¹ Songx yâuf-pez lex! Tauv yaz ninyh tayđ nyâuh Yâuf-pez, Yaz max zâyf nongc cuyb mungv nyăngz woac, Mah six bamh-munh Tongb-manyh nyăngz woac, Lănv Tênb-Hungh pinyx nyăngz jau.” ² Tauv yaz cloon nyâuh Yâuf-pez yămz woax zanyf, Yaz tingc nyâuđ cungb oix lănv Njâuv-Zâu Yê-su zuc tingz yămz săpc đăngc zax nyăngz dlayc, Pitc hungđ yaz max coong, “ ³ Wâyc zuc năngđ naz yaz ninyh tauv nyâuh Yâuf-pez woa, Yaz cumh nzav tuz stynb Synx nzuf.” ⁴ Yaz lănv nyăngz woac cloon coong nyăngz Gâyf, Max zâyf nongc bamh-munh nyăngz Tongb-manyh, Coong woac blangc, Six nongc Singx-lingh phunz yaz nyăngz quyênh.” ⁵ Năngđ naz phunz pănh Yâuf-pez tăpx pănh nyăngz seenz Stymz yămz Zâu Tênb-Hungh nyăngz quyênh, max zâyf pangc yămz Bamh-munh woax đomc Tongb-manyh.” ⁶ Yaz lănv Tongb-manyh nyăngz gâyf phunz zeen Tongb-Gâyf nyăngz Munh Mungv, Max zâyf âyz nâyx yeenh stâyv bamh canz naih lanyf naih quyênh nyăngz Tongb-manyh, Nâyx hungđ Tongb-manyh six paic nzuf.” ⁷ Yaz lănv nyăngz Tongb-manyh, Six max zengx plongx yangh nyăngz Tongb-manyh, Tênb-Hungh pinyx vâyv nyăngz Tongb-manyh, Max zengx zâyx nâyx nomz Bamh-canz woax zanyf, Tênb-Hungh tingc nongc Nâyx hungđ Tongb-manyh phunz pănh tuz Gwăngz-eng.” ⁸ Cun nâyx yeenh stâyv bamh-canz nyăngz Munh max naih toix laiv lanh pâyz tuz nâyx hungđ Tongb-manyh, Six coong nănh stiz năngđ pâyz têx, Nănh stiz six max zoz Gwăngz-eng nyăngz Zâu tingz ănz săpc đăngc zax nef.” ⁹ Năngđ Canyx-Stâub ja lănv coong nâyx, “Mâyc max zengx tuz phătc quaix, “Bah noomh max zengx tuz numđ quaix, “Max zengx naih toix laiv tauh nyâyh tuz tauv nâyx đomc dlayc, “Tênb-Hungh bêc bênc săngh phunz stăngz nănh woax đomc Munh.” ¹⁰ Six max zengx plongx yangh nyăngz dlayc, Tênb-Hungh nongc Singx-lingh phunz pănh pâyz, wâyc zuc Singx-lingh zah tâuz tuz pâyz tauv Tênb-Hungh đôz nzongf nyăngz zux ix yâuc zah tâuz tuz pâyz. (Ê-sai 64:4-) ¹¹ Cungb coz Munh cănh naih coz Munh nyăngz nyâuđ nyâyh nyăngz dlayc, lauf năngđ naz, cungb Tênb-Hungh nyăngz Singx-lingh nzăngđ pâyz tuz Tênb-Hungh nyâyh nyăngz dlayc.” ¹² Pănh max zâyf stipx bamh canz nyăngz dlănh, Six pănh stipx tăng Tênb-Hungh phunz taih nyăngz Singx-lingh, wâyc phunz pănh pâyz tuz muif hungđ.” ¹³ Nâyx đomc dlayc yaz max zâyf nongc bamh munh nyăngz Tongb-manyh nzaox nyăngz woac lănv coong, “Six yaz nongc Singx-lingh nzaox nyăngz gâyf lănv phunz naih Singx liingh nyăngz munh Mungv.” ¹⁴ Toix laiv tauh max naih singx-lingh, Six max hayh tuz stipx Tênb-Hungh phunz Singx-lingh nyăngz sâuđ-nyâyc, Nănh stiz stunx nâyx đomc six vutx nyăngz dlayc, wâyc zuc cungb naih Singx-lingh nyăngz munh nzăngđ pâyz tuz nâyx đomc dlayc.” ¹⁵ Naih Singx-lingh nyăngz munh nzăngđ hayh nyâyh tuz seetb nâyx đomc dlayc, Six max naih toix laiv lanh tingc tuz Nănh, “Canyx-Stâub ja Coong, ¹⁶ “Toix laiv lanh hayh pâyz tuz Zâu nyăngz nyâuđ? “Toix tauh hayh nzaox nănh? (Ê-sai 40:13-) “Six pănh naih Njâuv-Zâu nyăngz zux ix.”