¹ Yaz six ayx pungx goib nyăngz Munh, Yaz six ayx cumh pâuz Munh, Yaz yâuc tuz phătc Njâuv-Zâu Yê-su, Yaz stăngc Zâu ayx cumh pâuz nyâuh Yâuf-pez nzăngđ tuz zeen Zâu Yê-su max zâyf mah?” ² Max cunv pitc lanh munh hănđ max nhleenc yaz ayx cumh pâuz munh, Six nyâuh Yâuf-pez lauf nyunc ayx cumh pâuz munh, wâyc zuc nyâuh Yâuf-pez ayx zanyx manyf lănv yaz ayx Zâu nyăngz cumh Pâuz.” ³ Nây six yaz nyăngz woac tauz phunz nănh stiz tăngx măkx yaz ayx cumh pâuz munh.” ⁴ Yaz max naih gâyf nhlync hopb mah? ⁵ Yaz max naih gâyf nongc zeen Zâu munh nongc ayx au mah? Năngđ woax đomc cumh pâuz munh, Cloon Zâu nyăngz Yâuf-pez buz* cloon Phê-e-rơ ênz au lêpc ninyh nâyx mah?” ⁶ Mah six cungb Ba-na-ba cloon yaz six zuc ayx congz tâu Mengc cungv? ⁷ Max naih laiv tauh ayx pengz nyăngz Munh bix cănh zuc seetb nyanh lav phunz pengz pyây sta? Max naih laiv tauh songx lauđ wynb tungh côh pyâu bix max tuz nhlync Nănh nyăngz pyâu sta? Max naih laiv tauh yungf Pa-jiz yungh bix max tuz hopb Pa-jiz yungh nyăngz nu mah? ⁸ Yaz max zâyf coong âyz bamh nyăngz zux ix đêh, Tênb-Hungh nyăngz Đoouc-lif gâyf lauf coong năngđ nâyx lêđ đêh.” ⁹ Mô-Sê nyăngz gâyf lauf ja coong, “Ngoongh zaiđ blauh nyăngz săngx huđ nongx gâyf pongz ngoongh nzetx nengx. Ha six Tênb-Hungh cungb stauh phunz ngoongh mah six?” ¹⁰ Nănh coong nâyx đomc woac, Nănh max zâyf coong wâyc pănh mah? njayh njingh nyăngz munh cloon bopc blauh nyăngz munh songđ naih tync zu mungc tuz sâub nănh stiz nyăngz zunb jengz clao nănh stiz ayx nyăngz congz.” ¹¹ Buz songx Singx-lingh nyăngz nhlimb yămz nyâuh Yâuf-pez nyăngz nyâuđ, ha buz yămz nyâuh Yâuf-pez woa Sâub buz sămv nongc ‘nyăngz tax’ hungđ nyâuh stunx đungx yongb max?” ¹² Six coong pitc đomc Munh lauh naih gâyf êu nyâuh Yâuf-pez songc nănh stiz têx, ha buz max zâyf năngx naih gâyf têx êu nyâuh Yâuf-pez taih songc buz mah? Six ayx hungđ gâyf buz max zengx nongc quaix laiv hâyđ, Phunb đangz buz tanyđ zâuđ wâyc max phunz laiv hungđ tăng Njâuv-Zâu nyăngz cuđ-jeenx.” ¹³ Nyâuh Yâuf-pez max pâyz mah? Laiv tauh yămz layf paix toongh ayx congz six tuz stipx woax sênz pyau nyăngz nhlync hopb mah? Laiv tauh ayx congz yămz woa congx toongh six stipx tuz woax đomc Stanyb lanyh nyăngz A phănc mah?” ¹⁴ Lauf năngđ naz, Zâu paiđ tinyh phanv laiv tauh nzônh cuđ jeenx nyăngz munh, Six tuz cuđ jeenx yungf Mengc.” ¹⁵ Six nâyx đomc gâyf yaz max zengx nongc quaix laiv hâyđ, Nâyx zanyf yaz ja nâyx đomc woac six max