¹ Yaz Phao-lô tuz Tênb-Hungh âyz nănh nyăngz oix paiđ yaz taih ayx Njâuv-Zâu Yê-su nyăngz cumh pâuz Munh, cloon pănh nyăngz Yâuf pez Sôtv-then.” ² Nâyx zây jeenx zuyz phunz yămz Cô-lin-tô Stengv Zâu nyăngz Huyđ-toongh Munh. six cloon Njâuv Zâu Yê-su songc mengc săngh woax đomc Đăngb-zengh nyăngz munh, Yâuc tuz Tênb-Hungh êu taih ayx nănh nyăngz Đăngb-zengh nyăngz Yâuf pez, Phunz cloon Muif hungđ pec stingx yămz nzêux muif đoif, six woax đomc couv Njâuv-Zâu Yê-su nyăngz bux woax đomc, Zâu six ayx nănh stiz nyăngz Zâu, Yâuc ayx pănh nyăngz Zâu.” ³ Jođ pănh nyăngz pha Zâu Tênb-Hungh cloon pănh nyăngz Njâuv Zâu Yê-su Sađ pôz sađ pengh oonz phunz nyâuh Yâuf pez ô stayx.” ⁴ Yaz muif dlih wâyc nyâuh couv Tênb-Hungh, wâyc zuc nănh nongc Njâuv-Zâu Yê-su sađ pôz phunz Yâuf pez ô-tayx. ⁵ Wâyc zuc nyâuh yâuf pez cloon Njâuv-Zâu Yê-su songc mengc săngh, nyâuh songđ puv quâyx muif hungđ naih dloih nzuf, Tăng nyâuh coong nyăngz woac, cloon nyâuh naih nyăngz yeetx stong bănh sangz.” ⁶ Wâyc zuc pănh stăngc Njâuv-Zâu ayx Zanyx manyf woax đomc woac, Njăpf tuz wăn yămz nyâuh Yâuf pez nyăngz nyâuđ.” ⁷ Wâyc nâyx, nyâuh Yâuf pez zu Njâuv-Zâu Tênb-Hungh Yê-su năngx nzac taih woax zanyf, Pănh max sămv toix lungđ sâuđ-nyâyc.” ⁸ Nănh six oix stăngc phunz nyâuh Yâuf pez zeen tuz wăn tauv stêtb mâyv, tauv Zâu taih woax noib nyâuh yâuf pez songđ dlăngc max naih wâyx.” ⁹ Tênb-Hungh six couv tuz Wăn, Nănh êu nyâuh Yâuf-pez taih cloon nănh nyăngz toonz songc phănc, Six njâuv-Zâu Yê-su, Pănh nyăngz Zâu.” ¹⁰ Songx yâuf-pez lex, Yaz tingz Njâuv-Zâu Yê-su nyăngz bux jođ nyâuh Yâuf-pez six zuc songc ah zâux woac, Max tuz phunz đanv ayx sax peob, six zuc hopđ stymz dlongh âyx, songc tyuh nyâuđ. ¹¹ Yâuf pez lex! Cơ-lô nyăngz pyau Munh lănv bux yaz coong, “Yămz nyâuh Yâuf pez woa naih tinyh nzengz nyăngz dlayc.” ¹² Yaz oix coong, “Coz munh cănh naih coz Munh nyăngz woac coong “Naih lanh coong, “Yaz lêpc Phao-lô, “Naih phanx coong, “Yaz lêpc A-bô-lô, “Naih pitc tauh coong, “Yaz pêpc Phê-e-rơ, Năngx naih phanx coong, “Yaz lêpc Njâuv-Zâu.” ¹³ Njâuv-Zâu zuc zeb ayx đungx cuyb mah? Max zâyf Phao-lô zuc tingz woa săpc đăngc zax tayv nyâuh Yâuf pez mah? Max đê! max zâyf nyâuh Yâuf pez tingz Phao-lô nyăngz bux ayx quaix womz nyăngz gâyf mah? max đêh! ¹⁴ Yaz hâuđ Tênb-Hungh, Blătc nzuf Ri-butv, Cloon Gai-utv, Yaz max stăngc toix laiv tauh ayx quaix womz nyăngz gâyf." ¹⁵ Năngđ naz max naih toix laiv tauh hayh lănv coong, “Buz tingz Phao-lô nyăngz bux ayx quaix womz nyăngz gâyf phunz toix tauh Yâuf pez.” ¹⁶ Yaz songđ tuz Stăngc Tê-pha-na nyăngz pyau