¹ Nahitabo kini sa mga adlaw sa dihang ang mga maghuhukom nagmando nga adunay kagutom sa yuta, ug ang usa ka tawo sa Betlehem sa Juda miadto sa pgpuyo ingon nga usa ka langyaw sa nasod sa Moab uban ang iyang asawa ug duha ka anak nga lalaki. ² Ang ngalan sa maong tawo mao si Elimelec, ug ang ngalan sa iyang asawa mao si Naomi. Ang mga ngalan sa iyang mga anak nga lalaki mao sila si Malon ug Kilion, mga Ephratehanon sa Betlehem sa Juda. Miabot sila sa nasod sa Moab ug didto mipuyo. ³ Unya si Elimelec, nga bana ni Naomi, namatay, ug nahibilin siya uban sa duha niya ka anak nga mga lalaki. ⁴ Kini nga mga anak nangasawa gikan sa mga babaye sa Moab; ang ngalan sa usa mao si Orpah, ug ang ngalan sa usa pa mao si Ruth. Nagpuyo sila didto sulod sa napulo katuig. ⁵ Unya si Malon ug si Kilion namatay, ug ang babaye nahabilin nga wala na ang duha niya ka anak ug wala na ang iyang bana. ⁶ Unya siya mitindog uban sa iyang mga umagad nga babaye ug mipauli gikan sa yuta sa Moab, tungod kay siya nakadungog didto sa yuta sa Moab nga si Yahweh nagsangkap sa mga kinahanglanon sa iyang katawhan pinaagi sa paghatag kanila ug makaon. ⁷ Busa mibiya siya sa dapit nga iyang gipuy-an kauban ang duha niya ka umagad nga babaye, ug nanglakaw sila aron mobalik ngadto sa yuta sa Juda. ⁸ Miingon si Naomi ngadto sa iyang duha ka umagad nga babaye, "Lakaw, pauli, matag-usa kaninyo, ngadto sa panimalay sa inyong inahan. Hinaot nga si Yahweh magmaluluy-on kaninyo, ingon nga nagmaluluy-on kamo sa mga patay ug nganhi kanako. ⁹ Hinaot nga si Yahweh maghatag kaninyo ug kainaw, matag usa kaninyo sa panimalay sa laing bana." Unya gihalokan niya sila, ug ilang gipatugbaw ang ilang mga tingog ug mihilak. ¹⁰ Miingon sila ngadto kaniya, "Dili! Mokuyog kami kanimo ngadto sa imong katawhan." ¹¹ Apan miingon si Naomi, "Pauli, akong mga anak nga babaye! Nganong mokuyog pa man kamo kanako? Aduna pa ba akoy mga anak nga lalaki sa akong sabakan alang kaninyo, aron nga sila mamahimo ninyong mga bana? ¹² Pauli, akong mga anak nga babaye, lakaw kamo sa inyong kaugalingong dalan, kay tigulang na kaayo ako aron makabaton pa ug bana. Kung moingon ako, 'Hinaot nga makakaplag ako ug bana karong gabhiona,' ug unya manganak ug mga lalaki, ¹³ mohulat ba kamo hangtod nga modako sila? Mohulat ba kamo ug dili makigminyo ug lalaki karon? Dili, akong mga anak nga babaye! pait kaayo alang kanako tungod kaninyo nga ang kamot ni Yahweh gibakwi batok kanako." ¹⁴ Unya ang iyang mga umagad nga babaye mipatugbaw sa ilang mga tingog ug mihilak pag-usab. Gihalokan ni Orpah ang iyang ugangang babaye agig panamilit, apan si Ruth migakos kaniya. ¹⁵ Miingon si Naomi, "Paminaw, mipauli na ang imong bilas nga babaye ngadto sa iyang katawhan ug sa iyang mga dios. Pauli na uban sa imong bilas nga babaye." ¹⁶ Apan miingon si Ruth, "Ayaw ako hangyoa sa pagpahilayo kanimo, kay kung asa ka moadto, didto usab ako; kung asa ka mopuyo, didto usab ako mopuyo; ang imong katawhan mahimo nga akong katawhan, ug ang imong Dios mahimo nga akong Dios. ¹⁷ Kung asa ka mamatay, didto ako mamatay, ug didto ako ilubong. Hinaot nga si Yahweh mosilot kanako, ug mas labaw pa, kung aduna pay lain gawas sa kamatayon ang magpahimulag kanato." ¹⁸ Sa pagkakita ni Naomi nga determinado si Ruth nga mouban kaniya, miundang na siya sa pagpakiglalis kaniya. ¹⁹ Busa ang duha mibyahe hangtod nga nakaabot sila sa lungsod sa Betlehem. Nahitabo kini sa dihang miabot na sila sa Betlehem, ang tibuok lungsod naghinamhinam pag-ayo mahitungod kanila. Ang mga babaye miingon, "Mao ba kini si Naomi?" ²⁰ Apan miingon siya ngadto kanila, "Ayaw na ako pagtawga ug Naomi. Tawaga ako ug Mara, kay ang Labing Gamhanan nagpaantos kanako sa hilabihang kasakitan. ²¹ Milakaw ako nga puno, apan gipapauli ako ni Yahweh nga walay dala. Busa nganong gitawag pa man ninyo ako ug Naomi, sa nakita nga si Yahweh nagpamatood batok kanako ang Labing gamhanan nagsakit kanako?" ²² Busa si Naomi ug si Ruth nga Moabihaon, ang iyang umagad nga babaye, mibalik gikan sa nasod sa Moab. Miabot sila sa Betlehem sa pagsugod sa ting- ani sa sebada.