¹ Yaz Phao-Lô, ayx cumh pâuz munh. Max zâyf bamh Munh paiđ yaz ayx. six phunz Njâuv Zâu Yê-Su tayc blătc năngx săngh phunb stengb taih woax tauh pănh nyăngz Nzangc Pha Zâu Tênb-Hungh paiđ yaz ayx. ² Yaz cloon yămz nây nyăngz yâuf-pez Tênb-Hungh nyăngz pyau Munh songc nyâuđ ja nâyx zây jeenx zuyz phunz yămz Ga-la-ti Stengv nyăngz stâyz-phangz. ³ Yaz jođ pănh nyăngz Nzangc Pha Zâu Tênb-Hungh. Cloon Zâu Yê-Su Jix-tuz Sađ Pôz Sađ pengh oonz phunz nyâuh yâuf-pez ô stayx. ⁴ Yê-su sez nănh nyăngz Mengc Tayc wâyc Njâuv pănh gâyh đutv nâyx nomz Gungh Đi okx njangh nyăngz Stoif. Nây six âyz pănh nyăngz Nzangc Pha Zâu Tênb-Hungh nyăngz zux ix. ⁵ Six zuc stâyv quâyx tanv nănh nyăngz Gwăngz-eng tauv banc stâyv banc Đaic A-Men. ⁶ Yaz phătc njingc nzongf nyâuh đomc yâuf-pez quanyf Njâuv Zâu Tênb-Hungh êu nyâuh yâuf-pez taih ayx nănh nyăngz pec stingx nyăngz Pôz tăng laiv căn. bix ninyh lêpc pitc hungđ cuđ jeenx. ⁷ Max naih pitc hungđ cuđ jeenx njingc đêh. wâyc zuc naih đomc Munh sêu lunc nyâuh yâuf-pez coi pyênv Njâuv Zâu nyăngz cuđ jeenx. ⁸ Yaz nzônh phunz nyâuh yâuf-pez woax hungđ cuđ jeenx. Max cun yaz mah six yămz Tênb-Toongh taih nyăngz Stynz-Munh bix nzônh pitc hungđ cuđ jeenx têx yaz jic tuz zuc zaux. ⁹ Yaz bêc coong bux nyâuh yâuf-pez quaix đangc nzof, six nâyx zanyf yaz năngx bux nyâuh ah hâyđ tymb, Six coong năngđ naih laiv lanh nzônh pitc hungđ cuđ jeenx max năngđ yaz nzônh nyăngz cuđ jeenx têx, woax tauh ya Munh six zuc zaux! ¹⁰ Nyâuh yâuf-pez nyâyh taih yaz cungb oix lov jau ayx phunz bamh munh tanv mah six? max đêh! Six coong yaz cungb oix ayx phunz bamh Munh hopđ nyâuđ têx yaz six max zâyf Njâuv Zâu nyăngz pâuz. ¹¹ Yaz nyăngz yâuf-pez lex! Yaz oix nongc nyâuh pâyz tuz yaz nzônh nyăngz Cuđ jeenx six max zâyf Bamh Munh nyâyh seetb taih nyăngz cuđ jeenx. ¹² Nây Cuđ jeenx yaz max zâyf stipx tăng laiv lanh Munh phunz taih, yâuc max zâyf laiv lanh bamh Munh nzaox Yaz, Six Njâuv Zâu Yê-su hynđ yangh phunz yaz. ¹³ Nyâuh yâuf-pez lauf tuz numđ lănv quaix lôx noib yaz cănh nongc Yiu-tai Munh zeen nyăngz jau woax zanyf, Yaz oix lov jau mêtc Tênb-Hungh nyăngz Huyđ-toongh max nyangc. ¹⁴ Yaz hođ wekc nyăngz jau yâuc lif stongz zez tâuh nyăngz Gâyf, yâuc năngx joomz nyâuđ quaix muif lanh Munh. ¹⁵ Six tăng yaz Stengb stâyv taih woax zanyf, Zâu Tênb-Hungh lanyc sên yaz seetb taih bokc dlic Nănh, êu yaz ayx nănh nyăngz cumh pâuz. ¹⁶ Nănh zoz nănh nyăngz toonz Lauh-yangh nyăngz dlayc hynđ phunz yaz nzônh nănh toonz nyăngz Cuđ jeenx lănv phunz max zâyf Yiu-tai Munh mungv woax zanyf, Yaz yâuc max cloon laiv lanh bamh Munh sangv Gwoangh. ¹⁷ Yaz yâuc max ninyh Yê-su-sa-sem Stengv lov ayx cumh pâuz đangc yaz woax đomc Munh. Yaz lênh dlih ninyh az-râpc stâyz-phangz. Blătc woa quaix đangz yaz nzăngđ ninyh Đa-makv Stengv. ¹⁸ Pôz nyăngv quaix đangz yaz nzăngđ ninyh Yê-lu-sa-lem Stengv lov Phê-e-rơ* yaz songđ cloon nănh yămz woa tuz săpc ngâuf noib. ¹⁹ Six seetb blătc Zâu nyăngz yâuc Gia-cơ. Yaz max pongh laiv lanh cumh pâuz Munh. ²⁰ Six yaz toongx Zâu Tênb-Hungh ja nâyx đomc woac bux nyâuh yâuf-pez six seenz nyăngz max zâyf puv maoh. ²¹ Blătc woa yaz năngx ninyh Si-li, cloon Si-li-si Stâyz-phangz. ²² Woax zanyf yămz Yu-đê Stengv Huyb-toongh nyăngz Jix-tuz Munh lenf lôx max zengx pongh yaz. ²³ Nănh stiz cungb numđ Munh lănv coong, “dlênh noib ayx peo nănh stiz woax tauh ya Munh. Nâyx zanyf Nănh lănv bux munh êu munh zeen lôx noib nănh oix mêtc nyăngz gâyf. ²⁴ Năngđ ha nănh stiz songđ wâyc yaz bix tanv Zâu Tênb-Hungh.