nyăngz jau phunz pănh pênx munh lub, năngx gâyf năngx planc phunz đangc lauf tăng coonz hođ, six pănh zuc coi nyâuđ quanyf hayh zuc tayc nyăngz jau, sangđ zeen Tênb-Hungh. ² Năngx gâyf planc lauf nzaox ayx quaix womz nyăngz gâyf, cloon tăpx puf ănz nyăngz gâyf, cloon munh tayc năngx săngh phunb stengb taih nyăngz jau, năngx cloon zuc Tênb-Hungh stingc stoif nyăngz jau. ³ Six coong Tênb-Hungh năngđ phunz phepb, pănh songđ ayx năngđ munh lub staox ninyh. ⁴ Cah đangc noib tuz zeen Yê-su quaix, năngx quengx Zâu woax đomc munh, ayx laix năngx hayh năngx ênz tuz nănh stiz coi nyâuđ phunb đangz lauf? Nănh stiz tuz Tênb-Hungh nyăngz gwăngz-eng, yâuc stâyv quaix Tênb toongh nyăngz mic, yâuc tuz songc singx-lingh nyăngz phănc. ⁵ Yâuc tuz stâyv quaix Tênb-Hungh nyăngz woac camz ayx năngđ laix, yâuc tuz stâyv quaix đangz phanx woax nzêuh Tênb-Hungh nyăngz gungh đi. ⁶ Six coong stâyv quaix, blătc woa quaix đangz bix năngx quengx Zâu Yê-su max zeen, songđ seenz max naih zux ix ênz woax hungđ munh coi nyâuđ phunb đangz lauf, wâyc zuc nănh stiz Tênb-Hungh nyăngz toonz nzâyz ninyh tingz ănz săpc đăngc zax, phunz nănh toongx songx zuc nyayz. ⁷ Laiv cuyb njingh muif dlih tuz womz bungc yungf gongx, jengz zunb songđ săngh tuz gongx, wâyc stăngc ayx njingh nyăngz munh tuz Tênb-Hungh sađ pôz phunz. ⁸ Six laiv cuyb njingh muif dlih cungb seetb nzim, seetb mađ six max săngh nongc, songđ zuc Tênb-Hungh zaux, yâuc zuc tâuf pu yiuf nzuf. ⁹ Yaz stăngz yâuf pez lex, max cun buz coong năngđ nâyx, six zeen tingc coong nyâuh yâuf pez tuz Njâuv, yâuc oix tuz năngx gongx têx nyăngz dlayc. ¹⁰ Tênb-Hungh six pengh stymz, nănh max nyâuđ cob nyâuh yâuf pez ayx nyăngz cumh pâuz zâuđ, yâuc max nyâuđ cob nyâuh stăngz nănh nyăngz yâuf pez woax đomc munh, nănh lauf năngx săngx tauv nyâuh yâuf pez nâyx zanyf lauf năngx stăngc nănh stiz. ¹¹ Buz năngx oix nongc nyâuh yâuf pez muif lanh munh jomz nyâuh tuz tauv stêtb mâyv, wâyc phunz nyâuh yâuf pez mungc oix tuz nyăngz phănc. ¹² Buz max oix nongc nyâuh yâuf pez naih laiv lanh lâyc, six oix nongc nyâuh yâuf pez âyz naih seenz stymz zeen yâuc naih noic tanyđ woax đomc munh, yâuc tuz Tênb-Hungh nyunc phunz nyăngz phănc. ¹³ Tênb-Hungh nyunc woac phunz Apc-la-ham woax zanyf, nănh max nuz laiv lanh năngx lub têx, six Tênb-Hungh cănh nuz nănh nyunc woac phunz tah claof. ¹⁴ Nănh bux Apc-la-ham coong, “yaz oix sađ pôz phunz mâyh, yâuc sađ phunz mâyh naih sây stunz đungx.” ¹⁵ Apc-la-ham songđ nongc stymz zu tuz tauv nănh tuz stipx Tênb-Hungh nyunc phunz nyăngz phănc. ¹⁶ Bamh munh nyunc woac, six cungb nuz ah tauh ayx năngx têx nănh stiz woax tauh nyunc woac, njăpc nzuf woax đomc nyunc nyăngz woac songđ max zuc năngx naih woac coong. ¹⁷ Tênb-Hungh oix phunz oix tuz stipx nănh nyunc woac phunz woax đomc munh, songđ payb phunz nănh stiz pâyz tuz manyh pec nănh nyăngz zux ix six stâyv quâyx max hayh coi wănc, wâyc năngđ nâyx nănh songđ cănh nuz nănh nyunc woac. ¹⁸ Wâyc năngđ nâyx songđ naih iz hungđ nyunc woac nyăngz cooz max hayh coi wănc, Tênb-Hungh max puv maoh jaf munh, wâyc năngđ nâyx pănh songđ zuc tyuv taih lov nănh, phunz pănh njih mungc tync, jomz nyâuđ zeen wăn, đangz phanx mungc oix tuz nyăngz phănc. ¹⁹ Pănh naih nyăngz njinh mungc tync, six năngđ ah nomz tungh ngauz ngwakx tanyđ phunz pănh nyăngz mengc hoonh, ngwakx muf tauv woax đăngb zengh nyăngz tênb toongh côkz cah njaf woax hoongv buyx. ²⁰ Yê-su wâyc pănh songđ nzac cah njaf woax hoongv ninyh đangc, nănh yâuc stâyv quâyx ayx stayb munh, năngđ Mên-ci-sê-đêkv woax hungđ stayb munh nâyx.”