¹ Asavule muli mwemwe yano yalingine ukuya ayasambilizi, yanji, pakuti mwamanya kuno sweyano tukasambilizya tulilongwa sana. ² Pakuti swemo swensi tukaponga munzila izivule. Ndi pasi wumwi wino asiponga mumazwi, umunthu wakufikapo, akakwanisya nukuyilema umwili wakwe. ³ Nomba ndi tukuyika imikowelo mumilomo yamphunda pakuti zyatuvwila, tungaya namaka yakupetusya imyili yawo yonsi. ⁴ Mumanye nupya ukuti isitima zya mumanzi, nanthi zikule wuli zikatutika numuza wamaka, nu kuyipetusya nakanyonjelo akanono sana ukuyitwala konsi kuno kapisya akulonda. ⁵ Munzila yikwene ululimi akawumbwa kanono akamwili, lelo kakakuzya ivinthu ivivule. Mumanye nupya vino akamoto kanono kakawocha imphanga iyikalamba. ⁶ Ululimi nalo umoto, imphanga iyiyembu yino yikala pamwili witu. Ululimi lukawonona umwili wonsi, lukayika pamoto imiyele yitu ya wumi, nukuyitwala mumoto wa gehena. ⁷ Pakuti umutundu wonsi wa chinyama, ivunyi, ivyakusela, ni vyamumanzi vyatekwa nukuti vikatekwa na yanthu. ⁸ Kwene kusi umunthu wino angateka ululimi. Uwuyipe uwawula ukupuza, lwazula nu wusungu wakukoma. ⁹ Na lukwene tukamutumvya Mwene na Tata, nakupya na lukwene tukatipa ayanthu, yano yelewulwa mu chata chakwe Leza. ¹⁰ Ukufuma mumulomo uwuliwumwi mukafuma ukupolelela nu kutipa. Yanji, ivinthu vii vitawombwa. ¹¹ Wuzye imbwiwi iyiliyimwi yingafumya amanzi ayalyomphe na yalule? ¹² Wuzye umuti wa mukuyu, yanji, amafuta? Limwi umwangazi, amakuyu? Pamwi amanzi ya muchele yanganong'omela. ¹³ Aweni wuno uwamano nu wakuvwichisya muli mwemwe? Lekini umunthu wiyo alanjizye uwumi uwuzima mumilimo yakwe mukuyichefya kwa mano. ¹⁴ Kwene ndi muli ninkhwini iziyipe nukuyilema mumyenzo yinu, mutayikuzya nukuyipa uwufi ukwiminkhana nuwumolimo. ¹⁵ Yaa asamano yano yakayiza ukufuma kupela.Kwene, ayamunsi yapansi, asa yamumupasi, aya mipasi iyiyipe. ¹⁶ Pakuti kumo kuli uwuzuwa nu kuyikuzya, kwaya ichimvulunganya nivyakuchita uwuyipe vyonsi. ¹⁷ Kwene amano yakufuma kwiyulu ayakutalika ayazima, nupya ukukunda-umutende, ukuyichindika, aya kuvwika, ayakuzula nu luse ni vikomwa ivizima, aya kuyisunga na yachumi. ¹⁸ Ichikomwa cha wulungamane ukuvwangwa umutende muli yano yakapanga umutende.