¹ Karon si Naomi adunay paryente sa iyang bana, usa ka tawo nga dakog katigayunan sa banay ni Elimelek, iyan ngan si Boaz. ² Si Ruth, ang Moabihanon, miingon kang Naomi, "Karon tugoti ako nga molakaw ug manghagdaw sa mga lugas didto sa kaumahan. Mosunod ako kang bisan kinsa nga motugot kanako." Busa miingon si Naomi kaniya, "Lakaw, akong anak nga babaye." ³ Si Ruth milakaw ug nanghagdaw sa kaumahan nga nagsunod sa mga mangangani. Unya nahitabo nga naabot siya didto sa bahin sa kaumahan nga gipanag-iyahan ni Boaz, nga kabanay ni Elimelec. ⁴ Tan-awa, si Boaz nahiabot gikan sa Betlehem ug miingon sa mga mangangani, "Hinaot nga si Yahweh magauban kaninyo." Mitubag sila kaniya, "Hinaot si Yahweh magapanalangin kanimo." ⁵ Unya miingon si Boaz sa iyang sulugoon nga nagdumala sa mga mangangani, "Si kinsang lalaki ang nanag-iya niining bayhana?" ⁶ Ang sulugoon nga nagdumala sa mga mangangani mitubag ug miingon, "Mao kini ang babaye nga Moabihanon nga mikuyog kang Naomi gikan sa yuta sa Moab. ⁷ Miingon siya kanako, 'Pahangyoa ako nga manghagdaw dinhi ug manguha sunod sa mga mangangani.' Busa mianhi siya dinhi ug nagpadayon sukad sa buntag hangtod karon, gawas nga nagpahulay lang siya kadali sulod sa balay." ⁸ Unya miingon si Boaz kang Ruth, "Naminaw ka ba kanako, akong anak? Ayaw na paglakaw ug panghagdaw sa uban pang kaumahan; ayaw na pagbiya sa akong uma. Hinuon, pabilin dinhi ug trabaho kauban sa akong batan-ong babaye nga trabahante . ⁹ Itutok lang ang imong mga mata sa uma diin ang mga kalalakiha nag ani, ug sundi ang ubang mga babaye. Wala ba nako gisultiha ang mga kalalakihan nga dili manghilabot kanimo? Ug sa uhawon ka, mamahimo kang mokuha sa mga banga ug moinom sa tubig nga gikabo sa mga kalalakihan." ¹⁰ Ug mihapa siya atubangan ni Boaz ug miyukbo sa yuta. Miingon siya kaniya, "Nganong nakakaplag man ako ug kaluoy sa imong panan-aw, nga mitagad ka man pag-ayo kanako, nga usa ka langyaw?" ¹¹ Mitubag si Boaz ug miingon kaniya, "Gitaho kanako, ang tanan nimong gibuhat sukad namatay ang imong bana. Gibiyaan nimo ang imong amahan, inahan, ug ang imong yutang natawhan aron sa pagsunod sa imong ugangan nga babaye ug moadto sa mga katawhan nga wala nimo mailhi. ¹² Hinaot nga si Yahweh moganti kanimo alang sa imong binuhatan. Hinaot nga madawat nimo ang kinatibuk-ang bayad gikan kang Yahweh, ang Dios sa Israel, kansang mga pako nga imong nakaplagan aron kapasilongan." ¹³ Unya miingon siya, "toguti ako nga makakita ug pabor sa imong mga mata, akong agalon, kay gilipay mo man ako, ug nakigsulti ka kanako nga may kaluoy, bisan tuod dili ako usa sa imong mga babayeng sulugoon." ¹⁴ Panahon sa pagpaniudto miingon si Boaz kang Ruth, "Duol dinhi, ug kaon sa pipila ka tinapay, ug ituslo ang tinapay diha sa suka." Milingkod siya tapad sa mga mangangani, ug gihanyag niya kaniya ang pipila ka sinangag nga lugas. Mikaon siya hangtod nga nabusog siya ug gibilin ang uban niini. ¹⁵ Sa pagtindog na niya aron manghagdaw, gisugo ni Boaz ang mga batan-ong lalaki, nga nag-ingon, "Pasagdihi siya nga manghagdaw bisan diha sa mga uhay, ug ayaw siya pakaulaawi. ¹⁶ Ug kinahanglan usab ninyong kuhaon ang pipila ka mga uhay alang kaniya gikan sa mga binugkos, ug pasagdihi kini aron iyang mahagdaw. Ayaw siya badlonga." ¹⁷ Busa nanghagdaw siya didto sa uma hangtod sa kagabhion. Unya iyang gigiok ang lugas sa uhay nga hinagdawan ug ang lugas hapit usa ka ephah sa sebada. ¹⁸ Gipas-an niya kini ug miadto sa siyudad. Unya nakita sa iyang ugangan nga babaye ang iyang hinagdawan. Gidala usab ni Ruth ang sinanlag nga lugas nga nahabilin gikan sa iyang paniudto ug gihatag kini kaniya. ¹⁹ Ang iyang ugangan nga babaye miingon kaniya, "Diin ka man nanghagdaw karong adlawa? Diin ka man nagtrabaho? Hinaot nga ang tawo nga nagtabang kanimo mapanalanginan pa." Unya misugilon si Ruth sa iyang ugangan nga babaye mahitungod sa tawo nga tag-iya sa uma kung asa siya nagtrabaho. Miingon siya, "Ang ngalan sa tawo nga tag-iya sa uma kung diin ako nagtrabaho karong adlawa mao si Boaz." ²⁰ Miingon si Naomi sa iyang umagad, "Hinaot nga panalanginan pa siya ni Yahweh, nga wala magpalayo sa iyang pagkamaunongon ngadto sa mga buhi ug sa mga patay." Miingon si Naomi kaniya, "Kanang tawhana mao ang duol natong kabanay, usa sa atong suod nga kadugong manunubos." ²¹ Si Ruth ang Moabihanong babaye miingon, "Tinuod, miingon siya kanako, 'Kinahanglan ka magpaduol sa akong kaulitawhan hangtod nga ilang mahuman ug ani ang tanan.'" ²² Miingon si Naomi kang Ruth nga iyang umagad, "Maayo kini, akong anak, nga kuyog ka uban sa iyang mga babaye nga trabahante, aron dili ka madagmalan sa ubang uma." ²³ Busa kanunay siya nakigkauban sa mga babayeng trabahante ni Boaz aron nga makapanghagdaw pa siya hangtod matapos ang pag-ani sa sebada ug ang pag-ani sa trigo. Ug nagpuyo siya kauban ang iyang ugangan nga babaye.