¹ Nai vola okwe, e volai koto vuara na hoqohoqo loju i Sariti, na wahe ni vola, e volai koto i vua o kua e qulu koto e viju n yalo ni Kalou, qeinia na viju na kalokalo. Qi kilasia koto na kwa o tara koto, mu yaca boto na cola, ia i mase ju. ² Mo mata ma, mo vatawa koto, mo vakaikai koto ina kwa e vo koto vuako, ia e voleka juho ni mase, ni qu tabu dania na lemu cakacaka me vina hara ina mata ni Kalou. ³ Mo vanumia koto ina lemu vabausia ina kwa i ciqomia he ir rogo. Mo varorogo mo vivujuni. Ia kodaki ina tabu vatawa koto, ia kodaki i tabu vatawa vavina, a qina lawa me kodaki na dau driva, ina tabu kilasia na siki ni higa qina kawa i ke vuako. ⁴ Ia, e nokoto vuako e yavalu na yaca ma i Sariti, ena vica boto ena tabu vadjukadjukania na ledra i hulu, era na qai laqei yau, era na qai huku nai hulu bucobuco ni yaga hara valevu. ⁵ Ia, o kua e gugumahuna, ena vaihulu bucobuco, a qina tabu kuhia ei na yaca inai vola ni cola, o yau qina qai voha me balesia e yaca e mata na lequ Nahuna qeinira na agilose coko ga. ⁶ O kua e no e bebe -, me rogo hara na kwa e kwaya na Yalo Tabu i vu ana hoqohoqo loju. ⁷ Nai vola okwe, e volai koto i vuara na hoqohoqo loju ma i Filatelifa, na lea tata e hila o kua e yalo havahava, o kua muni e djina, o kua e qulu koto nai dola i Tevita, o kua munia e dolavia ena tabu hila muni, ena hogosia muni ga,ena hukai hila muni na ecola ena dolavia muni. ⁸ Aqi kilasia na kwa i tara koto. Mo tolavia, o yau ga qu a dolavia na mataniwere, ena tabu hila ena hogasia rewa. Qi kilasia ni hewahewa koto na lemu kaikai, ia o a qulu kotoga na lequ voha, qeinia o tabu cakitakinia muni qu yaca. ⁹ Mo tolavia koto o kura era lomania na lea vavakoho o Setani, ena kwaya ni ra Jiu, ia erab tabu nira djina. Qina tara me ra na lama mera na cuva vuako, mera na kilasia koto nio yau qi lomaniko koto. ¹⁰ Nio vabausia ga na lequ voha, qeinia na vocosia koto, o yau qina maroroi siko muni ena gauna ni dauveivatovolei o kua ena lama i vuravura taucoko, me na qai vatovolira o kura era nokoto i vuravura. ¹¹ A qina varau la tale howa. Qulumia koto ina kwa a holi vuako me kodaki na lemui sala vajuraga. ¹² O yau qu lehia o kua e gugumahuna, me juraga ina were ni Kalou, ia ena tabu ladei ma i rara, ia ena volaia o kua na yaca i Jiova, na yaca muni ni Jerusalemi o kua e lama i lomalagi mai vua na Kalou, qeinia muni qu yaca vou. ¹³ O kua e no e bebe me varorogo hara, me rogo hara na kwa e kwaya na Yalo Tabu i vuara nai hoqohoqo loju. ¹⁴ Nai vola okwe, e volai koto i vuara na hoqohoqo loju i Liotisea. A kwaya ho na vikwa oqo, o kua e dau kwaya na kwa dodonu, e djina muni, na dau ni vajulewa ina lea bulibuli na Kalou. ¹⁵ Aqi kilasia koto na kwa o tara, i tabu kakahali, qeinia i tabu katakata a qu a vinasia mo katakata he kakahali. ¹⁶ Ni, o katakata boto vahewa o yau qi varau haraga mequ luwetaki niko ma i qu guhu. ¹⁷ I kwaya, qi vujuniyau, a qai levu ju na lequ i yau, ia qi tabu vinasia e hila nakwa. Ia e tabu kilasia na levu ni buraburaihau ni lequ cola, qi dravudravua, qi mataboko qeinia na luvaiwale ena mata ni Kalou. ¹⁸ Rogo na lequi vasala vuako, mo volia vuau na koula e va tovolei vana bukawaqa, mo vujuniyau ke, qeinia nai hulu bucobuco, mo vaihulutaki ke, balesia mo kua ni varaitaki na lemu luvaiwale e vivamajuataki mo lumusia mu mata ena lumu mo tola rewa ke. ¹⁹ O kura taucoko qi lomanira, qi vunaucisira, qi dau ocasira muni, mo gugumahuna muni, mo vivujuni muni. ²⁰ Tolavia, a qi juho na mataniwere, qi jukijuki koto, kodaki e hila e rogo qu domo, dolavia na mataniwere, a qina lawa i were, qi kana qeinia muni, o kua muni vuau. ²¹ O kua e gugumahuna, o yau qina holia vua na dodonu me tadra qeniau ena lequ nono va juraga, me kodaki na lemu gugumahuna, e e nokoto ina lea non vajuraga o Nahuna. ²² O kua e no e bebe, me rogo hara na kwa e kwaya koto na Yalo Tabu ina hoqohoqo loju.