Munh ayx quaix womz nyăngz gâyf, Yaz max săngx tuz stăngc pitc tauh.” ¹⁷ Njâuv-Zâu max zâyf paiđ yaz ninyh stăngc munh ayx quaix womz nyăngz gâyf, Six nănh paiđ yaz ninyh lănv cuđ-jeenx, Max zâyf nongc bamh munh nyăngz Tongb-manyh lănv Njâuv-Zâu nyăngz săpc-đăngc zax, Max naih stuyh muc.” ¹⁸ Six woax đomc zuc mêtc nyăngz Munh mangc nzaox săpc đăngc zax nyăngz Gâyf six pênx vutx nzongf, Six pây cloon pănh tuz Njâuv Zâu nyăngz Munh, Six săngh Tênb-Hungh nyăngz quyênh.’ ¹⁹ Năngđ Canyx-Stâub ja coong, “Yaz mêtc Tongb-manyh Munh nyăngz Tongb-taiv, “Yaz yâuc oix quanyf Tongb-taiv Munh nyăngz Tongb-manyh tuih.” ²⁰ Tongb-manyh Munh lex? hođ đăngc nyăngz Munh lex? Nzeetx blangc nyăngz Munh lex? Tênb-Hungh oix pyênv nâyx yeenh Stâyv nyăngz Tongb-Manyh Munh oongx nzongf.” ²¹ Bamh canz munh max hayh pâyz tuz Tênb-Hungh nyăngz Tongb-manyh, wâyc năngđ nâyx nănh songđ nongc Munh Stunx oongx nyăngz woac, Njâuv zeen nănh woax đomc Munh.” ²² Yiu-tai Munh naic jix-caox njingf mangc, Hi-lapc Munh Yâuc lov Tongb-manyh.” ²³ Six pănh lănv Njâuv-Zâu zuc tingz săpc đăngc zax nyăngz âyf, Yiu-tai Munh Yâuc nzêmh năngđ njămc yămz mâyc, Max zâyf Yiu-tai munh nănh stiz Yâuc Stunx pênx munh vutx nyăngz woac.” ²⁴ Six wâyc nănh êu taih nyăngz Munh, max cun Yiu-tai Munh mah Six Hi-lapc Munh Njâuv-Zâu Six săngh Tênb-Hungh nyăngz Tongb-manyh cloon nănh nyăngz quyênh.” ²⁵ Wâyc zuc Tênb-Hungh oongx nzongf nyăngz dlayc, Songđ năngx lemđ têx, bamh-Munh nyăngz Tongb-manyh, Tênb-Hungh đoonh nzongf nyăngz tync, Songđ năngx yongb têx, Bamh Munh nyăngz jab.” ²⁶ Songx Yâuf pez lex! nyâyh mangc jađ geh! Tênb-Hungh êu nyâuh Yâuf pez taih woax zanyf, âyz Pănh bamh Munh phătc, Tongb-manyh munh Yâuc max naih đungx, Naih quyênh cloon nzangc tăng nyăngz Munh Yâuc max naih đungx.” ²⁷ Six Tênb-Hungh nongc bamh munh stunx oongx nyăngz dlayc ayx phunz Tongb-manyh Munh zuc nyayz, Nongc lanz nzongf nyăngz dlayc ayx phunz yongb nzongf nyăngz dlayc zuc nyayz.” ²⁸ Nănh nongc bamh-Munh stunx hav pênx yaf tăng nyăngz dlayc, Bamh Munh mangc stam nyăngz dlayc, Phax huđ bamh Munh nongc seen nyăngz dlayc.” ²⁹ Tênb-Hungh ayx năngđ nâyx max naih toix laiv tauh yămz nănh nyăngz cah đangc nzeetx blangc.” ³⁰ Wâyc couv woangz nănh, Pănh Yâuf pez tuz yămz Njâuv-Zâu Yê-su nyăngz cah njaf, Tênb-Hungh nongc Njâuv-Zâu ayx pănh nyăngz Tongb-Manyh, Tênb-Hungh nongc Njâuv-Zâu phunz pănh cloon nănh hopđ nyâuđ, pênx Nănh nyăngz Đăngb-zengh Munh, Suc pănh phunb đangz lauf gâyh đutb Stoif.” ³¹ Năngđ Canyx-Stâub ja Coong, “Toix laiv tauh oix zanyb, “Six zanyb yămz Zâu woax phanx.”