zâyf oix jođ nyâuh Yâuf-pez laiv hungđ nongc, yaz tayc six năngx gongx têx, wâyc max bây laiv tauh zoz yaz coong nyăngz woac pênx ưrx jeetx woac.” ¹⁶ Yaz lănv cuđ-jeenx six yaz max nzeetx blangc, Nây six yaz nyăngz cumh pâuz oix zuc ayx, Six coong yaz max lănv cuđ jeenx têx Yaz songđ numđ zâuđ.” ¹⁷ Yaz coong yaz cănh njăpf tingc nyâuđ oix nzônh cuđ jeenx têx, Yaz six tuz stipx congz stynh, Six soong yaz max zâyf oix njăpf tingc nyâuđ ayx têx, Six zâu jaoz phunz yaz ayx.” ¹⁸ Ha songđ tuz laiv hungđ phânh thươngz? (Phânh thươngz) Six năngđ nâyx, yaz lănv cuđ jeenx yaz max êu munh seetb laiv hungđ phunz yaz, Cayx năngđ munh nzônh cuđ jeenx nâyx.” ¹⁹ Yaz tuz pungx goib yaz max zuc ayx laiv tauh nyăngz Nâuh, Yaz nyunc ayx songx munh nyăngz nâuh, ayx phunz Munh đungx tuz Njâuv six cangc năngx gongx têx.” ²⁰ Yaz cloon Yiu-tai Munh yămz, Yaz yâuc ayx năngđ Yiu-tai munh nâyx phunz Yiu-tai Munh tuz Njâuv, Max cun yaz max zâyf yămz Đoouc-lif gâyf cah đi nyăngz Munh, Six yaz cloon yămz Đoouc-lif gâyf cah đi yămz yaz yâuc ayx năngđ nănh stiz nâyx, Phunz yămz Đoouc-lif gâyf cah đi nyăngz munh tuz Njâuv.” ²¹ Yaz cloon max naih Đoouc-lif gâyf woax đomc munh yămz, Yaz songđ yămz năngđ woax đomc munh nâyx phunz Nănh stiz tuz njâuv, Yaz max zâyf coong yaz max âyz Tênb-Hungh nyăngz Đoouc-lif gâyf ayx đêh, Six yaz zuc Njâuv-Zâu nyăngz Đoouc-lif gâyf Stayb yaz.” ²² Yaz cloon zeen max yongb nyăngz Munh yămz, Yaz yâuc yămz năngđ woax đomc munh nâyx, ayx phunz zeen max yongb woax đomc munh tuz Njâuv, Yaz songđ ayx năngđ woax đomc Munh, Nongc muif hungđ zux ix wâyc stăngc woax đomc munh tuz Njâuv. ²³ Yaz năngđ nâyx ayx Six ayx wâyc cuđ jeenx, Yaz nzof nzăngđ tuz naih cuđ jeenx nyăngz Pôz.” ²⁴ Nyâuh Yâuf-pez songđ pâyz tuz Munh tinyh tâu tyuv, Six jangx cungb tuz naih ah lanh tuz Sâuđ nyâyc, Nănh songđ oix zuc nzac jab tyuv nzăngđ tuz sađ Sâuđ nyâyc! ²⁵ Tinyh tâu tyuv nyăngz Munh muif lanh Songđ oix zuc cănh leđ tuz mănv nyăngz Stynb, oix zab tuz nomz bamh canz nyăngz banyh Tênb-mouc, Six hayh huđ quaiz, Six pănh nyăngz banyh Tênb-mouc Stâyv quâyx max hayh quaiz.” ²⁶ Wâyc năngđ nâyx yaz tyuv yaz max zâyf tyuv năngđ max naih tingc săngh nyăngz tync, Yaz bopc max zâyf năngđ munh tinyh phanv nongc puf bopc nzaox.” ²⁷ Yaz hođ yaz tuz yaz nyăngz stynb stayđ yongb, Phunz cănh hayh cun tuz hingh, Six yaz oix zuc bătx nănh ayx nâuh phunz Yaz, Phunz yaz nzaox pitc lanh max zuc Tênb-Hungh quanyf yaz.”