¹ Okwe nai vatakilakila me balesia o Jisu Karisito o kuwa holia vua na Kalou me vatakia vuwara nai Talatala na kwa e voleka ni yaco, a vatalasiya la agilosi me kwaya vo Joni na kea Talatala. ² O kua a kwaya na tata ni Kalou, qeinia kai jukujuku o Jisu Karisito, qeinia na kwa coko a dania. ³ E kalougata o kua e wilikia qei nia e rogo na tata ni viyagwane okwe, a vabausia na kwa e volai ke ni voleka ho kea gauna. ⁴ O Joni vuwara nai vavakoho loju mai Esia, me lemutou na loloma, qeinia na vacegu mai vua a cola nikua, a cola ma i mata, qeinia o kua e hibere ma mai vuara na yalo e viju era nokoto ma i mata ni lai nono na viyagwane. ⁵ Mai vua muni na viyagwane o Jisu Karisito, na daujukujuku yalo jina, na ulumajua vuara na jucake ma i na mase, qeinia na ledra viyagwane levu na jui vuravura, a havasiyadei na leju i valavala bura ina lea dra jina. ⁶ A juci ketatou meju sa jui na bese vua na viyagwane, qeinia o Tamaya, meju varokorokotakinia qeinia na lewaia me tawa muju. Emeni. ⁷ Dania ena lama o kua ina yo, jina tolavia ju mata coko, qeinira muni ara huwakiya, e vuku o kua era na tagi ke na vimataqwali coko i vuravura. Me kodaki okwe. Emeni. ⁸ A kwaya na viywagane na Kalou, o yau na Alifa qeinia na Omeka, nai vasekivu qeinia nai vaosiosi, o kuwa a cola mai mata, nikuwa qeiniya na cola e hibere ma, na qwaqwa. ⁹ O yau o Joni o wekamutou muni, qeinira nai tokani era daunivivaburaburataki qeinira na mataniju o kura na vohosiya o Jisu, qu nokoto ina yanuyanu o Patimo, ina vuku ni tata ni Kalou qeinia kai jukujuku o Jisu. ¹⁰ Maru ni vata koto na Yalo Tabu ina leya higa na viyagwane, qu rogo e hila na domo levu i qu lobo, kodaki na davui. ¹¹ A kwaya ma o yau na Alifa qeinia na Omeka, o kuwa ena seimata, o kuwa ena seimtaku muni, na kwa o dania mo volaia ian veva, o qei vakou vuwara nai hoqohoqo lewe ni loju e viju mai Esia, i Efeso, i Simuri, i Perikamo, i Caetaira, i Sariti, i Filatelifia, qeiniya i Leotisea. ¹² Qu qai tolalehu mequ daniya o kuwa a tata ma vuwau, na gauna qu tola lehu ke qu qai dania e viju nai juju ni hina koula. ¹³ Niqu tola wa, qu daniya e hila e juju ina kedra maliwa nai juju ni hina e viju e kodaki na luve ni ecola, a huku ju e hila nai hulu e hara e lala, e bujukia e haro nai hulu koula. ¹⁴ E buco coko e ulu qeiniya e rauniulu me kodaki na vulu ni hivi, kodaki muni na buco ni mata ni luvu, a mudre e mata kodaki na mudre ni quto. ¹⁵ E la e kodaki na varasa, a cacarivariva me kodaki ni hala ina kuro, e domo e kodaki na caruju ni wai. ¹⁶ A qulumiya ju e lima e viju na kalokalo, e guhu a lama i ke nai helewau gata e ruwa e basi, e mata kodaki na matanihiga ni dra katakata ju. ¹⁷ Na gauna qu dania ke qu qei carubi ira donumakinia e la me kodaki e hila e cibasia. A derei yau e lima i matau, a qai kwaya vuwau, kuwa ni mataku, o yau o kuwa seimata, o kuwa muni ena seitaku. ¹⁸ O yau o kuwa a qei cola, ia qu a mase i mata, tolavia o yau qina cola me tawa muju, o yau qi qulumiya muni kai dola o Etesi qeinia na mase. ¹⁹ Ia na kwa o dania osi mo volaia, qeinia na vikwa e no, qeinia na vikwa ena yaco ma i taku. ²⁰ Na kwa lo me balesia na kalokalo e viju, o dania e lima i matau, qeinia nai juju ni hina koula e viju, na kalokalo e vijue ledra nai Talatala ni hoqohoqo ni lewe ni loju e viju. Nai juju ni hina e viju o dania o ho nai hoqohoqo lewe ni loju e viju.